ବୁଗୁଡ଼ା,୩୦ା୫(ଡି.ଏନ୍.ଏ.): ବୁଗୁଡ଼ା ବ୍ଲକ ଅନ୍ତର୍ଗତ ଗୋଲିଆ ଗ୍ରାମସ୍ଥ ଓଡ଼ିଶା ଆଦର୍ଶ ବିଦ୍ୟାଳୟ ସମ୍ପ୍ରତି ସ୍ମାର୍ଟ ସ୍କୁଲ୍ର ମାନ୍ୟତା ପାଇଥିଲେ ସୁଦ୍ଧା ବିଭିନ୍ନ ସମସ୍ୟାଘେରରେ ରହି ତା’ର ଆଦର୍ଶତା ହରାଉଥିବା ନେଇ ସାଧାରଣରେ ଚର୍ଚ୍ଚା ଜୋର୍ ଧରିଛି। ଦୀର୍ଘଦିନ ହେଲା ବିଦ୍ୟାଳୟରେ ସ୍ଥାୟୀ ପ୍ରିନ୍ସିପାଲ ନ ଥିବା ବେଳେ ସାମାଜିକ ବିଜ୍ଞାନ, କମ୍ପ୍ୟୁଟର, ମ୍ୟୁଜିକ୍, ଆର୍ଟ ଆଦି ବିଷୟ ପାଇଁ କୌଣସି ଶିକ୍ଷକ ନ ଥିବା ସ୍ଥଳେ ପିଇଟି ଏବଂ ଇଂଲିଶ ଶିକ୍ଷୟିତ୍ରୀଙ୍କ ବଦଳି ସମ୍ଭାବନା ଛାତ୍ରୀଛାତ୍ର ଓ ଅଭିଭାବକମାନଙ୍କୁ ଚିନ୍ତାରେ ପକାଇ ଦେଇଛି। ଅପରପକ୍ଷରେ ଇଂଲିଶ୍, ଗଣିତ ଓ ସାମାଜିକ ବିଜ୍ଞାନ ଆଦି ବିଷୟ ପାଇଁ ୩ ଜଣ ନୂଆ ଶିକ୍ଷକ ଯୋଗାଣକୁ ମଞ୍ଜୁରୀ ମିଳିଥିବା ସହ କମ୍ପ୍ୟୁଟର ଲ୍ୟାବ୍ ପାଇଁ ୪୦ଟି କମ୍ପ୍ୟୁଟର ମିଳିବା ସୁନିଶ୍ଚିତ ବୋଲି ଭାରପ୍ରାପ୍ତ ଅଧ୍ୟକ୍ଷ ସିଦ୍ଧାର୍ଥ ପ୍ରସାଦ ଜେନାଙ୍କଠାରୁ ପ୍ରକାଶ। ୨୦୧୮ରେ ୯.୧୬୯ ଏକର ପରିମିତ ଜାଗାରେ ସ୍ଥାପିତ ଏହି ବିଦ୍ୟାଳୟର ସମ୍ପୂର୍ଣ୍ଣ ପାଚେରି କି ସାଇକେଲ ଷ୍ଟାଣ୍ଡ ନ ଥିବା ବେଳେ ପିଲାଙ୍କ ଖେଳ ପାଇଁ ଅନୁପଯୁକ୍ତ ବିସ୍ତୀର୍ଣ୍ଣ ପଡ଼ିଆ ରହିଛି। ଉକ୍ତ ବିଦ୍ୟାଳୟର ହଷ୍ଟେଲ ନ ଥିବା ହେତୁ ବହୁଦୂରରୁ ଛାତ୍ରୀଛାତ୍ରଙ୍କୁ ଆସିବାକୁ ପଡୁଥିବା ବେଳେ ଗତ କିଛିମାସ ତଳେ ବିଦ୍ୟାଳୟରୁ ଫେରିବା ସମୟରେ ଅଟୋରୁ ଖସି ନବମ ଶ୍ରେଣୀ ଛାତ୍ର ଯୁବରାଜ ସେଠୀଙ୍କ ମୃତ୍ୟୁ ଘଟିଥିଲା। ଏସବୁ ସମସ୍ୟା ସହିତ ସବୁଠାରୁ ଗୁରୁତ୍ୱପୂର୍ଣ୍ଣ ସମମ୍ୟା ଭାବେ ଦେଖାଦେଇଛି ବିଦ୍ୟାଳୟର ଶୈକ୍ଷିକ ବ୍ୟବସ୍ଥା। ୩୯୭ ଛାତ୍ରୀଛାତ୍ର ଅଧ୍ୟୟନରତ ଉକ୍ତ ବିଦ୍ୟାଳୟରେ ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ୨ ଲେଖାଏ ସେକ୍ସନ ହିସାବରେ ମୋଟ ୧୦ ସେକ୍ସନ ରହିଥିବା ବେଳେ ବିଦ୍ୟାଳୟରେ ସମୁଦାୟ ୭ ଶିକ୍ଷୟିତ୍ରୀ ଶିକ୍ଷକ ରହିଛନ୍ତି। ଫଳରେ ପ୍ରତି ପିରିୟଡରେ ତିନୋଟି ସେକ୍ସନରେ ଅଧ୍ୟାପନାକାରୀଙ୍କ ଅଭାବ ରହୁଛି। ଅନ୍ୟପକ୍ଷରେ ବିଦ୍ୟାଳୟରେ ସ୍ଥାୟୀ ଅଧ୍ୟକ୍ଷ ନ ଥିବା ବେଳେ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ଜୀବ ବିଜ୍ଞାନ, ଇଂଲିଶ, ଗଣିତ ବିଷୟ ପାଇଁ ପୋଷ୍ଟ ଗ୍ରାଜୁଏଟ ଟିଚରଙ୍କ ଅଭାବ ସାଙ୍ଗକୁ କମ୍ପ୍ୟୁଟର, ମ୍ୟୁଜିକ୍, ଆର୍ଟ ଟିଚର ଓ କିରାଣି ପଦବୀ ମଧ୍ୟ ଖାଲିପଡିଛି। ଅନ୍ୟପକ୍ଷରେ ବିଦ୍ୟାଳୟଟି ସ୍ମାର୍ଟ ସ୍କୁଲ ଭାବେ ଉଦ୍ଘାଟିତ ହୋଇଯାଇଥିଲେ ହେଁ ଅନେକ କାମ ଅଧାପନ୍ତରିଆ ରହିଛି। ଏପରି କି ବିଦ୍ୟାଳୟର ଫଳକରେ ନାମ ଲେଖାଯାଇପାରିନି କି ମୁଖ୍ୟ ଗେଟ୍ କାମ ଅସମ୍ପୂର୍ଣ୍ଣ ରହିଥିବାରୁ ବିଭିନ୍ନ ମହଲରେ ସମାଲୋଚିତ ହେଉଥିବା ଜଣାପଡ଼ିଛି। ତେଣୁ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି।