ବେଙ୍ଗାଲୁରୁ,୩।୬: ଭାରତର ସବୁଠୁ ଖରାପ ଭାଷା ଲେଖି ଗୁଗଲରେ ସର୍ଚ୍ଚ କଲେ ଉତ୍ତର ଆସୁଥିଲା କନ୍ନଡ଼। ଏ ନେଇ ମୁଣ୍ଡ ଟେକିଛି ବିବାଦ। ବିଶ୍ୱର ଲୋକପ୍ରିୟ ସର୍ଚ୍ଚ ଇଞ୍ଜିନ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି କର୍ନାଟକ ସରକାରଙ୍କ ପକ୍ଷରୁ କୁହାଯାଇଛି।
ପୂର୍ବତନ ମୁଖ୍ୟମନ୍ତ୍ରୀ ଏଚଡି କୁମାରସ୍ବାମୀଙ୍କ ସମେତ ରାଜ୍ୟର ବିଭିନ୍ନ ଦଳର ରାଜନେତା ଓ ବ୍ୟକ୍ତିବିଶେଷ ଗୁଗଲକୁ ସମାଲୋଚନା କରିବା ପରେ ତୃଟି ପାଇଁ କ୍ଷମାପ୍ରାର୍ଥନା କରିଛି ବିଶ୍ୱର ବୃହତ୍ ସର୍ଚ୍ଚ ଇଞ୍ଜିନ।
କର୍ନାଟକର ଭାଷା, ପରମ୍ପରା ଓ ଜଙ୍ଗଲ ବିଭାଗ ମନ୍ତ୍ରୀ ଅରବିନ୍ଦ ଲିମ୍ବାଭଲି ଟୁଇଟରରେ ଲେଖିଛନ୍ତି, “କନ୍ନଡ଼ ଭାଷାଭାଷୀଙ୍କୁ ଅପମାନିତ କରିବା ପାଇଁ ଏହା ଗୁଗଲର ଉଦ୍ୟମ। ମୁଁ ଗୁଗଲଠାରୁ କ୍ଷମାପ୍ରାର୍ଥନା ଦାବି କରୁଛି। ଆମ ଭାଷାର ଛବି ଖରାପ କରିବା ଲାଗି ଗୁଗଲ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ”।
ଏ ସମ୍ପର୍କରେ ଗୁଗଲ ପ୍ରବକ୍ତା କହିଛନ୍ତି, ସର୍ଚ୍ଚ ଇଞ୍ଜିନ ସର୍ବଦା ସଠିକ୍ ଉତ୍ତର ଦିଏନାହିଁ। ନିର୍ଦ୍ଦିଷ୍ଟ ପ୍ରଶ୍ନର ଫଳାଫଳ ଆଶ୍ଚର୍ଯ୍ୟଜନକ ହୋଇପାରେ। ଆମେ ଜାଣିଛୁ ଏହା ଉଚିତ ନୁହେଁ। ଏହାକୁ ଆମେ ସଂଶୋଧନ କରିବୁ। ସାଧାରଣତଃ, ପ୍ରଶ୍ନର ଉତ୍ତରରେ ଗୁଗଲ ନିଜସ୍ବ ମନ୍ତବ୍ୟ ଦିଏନାହିଁ। ଭୁଲ ବୁଝାମଣା ଓ କନ୍ନଡ଼ ଭାଷାଭାଷୀଙ୍କ ଭାବନାକୁ ଆଘାତ ଦେଇଥିବାରୁ କ୍ଷମାପ୍ରାର୍ଥନା କରୁଛୁ।