ନୂଆଦିଲ୍ଲୀ,୧୫।୯: ଦେଶରେ କରୋନା ମହାମାରୀ ସଂକ୍ରମଣର ଦ୍ୱିତୀୟ ଲହର ପରେ ଏବେ ତୃତୀୟ ଲହର ନେଇ ଲୋକେ ଆତଙ୍କିତ ହେବାରେ ଲାଗିଛନ୍ତି। ସଂକ୍ରମଣକୁ ରୋକିବା ପାଇଁ ସାରା ଦେଶରେ ସାର୍ବଜନୀକ ଟିକାକରଣ ଅଭିଯାନ ଜାରି ରହିଛି। ବର୍ତ୍ତମାନ ପର୍ଯ୍ୟନ୍ତ ଦେଶର ୭୫ କୋଟିରୁ ଅଧିକ ଲୋକଙ୍କୁ ଟିକାଦାନ କରାଯାଇ ସାରିଛି।
ତେବେ ଦିଲ୍ଲୀରୁ ଟିକାକରଣ ନେଇ ଖୁସି ଖବର ଆସିଛି। ଆସନ୍ତା ଦୁଇ ମାସ ମଧ୍ୟରେ ଦେଶର ଶତ ପ୍ରତିଶତ ବୟସ୍କଙ୍କୁ କରୋନା ଟିକାର ପ୍ରଥମ ଡୋଜ ଦିଆଯିବାର ସମ୍ଭାବନା ରହିଛି। ଟିକାକରଣର ଏହି ଲକ୍ଷ୍ୟ ପୂରଣ କରିବା ପରେ, ଭାରତ ପୃଥିବୀର ଶତ ପ୍ରତିଶତ ଟିକାକରଣ ଦେଶର ମାନ୍ୟତା ହାସଲ କରିପାରିବ ବୋଲି କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ସ୍ବାସ୍ଥ୍ୟ ମନ୍ତ୍ରଣାଳୟର ରିପୋର୍ଟ ଅନୁଯାୟୀ ଦେଶର ମୋଟ ବୟସ୍କଙ୍କ ଜନସଂଖ୍ୟା ୯୪ କୋଟି ରହିଛି। ସେଥି ମଧ୍ୟରୁ ୫୭ କୋଟିରୁ ଅଧିକ ଲୋକଙ୍କୁ ଟିକା ଦିଆ ସରିଛି। ସେପ୍ଟେମ୍ବର ଶେଷ ସୁଦ୍ଧା ଏହି ସଂଖ୍ୟା ୬୦ ରୁ ୬୨ କୋଟି ଅତିକ୍ରମ କରିବାର ଆଶା ରହିଛି। ଆସନ୍ତା ଅକ୍ଟୋବର ବେଳକୁ ୮୦ କୋଟିରୁ ଅଧିକ ବୟସ୍କଙ୍କୁ ପ୍ରଥମ ଡୋଜ୍ ଦିଆ ଯାଇ ସାରିଥିବ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ କହିଛନ୍ତି। ନଭେମ୍ବର ବେଳକୁ ଏହା ଶତ ପ୍ରତିଶତରେ ପହଞ୍ଚିବାର ଆଶା ରହିଛି।
ଟିକାର ସୀମିତ ଉତ୍ପାଦନ ହେତୁ ଏହା ସମସ୍ତଙ୍କ ପାଇଁ ଉପଲବ୍ଧ ନ ଥିଲା। କିନ୍ତୁ ଏବେ ଟିକା ଉତ୍ପାଦନ ଦ୍ରୁତ ଗତିରେ ଜାରି ରହିଛି। ରାଜ୍ୟମାନଙ୍କୁ ପର୍ଯ୍ୟାପ୍ତ ପରିମାଣର ଡୋଜ୍ ଯୋଗାଇ ଦିଆଯାଉଛି। ଗୁଜୁରାଟରେ ଉତ୍ପାଦନ ଆରମ୍ଭ ହେବା ପରେ ଦେଶରେ କୋଭାକ୍ସିନ ଯୋଗାଣରେ ସୁଧାର ଆସିଛି।
