ନୂଆଦିଲ୍ଲୀ,୨୪।୫: କ୍ରିକେଟ ପ୍ରେମୀଙ୍କ ପାଇଁ ଖୁସି ଖବର। ଆସନ୍ତା ୨୦୨୮ ଅଲମ୍ପିକ୍ରେ କ୍ରିକେଟ ଖେଳକୁ ସାମିଲ କରିବା ଲାଗି ଉଦ୍ୟମ ଆରମ୍ଭ ହୋଇଛି। ଲସ୍ ଏଞ୍ଜେଲସ୍ରେ ହେବାକୁ ଥିବା ଏହି ଅଲମ୍ପିକ୍ରେ କ୍ରିକେଟ ଖେଳ ସାମିଲ ହେଲେ ଭାରତୀୟ ଦର୍ଶକଙ୍କ ସଂଖ୍ୟା ବୃଦ୍ଧି ଘଟିବାର ସମ୍ଭାବନା ରହିଥିବା ଆଇସିସି ପକ୍ଷରୁ ଆଶା ପ୍ରକଟ କରାଯାଇଛି। କ୍ରିକେଟ ଖେଳକୁ ଅଧିକ ଗୁରୁତ୍ୱ ଦିଆଯାଉଥିବାରୁ ଅଲମ୍ପିକ୍ରେ ଏହା ସାମିଲ ହେଲେ ଅଧିକ ଟିକଟ ବିକ୍ରି ହେବ। ଆଇସିସି ଅନୁସାରେ ୨୦୧୯ରେ ହୋଇଥିବା ଏକ ଦିବସୀୟ ଓ୍ବାଲର୍ଡ କପ୍ ମ୍ୟାଚ୍ଗୁଡ଼ିକୁ ଭାରତରେ ୫୪ କୋଟି ୫୦ ଲକ୍ଷରୁ ଅଧିକ ଦର୍ଶକ ଦେଖିଥିଲେ। ଆଇସିସି ପକ୍ଷରୁ ଏନେଇ ଏକ ପ୍ରସ୍ତାବ ପ୍ରସ୍ତୁତ କରାଯାଇଛି। ଏହା ଆଇଏଏନ୍ଏସ୍ ପାଖରେ ରହିଥିବା କୁହାଯାଉଛି। ଅଲମ୍ପିକ୍ରେ ଦର୍ଶକ ବୃଦ୍ଧି କରାଇବା ଲକ୍ଷ୍ୟ ନେଇ ଏଭଳି ପ୍ରସ୍ତାବ ପ୍ରସ୍ତୁତି ହୋଇଥିବା ଆଇସିସି କହିଛି। ୨୦୧୯ କ୍ରିକେଟ ଓ୍ବାଲର୍ଡ କପ୍ ଭିଡ଼ିଓକୁ ୪୬୦ କୋଟି ଲୋକ ଦେଖିଥିବାବେଳେ ୟୁଟ୍ୟୁବ୍ରେ ଏହାକୁ ୩ କୋଟି ୧୦ ଲକ୍ଷ ୟୁଜର ଦେଖିଥିଲେ। ଆଇସିସି ପକ୍ଷରୁ କ୍ରିକେଟ ଓ୍ବାଲର୍ଡ କପ୍ ଭିଡ଼ିଓକୁ ୨୦୧୬ ରିଓ ଅଲମ୍ପିକ୍ ସହିତ ତୁଳନା କରାଯାଇଛି। ରିଓ ଅଲମ୍ପିକ୍ ଭିଡ଼ିଓକୁ ଭାରତରେ ୧୯କୋଟି ୧୦ ଲକ୍ଷ ଦର୍ଶକ ଦେଖିଥିବା ଆଇସିସି କହିଛି। ଅପରପକ୍ଷରେ ୨୦୧୯ରେ ହୋଇଥିବା ଏକ ଦିବସୀୟ ଓ୍ବାଲର୍ଡ କପ୍ ମ୍ୟାଚ୍ଗୁଡ଼ିକୁ ୫୪ କୋଟି ୫୦ ଲକ୍ଷରୁ ଅଧିକ ଭାରତୀୟ ଦର୍ଶକ ଦେଖିଥିବା ଆଇସିସି ପ୍ରସ୍ତାବରେ ଉଲ୍ଲେଖ କରାଯାଇଛି।