ନୂଆଦିଲ୍ଲୀ,୧୪।୭: ସର୍ଚ୍ଚ ଇଞ୍ଜିନ ଗୁଗଲ ଆଗାମୀ ୫ରୁ ୭ ବର୍ଷରେ ଭାରତ ବଜାରରେ ୭୫ ହଜାର କୋଟି ଟଙ୍କା ନିବେଶ କରିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଗୁଗଲ ଏବଂ ଆଲ୍ଫାବେଟ୍ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ସୁନ୍ଦର ପିଚାଇ ସୋମବାର ଆଲୋଚନା କରିବା ପରେ ଏହା ସ୍ପଷ୍ଟ କରିଛନ୍ତି। ଏହି ଅବସରରେ ମୋଦି ବିଶ୍ୱ ମହାମାରୀ ପାଇଁ ଉପୁଜିଥିବା ବିଭିନ୍ନ ଚ୍ୟାଲେଞ୍ଜ ଏବଂ ନୂଆ କାର୍ଯ୍ୟ ସଂସ୍କୃତି ସମ୍ପର୍କରେ ପିଚାଇଙ୍କ ସହ ଆଲୋଚନା କରିଛନ୍ତି।
ପ୍ରଧାନମନ୍ତ୍ରୀ ମୋଦିଙ୍କ ସହ ସିଇଓ ପିଚାଇ ଆଲୋଚନା ସାରିବା ପରେ ‘ଗୁଗଲ ଫର୍ ଇଣ୍ଡିଆ’ ଭର୍ଚୁଆଲ କନଫରେନ୍ସର ୬ଷ୍ଠ ସଂସ୍କରଣରେ ଅଭିଭାଷଣ ରଖିଛନ୍ତି। ଏହି ଅବସରରେ ସେ ଭାରତ ବଜାର ଲାଗି ବିସ୍ତୃତ ଯୋଜନା ସମ୍ପର୍କରେ ଘୋଷଣା କରିଥିଲେ। କମ୍ପାନୀ ଘରୋଇ ବଜାର ଲାଗି ଏକ ଡିଜିଟାଇଜେଶନ ଫଣ୍ଡ ସ୍ଥାପନ କରିଛି। ଏହାଦ୍ୱାରା୧୦ ବିଲିୟନ ଡଲାର( ପ୍ରାୟ ୭୫ ହଜାର କୋଟି) ଟଙ୍କା ଆଗାମୀ ୫ରୁ ୭ ବର୍ଷ ମଧ୍ୟରେ ନିବେଶ ଯୋଜନା ରଖାଯାଇଛି ବୋଲି ପିଚାଇ ସ୍ପଷ୍ଟ କରିଛନ୍ତି। ଏହି ନିବେଶ ଇକ୍ୱିଟି, ସହଭାଗିତା, ପରିଚାଳନା, ଭିତ୍ତିଭୂମି ତଥା ଇକୋସିଷ୍ଟମ ବିକାଶ କ୍ଷେତ୍ରରେ ହେବ।
ଗୁଗଲର ଏହି ନିବେଶ ଯୋଜନା ଭାରତର କୃଷକ ଏବଂ ଯୁବବର୍ଗଙ୍କ ଜୀବନକୁ ପରିବର୍ତ୍ତନ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ଯୋଗଦାନ ରଖିବ ବୋଲି ମୋଦି ଟୁଇଟ ଯୋଗେ ସୂଚନା ଦେଇଛନ୍ତି। ସେ କହିଛନ୍ତି, ଶିକ୍ଷା, ଡିଜିଟାଲ ଇଣ୍ଡିଆ, ଡିଜିଟାଲ ପେମେଣ୍ଟ ଭଳି ବିଭିନ୍ନ ଦିଗରେ ଗୁଗଲ ଭାରତ ବଜାରରେ କାର୍ଯ୍ୟ କରୁଥିବାରୁ ଏହାକୁ ନେଇ ଅତ୍ୟନ୍ତ ଖୁସି। ଟୁଇଟର ଉତ୍ତରରେ ପିଚାଇ କହିଛନ୍ତି, କେନ୍ଦ୍ର ସରକାରଙ୍କ ଡିଜିଟାଲ ଇଣ୍ଡିଆ କାର୍ଯ୍ୟକ୍ରମକୁ ନେଇ ଅତ୍ୟନ୍ତ ଆଶାବାଦୀ। ଏ ଦିଗରେ କାର୍ଯ୍ୟପନ୍ଥା ଜାରି ରହିବ। ଗୁଗଲର ଫୋକସ ଏରିଆ ମଧ୍ୟରେ ଭାରତୀୟଙ୍କୁ ସେମାନଙ୍କ ନିଜସ୍ବ ଭାଷାରେ ସହଜରେ ସୂଚନା ଉପଲବ୍ଧ କରାଇବା, ଭାରତୀୟଙ୍କ ଆବଶ୍ୟକତା ଆଧାରରେ ନୂଆ ପ୍ରଡକ୍ଟ ଏବଂ ସେବା ଭିତ୍ତିଭୂମି ଗଠନ, ଡିଜିଟାଲ ସଂସ୍କାର ଦ୍ୱାରା ବାଣିଜି୍ୟକ ସଂସ୍ଥାଗୁଡିକୁ ସଶକ୍ତ କରାଇବା ସହ ଶିକ୍ଷା, ସ୍ବାସ୍ଥ୍ୟ ଏବଂ କୃଷି କ୍ଷେତ୍ରରେ ଟେକ୍ନୋଲୋଜି ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ ବ୍ୟବହାର ଦ୍ୱାରା ଘରୋଇ ବଜାରର ବିକାଶ ସାଧନ ଦିଗରେ କାର୍ଯ୍ୟକ୍ରମ ଜାରି ରହିବ ବୋଲି ପିଚାଇ ସ୍ପଷ୍ଟ କରିଛନ୍ତି।