ବୁଗୁଡ଼ା,୧ା୫(ଡି.ଏନ.ଏ.)-ବୁଗୁଡ଼ା ଏନ୍ଏସିରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ପଞ୍ଚାୟତ ସ୍ତରରେ ମଧ୍ୟ ବହୁ ଆକ୍ରାନ୍ତ ଚିହ୍ନଟ ହୋଇଛନ୍ତି l ସରକାରୀ ଭାବେ କୋଭିଡ୍ରେ କୌଣସି ମୃତ୍ୟୁ ହୋଇ ନ ଥିବା କୁହାଯାଉଥିଲେ ମଧ୍ୟ ଶନିବାର ସୁଦ୍ଧା ୩ ଜଣଙ୍କ ମୃତ୍ୟୁ ଘଟିଲାଣି l ବୁଗୁଡ଼ା ବ୍ଲକକୁ ବର୍ତ୍ତମାନ ସୁଦ୍ଧା ୮୨୫ ଜଣ ପ୍ରବାସୀ ଫେରିଥିବା ବେଳେ ସେଥିରୁ ପଶ୍ଚିମବଙ୍ଗ ଫେରନ୍ତା ୨୧ ଥିବା ବ୍ଲକ ସୂତ୍ରରୁ ଜଣାପଡିଛି। ବ୍ଲକର ତିନୋଟି ସ୍ଥାନରେ କୋଭିଡ୍ କେୟାର ସେଣ୍ଟର ପାଇଁ ପ୍ରସ୍ତାବ ରହିଥିବା ବେଳେ ଗୋଲିଆ ଆଦର୍ଶ ବିଦ୍ୟାଳୟରେ ୩୦ ଅକ୍ସିଜେନ ଶଯ୍ୟା ସହ ମୋଟ ଶହେ ଶଯ୍ୟା ବିଶିଷ୍ଟ ଜିଲା କୋଭିଡ୍ ହେଲ୍ଥ ସେଣ୍ଟର ପ୍ରତିଷ୍ଠା ପାଇଁ ଘୋଷଣା ହୋଇଛି l ହସ୍ପିଟାଲରେ ୬ ଡାକ୍ତର, ୧୦ ଏଏନ୍ଏମ୍, ୫ ଫାର୍ମାସିଷ୍ଟ, ୫ ସାନେଟାରି କର୍ମଚାରୀ ଓ ୧୦ ଜଣ ସୁରକ୍ଷା କର୍ମୀ ନିଯୁକ୍ତି ହେବେ। ଏଥିପାଇଁ ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ସବୁ ବ୍ୟବସ୍ଥା ହେବାକୁ ଥିବାବେଳେ ଗୋଲିଆସ୍ଥିତ ଆଦର୍ଶ ବିଦ୍ୟାଳୟକୁ ଚିହ୍ନଟ କରାଯାଇ ସେଠାରେ ବିଦ୍ୟୁତ୍, ପାଣି, ଶୌଚାଳୟ ସଜଡା ଯାଇଥିବା ବେଳେ କିଛି ପରିମାଣରେ ବେଡ୍ ପହଞ୍ଚି ସାରିଥିଲେ ମଧ୍ୟ ଆହୁରି ବେଡ୍ ସହ ଅକ୍ସିଜେନ ଆସିବାକୁ ବାକି ରହିଛି। ଏନେଇ ବିଡିଓ ତନ୍ମୟ ପାତ୍ରଙ୍କୁ ପଚାରିବାରେ ଯୁଦ୍ଧକାଳୀନଭିତ୍ତିରେ କାର୍ଯ୍ୟ ଚାଲିଛି ଏବଂ ଶୀଘ୍ର ଏହି ହସ୍ପିଟାଲ କାର୍ଯ୍ୟକ୍ଷମ ହେବ ବୋଲି କହିଛନ୍ତି।