ଟୋକିଓ,୭।୮: ଟୋକିଓ ଅଲିମ୍ପିକ୍ସରେ ଭାରତ ପାଇଁ ଏକମାତ୍ର ସ୍ବର୍ଣ୍ଣ ପଦକ ଜିତିଛନ୍ତି ଗୋଲ୍ଡେନ ବୟ ନୀରଜ ଚୋପ୍ରା। ଟ୍ରାକ ଓ ଫିଲ୍ଡ ଇଭେଣ୍ଟରେ ଅଲିମ୍ପିକ୍ସ ପଦକ ଜିତିବାରେ ୨୩ ବର୍ଷୀୟ ନୀରଜ ପ୍ରଥମ ଭାରତୀୟ। ଏହି ବୃହତ୍ ସଫଳତା ହାତେବାର ୫ ବର୍ଷ ପୂର୍ବରୁ ସେ ଆସିଥିଲେ ଚର୍ଚ୍ଚାକୁ।
୨୦୧୬ରେ ୨୦ ବର୍ଷରୁ କମ୍ ବିଶ୍ୱ ଚାମ୍ପିୟନଶିପ୍ରେ ସେ ସ୍ବର୍ଣ୍ଣ ପଦକ ଜିତିଥିଲେ। ସେହି ବର୍ଷ ଆୟୋଜିତ ସାଉଥ୍ ଏସିଆନ୍ ଗେମ୍ସରେ ସ୍ବର୍ଣ୍ଣ ଓ ଏସିଆନ ଜୁନିୟର ଚାମ୍ପିୟନଶିପ୍ରେ ହାତେଇଥିଲେ ରୌପ୍ୟ ପଦକ। ଏସିଆନ ଗ୍ରାଁ ପ୍ରିର ପ୍ରତ୍ୟେକ ଇଭେଣ୍ଟର ପୋଡିୟମରେ ସ୍ଥାନ ପାଇଥିଲେ ନୀରଜ। ୨୦୧୭ରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ଏସିଆନ ଚାମ୍ପିୟନଶିପରେ ମଧ୍ୟ ଜାରି ରହିଥିଲା ଗୋଲ୍ଡେନ ବୟଙ୍କ ସ୍ବର୍ଣ୍ଣିମ କ୍ୟାରିୟର। ମାତ୍ର ବିଶ୍ୱ ଚାମ୍ପିୟନଶିପ୍ରେ ତାଙ୍କୁ ବିଫଳତାର ସ୍ବାଦ ଚାଖିବାକୁ ପଡ଼ିଥିଲା। ୨୦୧୮ରେ ଏସିଆନ ଗେମ୍ସ ଓ କମନଓ୍ବେଲ୍ଥ ଗେମ୍ରେ ସ୍ବର୍ଣ୍ଣ ପଦକ ହାତେଇ ଥିଲେ। ଅଲିମ୍ପିକ୍ସର ସ୍ବର୍ଣ୍ଣିମ ଅଧ୍ୟାୟ ପୂର୍ବରୁ ନୀରଜଙ୍କ ଉପରୋକ୍ତ ସଫଳତା ଥିଲା ପୂର୍ବ ସୂଚନା। ଗତ ବର୍ଷ ୨୦୨୦ରେ ଫିନଲାଣ୍ଡରେ ଖେଳାଯାଇଥିବା ଏକ ଇଭେଣ୍ଟରେ ସେ ହାସଲ କରିଥିଲେ ଅଲିମ୍ପିକ୍ସ ଲାଗି ଯୋଗ୍ୟତା।
