ନୂଆଦିଲ୍ଲୀ,୧୯।୯ – ବିଶ୍ୱର ସର୍ବବୃହତ୍ ଇଣ୍ଟରନେଟ୍ ସର୍ଚ୍ଚ ଇଞ୍ଜିନ ଗୁଗଲ ବିରୋଧରେ ନାନା ଅଭିଯୋଗ ଆସିବା ପରେ ଏହାର ଗୁରୁତ୍ୱକୁ ନଜରରେ ରଖି କମ୍ପିଟେଶନ କମିସନ ଅଫ୍ ଇଣ୍ଡିଆ (ସିସିଆଇ) ୨୦୧୯ ଏପ୍ରିଲରେ ଗୁଗଲର ବେଆଇନ କାର୍ଯ୍ୟକଳାପ ଓ ବ୍ୟବସାୟ ଉପରେ ଯାଞ୍ଚ ଆଦେଶ ଦେଇଥିଲା। ଦୀର୍ଘ ୨ ବର୍ଷ ଧରି ସିସିଆଇ ଗୁଗଲର ବିଭିନ୍ନ ଘଟଣା ସମ୍ପର୍କରେ ତଦନ୍ତ କରିବା ପରେ ଏହି ରିପୋର୍ଟ ଦେଇଥିଲା। ହେଲେ ଏହି ଆମେରିକୀୟ ଟେକ୍ନୋଲଜି ଓ ସର୍ଚ୍ଚ ଇଞ୍ଜିନ କମ୍ପାନୀ ବଜାର ପ୍ରତିଯୋଗିତା ବିରୋଧୀ ଓ ନିଷିଦ୍ଧ ବାଣିଜ୍ୟ ପଦ୍ଧତି ଅବଲମ୍ବନ କରୁଥିବା କମ୍ପାନୀ ପକ୍ଷରୁ କୁହାଯାଇଛି।
ତଦନ୍ତରେ ଗୁଗଲଙ୍କ ବିରୋଧରେ କମ୍ପିଟେଶନ ଓ ଇନୋଭେଶନକୁ ପ୍ରଭାବିତ କରୁଥିବା ନେଇ ଅଭିଯୋଗ ହୋଇଛି। ଏହା କେବଳ ବଜାର ନୁହେଁ ଉପଭୋକ୍ତାଙ୍କ ଲାଗି ମଧ୍ୟ କ୍ଷତିକାରକ ବୋଲି ସିସିଆଇ ତା’ର ରିପୋର୍ଟରେ ଉଲ୍ଲେଖ କରିଛି। ବଜାରରେ ନିଜର ଗୁରୁତ୍ୱ ବହନ କରୁଥିବା ଗୁଗଲ ଏପରି କରୁଥିବା ସିସିଆଇର ତଦନ୍ତକାରୀ ଟିମ୍ ୭୫୦ ପୃଷ୍ଠାର ରିପୋର୍ଟରେ ସବିଶେଷ ସୂଚନା ସୂଚିତ କରିଛି। ଏଥିରେ ଗୁଗଲ ମୋବାଇଲ ନିର୍ମାଣ କରୁଥିବା କମ୍ପାନୀଙ୍କ ସମେତ ଆପ୍ ପ୍ରସ୍ତୁତ କରୁଥିବା କମ୍ପାନୀଙ୍କୁ ଏକତରଫା କଣ୍ଟ୍ରାକ୍ଟ ଲାଗି ବାଧ୍ୟ କରୁଥିବା କୁହାଯାଇଛି।
ସିସିଆଇର ଉକ୍ତ ରିପୋର୍ଟରେ ଗୁଗଲ ବିରୋଧରେ ସେକ୍ସନ ୪-୨,ଏ,ଆଇ ସହ ସେକ୍ସନ ୪-୨,ସି ଓ ସେକ୍ସନ ୪-୨,ଡି ଏବଂ ସେକ୍ସନ ୪-୨,ଇ ରେ ଥିବା ବ୍ୟବସ୍ଥା ଉଲ୍ଲଂଘନର ଦୋଷୀ ବୋଲି ଦର୍ଶାଯାଇଛି। ତଦନ୍ତକାରୀ ଟିମ୍ ରିପୋର୍ଟକୁ ସିସିଆଇଙ୍କୁ ପଠାଇ ଦେଇଛନ୍ତି। ବିଚାରରେ ଯଦି ଗୁଗଲ ସିସିଆଇଙ୍କ ନିକଟରେ ଦୋଷୀ ସାବ୍ୟସ୍ତ ହୁଅନ୍ତି, ତେବେ ଗୁଗଲଙ୍କୁ ଜରିମାନା କରାଯିବା ସହ ବ୍ୟବସାୟିକ ନୀତିନିୟମ ବଦଳାଇବା କୁହାଯାଇପାରେ। କେବଳ ଭାରତରେ ନୁହେଁ ଆମେରିକା, ୟୁରୋପ, ଜର୍ମାନୀ ଓ ଜାପାନ ଆଦି ଦେଶରେ ମଧ୍ୟ ଗୁଗଲ ସମାନ ଅଭିଯୋଗର ସମ୍ମୁଖୀନ ହୋଇଛି।
ଅପରେଟିଂ ସିଷ୍ଟମ (ଓଏସ୍) ଓ ଏ ସମ୍ପର୍କିତ ବଜାରରେ ନିଜର ଆଧିପତ୍ୟ ବିସ୍ତାର କରିଥିବା ଗୁଗଲ ବଜାରରେ ଅନୁଚିତ ବ୍ୟବସାୟ କରୁଛି। ମୋବାଇଲ ଫୋନ ଓଏସ୍ ବଜାରରେ ଗୁଗଲର ଅତ୍ୟାଧୁନିକ ଆଣ୍ଡ୍ରଏଡ୍ର ଗୁରୁତ୍ୱ ରହିଛି। ଫଳରେ ଏହି ବଜାରର ୯୮% ଅଂଶ ଗୁଗଲ ନିୟନ୍ତ୍ରଣାଧୀନରେ ରହିଛି। ଏଥିରେ ଅନେକ ଦେଶୀୟ ଓ ବିଦେଶୀ କମ୍ପାନୀ ଯେପରି ଆପଲ, ମାଇକ୍ରୋସଫ୍ଟ, ଆମାଜନ, ପେଟିଏମ୍, ଫୋନ ପେ, ମୋଜିଲା, ସାମ୍ସଙ୍ଗ, ସାଓମୀ, ଭିଭୋ, ଓପୋ ଓ କାର୍ବନ ଆଦି କମ୍ପାନୀ ଗୁଗଲର ଉତ୍ପାଦ ଉପଯୋଗ କରୁଛନ୍ତି ବୋଲି ଜଣାପଡ଼ିଛି।