ଓ୍ବାଶିଂଟନ,୨୩।୩ : ଗୁଗଲର ୧୨ ହଜାର କର୍ମଚାରୀଙ୍କ ଛଟେଇ ଘୋଷଣା କରେ ପ୍ୟାରେଣ୍ଟ କମ୍ପାନୀ ଆଲଫାବେଟ ଇଙ୍କର ପ୍ରାୟ ୧୪୦୦ କର୍ମଚାରୀ ଏକ ଖୋଲା ଚିଠିରେ ଦସ୍ତଖତ କରିଛନ୍ତି। ଛଟେଇ ପ୍ରକ୍ରିୟା ନେଇ ପୁଣି ଚିନ୍ତା କରିବାକୁ ଆହ୍ବାନ ଦେଇଛି। ବ୍ଲୁମବର୍ଗ ରିପୋର୍ଟ ଅନୁଯାୟୀ, ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ସୁନ୍ଦର ପିଚାଇଙ୍କୁ ସେମାନେ ଏହି ଚିଠି ପ୍ରଦାନ କରିଛନ୍ତି। ଚିଠିରେ କର୍ମଚାରୀମାନେ କମ୍ପାନୀ ସମ୍ମୁଖରେକେତେକ ଦାବି ଉପସ୍ଥାପନ କରିଛନ୍ତି। ଏଥିମଧ୍ୟରେ ନୂତନ ନିଯୁକ୍ତି ଉପରେ ରୋକ, ବାଧ୍ୟତାମୂଳକ ପୂର୍ବରୁ ସ୍ବେଚ୍ଛାକୃତ ଇସ୍ତଫା ଆବଶ୍ୟକ ଦାବି, ନୂତନ ନିଯୁକ୍ତି ପାଇଁ ଛଟେଇ ସହ ଜଡିତ କର୍ମଚାରୀଙ୍କୁ ପ୍ରାଥମିକତା ଦେବା ଏବଂ ସବୈତନିକ ଛୁଟି (ଯେପରିକି ପିତାମାତା ଏବଂ ଶୋକସନ୍ତପ୍ତ ଛୁଟି) ଏକ ନିର୍ଦ୍ଦିଷ୍ଟ ସମୟ ପାଇଁ ଜାରି ରଖିବାକୁ ଅନୁମତି ଦେବାକୁ ଦାବି କରାଯାଇଛି।
କର୍ମଚାରୀମାନେ ମାନବିକ ସଙ୍କଟ ଥିବା ଦେଶ (ବିଶେଷକରି ୟୁକ୍ରେନ)ର କର୍ମଚାରୀମାନଙ୍କୁ ଛଟେଇ ନ କରିବାକୁ ମଧ୍ୟ ଆଲଫାବେଟକୁ କହିଛନ୍ତି। ଏହା ସହିତ, ଚାକିରୀ ହରାଇବା ବିପଦରେ ଥିବା କର୍ମଚାରୀଙ୍କୁ ଭିଜା ସହ ଜଡିତ ଆବାସିକ ଅତିରିକ୍ତ ସହାୟତା ପ୍ରଦାନ କରିବା ଉପରେ ଗୁରୁତ୍ୱାରୋପ କରାଯାଇଛି। ଚିଠିରେ ଦର୍ଶାଯାଇଛି, କର୍ମଚାରୀ ହ୍ରାସ କରିବା ପାଇଁ ଆଲଫାବେଟର ନିଷ୍ପତ୍ତିର ପ୍ରଭାବ ବୀଶ୍ୱସ୍ତରୀୟ ଅଟେ। କୌଣସି ସ୍ଥାନରେ କର୍ମଚାରୀଙ୍କ ଅବସ୍ଥାର ଯଥେଷ୍ଟ ବିଚାର କରାଯାଉ ନାହିଁ । ଜାନୁଆରୀ ମାସରେ, ମହାମାରୀ ପରେ ମାନ୍ଦାବସ୍ଥାକୁ ଦୃଷ୍ଟିରେ ରଖି ଖର୍ଚ୍ଚ ହ୍ରାସ କରିବାକୁ ନିବେଶକଙ୍କ ଚାପ ପରେ ଆଲଫାବେଟ ଏହାର ପ୍ରାୟ ୬ ପ୍ରତିଶତ କର୍ମଚାରୀ ହ୍ରାସ କରିବାକୁ ଘୋଷଣା କରିଥିଲା।