କାନ୍ବେରା: ସୋସିଆଲ ମିଡିଆ ହେଉ ଅବା ଇଣ୍ଟରନେଟ୍ ଅନେକଙ୍କୁ ଗୋଟିଏ ଡୋରିରେ ବାନ୍ଧି ରଖିଛି ଏହି ଅତ୍ୟାଧୁନୀକ ନେଟ୍ଓ୍ବାର୍କିଂ ସେବା। ବହୁଳ ବ୍ୟବହୃତ ଏହି ସୁବିଧା କିଛି କ୍ଷେତ୍ରରେ ନକାରାତ୍ମକ ପରିଣତି ଦେଉଥିବାବେଳେ ଅନେକଙ୍କ ଜୀବନରେ ଖୁସି ଭରିଛି। ୨୫ ବର୍ଷ ପରେ ନିଜ ଜହିଲା ପୁଅକୁ ଫେରିପାଇଛନ୍ତି ମଧ୍ୟପ୍ରଦେଶ ଖଣ୍ଡଓ୍ବାର କମଳା। ପୁଅକୁ ଭେଟିବା ପରେ କମଳାଙ୍କ ଖୁସି କହିଲେ ନ ସରେ। ଅଷ୍ଟ୍ରେଲିଆର ଜଣେ ସଫଳ ବ୍ୟବସାୟୀ ହେଉଛନ୍ତି ସରୁ ବ୍ରିଅରଲି। ଗୁଗଲ ଆର୍ଥ ସାହାଯ୍ୟରେ ଏବେ ସରୁ ଭାରତରେ ଥିବା ତାଙ୍କ ପରିବାର ନିକଟକୁ ଫେରିଛନ୍ତି।
ଥିଲା ସରୁ, ବଡ଼ ଭାଇଙ୍କ ସହ ଟ୍ରେନ୍ରେ ଗୋଟିଏ ବଗିରୁ ଆଉ ଗୋଟିଏ ବଗି ବୁଲି ଭିକ୍ଷାବୃତ୍ତି କରୁଥିଲେ। କେବେ କେମିତି ଗୋଟିଏ ଦିନ ପେଟପୁରା ଖାଇବା ମିଳିଯାଉଥିଲା ତ ବାକି ଦିନ ସରୁଙ୍କ ଉପାସରେ କଟୁଥିଲା। ଏମିତି ଦିନେ ଟ୍ରେନ୍ରେ ବୁଲୁବୁଲୁ ସରୁଙ୍କୁ ନିଦ ହୋଇଯାଇଥିଲା। ପାଖାପାଖି ୧୦ ଘଣ୍ଟା ପରେ ତାଙ୍କ ନିଦ ଦେଖିଲାବେଳେକୁ ସେ ଏକ ଅଜଣା ଜାଗାରେ ପହଞ୍ଚିଯାଇଛନ୍ତି। ମା’ଙ୍କ ପାଖକୁ ଫେରିବା ଲାଗି ଯେତେଚେଷ୍ଟା କରିଥିଲେ ବି ସେ ଫେରିପାରି ନ ଥିଲେ। ସରୁଙ୍କୁ ଏକୁଟିଆ ପାଇ ଜଣେ ବ୍ୟକ୍ତି ତାଙ୍କୁ ବକ୍ରି କରି ଦେଇଥିଲେ। ପରେ ସେ ଏକ ଅର୍ଫାନ୍ ହୋମ୍ରେ ଆଶ୍ରୟ ନେଇଥିଲେ। ସେଠାରୁ ତାଙ୍କୁ ଜଣେ ଅଷ୍ଟ୍ରେଲୀୟ ନାଗରୀକ ପୋଷ୍ୟ ସନ୍ତାନ ଭାବେ ଗ୍ରହଣ କରି ବିଦେଶ ନେଇଯାଇଥିଲେ। ସରୁ କିନ୍ତୁ ପିଲା ଦିନର କଥା ଓ ନିଜ ପରବାର ଲୋକଙ୍କୁ ଭୁଲିପାରି ନ ଥିଲେ। ସେ ନିଜପ୍ରୀୟଜନମାନଙ୍କ ନିକଟକୁ ଫେରିବାକୁ ସବୁବେଳେ ଚାହୁଁଥିଲେ। ଗଣେଶ ତଲାଇ ଫେସ୍ବୁକ୍ ଗ୍ରୁପ୍ରେ ସେ ଆଡ୍ ହେଲେ। ଏହାପରେ ଖଣ୍ଡଓ୍ବା ରେଳଷ୍ଟେଶନ୍କୁ ଗଗୁଲ ଆର୍ଥ ଜରିଆରେ ଖୋଜିବା ଆରମ୍ଭ କରିଦେଲେ। ନିଜ ଗାଁର ନାଁ ମନେ ନ ଥିବାବେଳେ ଏହି ଆପ୍ ତାଙ୍କୁ ବହୁତ ସାହାଯ୍ୟ କରିଥିଲା। ପିଲାଦିନର ସ୍ମୃତିକୁ ସେ ଏହି ଆପ୍ରେ ଖୋଜିବାକୁ ଲାଗିଲେ। ବହୁ ଖୋଜାଖୋଜି ପରେ ସରୁ ନିଜ ଘର ଠିକଣା ପାଇଲେ। ଏହାପରେ ସେ ଅଷ୍ଟ୍ରେଲିଆରୁ ଆସି ନିଜ ଜନ୍ମକଲା ମା’ କମଳାଙ୍କ ନିକଟରେ ପହଞ୍ଚିଛନ୍ତି। ପ୍ରିୟଜନଙ୍କୁ ପାଇ ସେ ବେଶ୍ ଖୁସି ଥିବା କହିଛନ୍ତି। ତେବେ ନିଜ ଜୀବନୀକୁ ନେଇ ସରୁ ଆଗାମୀ ଦିନରେ ଏକ ଫିଲ୍ମ ତିଆରି କରିବାର ଯୋଜନା ରଖିଛନ୍ତି। ଏହି ଅବସରରେ କମଳା କହିଛନ୍ତି, ଦିନେ ସାନ ପୁଅ ସରୁ ଘରକୁ ଫେରିବ ବୋଲି ତାଙ୍କ ଆଶା ମଉଳି ନ ଥିଲା।
