ବ୍ରହ୍ମପୁର ଅଫିସ,୩୦।୧୧: ବିଜେଡିରୁ ବହିଷ୍କୃତ ଗୋପାଳପୁର ହ୍ୟାଟ୍ରିକ ବିଧାୟକ ପ୍ରଦୀପ ପାଣିଗ୍ରାହୀ ଏବେ ରାଜ୍ୟ ସରକାରଙ୍କୁ ଟାର୍ଗେଟ କରି ବର୍ଷିବାରେ ଲାଗିଛନ୍ତି। ନଭେମ୍ବର ୨୭ରେ ରଙ୍ଗେଇଲୁଣ୍ଡା ବ୍ଲକ ଆଲିପୁରରେ ସେ ଜନ ସମ୍ପର୍କ ପଦଯାତ୍ରା ଅବସରରେ ପ୍ରଶାସନ ଅହଂକାରୀ ହୋଇଯାଇଛି। ମନ୍ତ୍ରୀମାନେ ନାମକୁ ମାତ୍ର ଥାଇ ଅଧିକାରୀ ସବୁ ନିଷ୍ପତ୍ତି ନେଉଥିବା ଖୋଲାଖୋଲି କଟାକ୍ଷ କରିଛନ୍ତି। ମୁଖ୍ୟମନ୍ତ୍ରୀଙ୍କୁ ଘେରି ରହିଥିବା ଗୋଷ୍ଠୀ ନବୀନ ପଟ୍ଟନାୟକଙ୍କ ନିର୍ମଳ ଭାବମୂର୍ତ୍ତିକୁ ମଳିନ କରୁଥିବା କଡ଼ା ଟିପ୍ପଣି ଦେଇଛନ୍ତି। ପଦ୍ମପୁର ଉପନିର୍ବାଚନ ମୁଣ୍ଡ ଉପରେ ଥିବା ବେଳେ ବର୍ତ୍ତମାନ ସ୍ବାଧୀନ ବିଧାୟକଙ୍କ ସ୍ବାଧୀନ ମତ ରାଜନୈତିକ ଚର୍ଚ୍ଚାର ବିଷୟ ହୋଇଛି। ଡିସେମ୍ବର ୫ରେ ହେବାକୁ ଥିବା ଉପନିର୍ବାଚନରେ ପଦ୍ମପୁରରେ ପଦ୍ମ ଫୁଟିବାର ଜ୍ୟୋତିଷ ରୂପରେ ପ୍ରଦୀପ ଭବିଷ୍ୟବାଣୀ ଶୁଣାଇଛନ୍ତି।
ସୂଚନାଯୋଗ୍ୟ, ୨୦୨୦ ଡିସେମ୍ବର ପ୍ରଥମ ସପ୍ତାହରେ ଜନ ବିରୋଧୀ ଅଭିଯୋଗରେ ବିଜେଡି ତାଙ୍କୁ ଦଳରୁ ବହିଷ୍କାର କରିଥିଲା। କେବଳ ସେତିକି ନୁହେଁ, ବିଭିନ୍ନ ସଂଗୀନ ମାମଲାରେ ଛନ୍ଦି ହୋଇ ସେ ଦୀର୍ଘ ମାସ କୋର୍ଟ ହାଜତକୁ ଯିବାକୁ ପଡ଼ିଥିଲା। ସର୍ତ୍ତମୂଳକ ଜାମିନରେ ମୁକୁଳିବା ପରେ ପାଣିଗ୍ରାହୀ ନିର୍ବାଚନ ମଣ୍ଡଳୀକୁ ଆସୁନଥିଲେ। ଗତ ସ୍ବାଧୀନତା ଦିବସରେ ଅଞ୍ଚଳବାସୀଙ୍କ ଡ଼ାକରାରେ ପତାକା ଉତ୍ତୋଳନ ପାଇଁ କମଳାପୁର ଆସିଥିଲେ। ସେଠାରେ କେତେକ ନୂଆ ପୁରୁଣା ବିଜେଡି କର୍ମୀ ବିରୋଧ କରି ଅପ୍ରୀତିକର ପରିସ୍ଥିତି ସୃଷ୍ଟି କଲେ। ବିଧାୟକ ମଧ୍ୟ କଡ଼ା ଜବାବ ଦେଇଥିଲେ।
ପରବର୍ତ୍ତୀ ସମୟରେ ଆଙ୍କୁଲି, ଲୋଚାପଡ଼ା, ହୁଗୁଳାପଟା, ରଙ୍ଗେଇଲୁଣ୍ଡା ଓ ଚିକରଡ଼ା ସମେତ ବିଭିନ୍ନ ସ୍ଥାନରେ ବିଜେଡିର ପଦଯାତ୍ରାକୁ ଟକ୍କର ଦେଇ ସେ ମଧ୍ୟ ଜନ ସମ୍ପର୍କ ପଦଯାତ୍ରା ଜାରୀ ରଖିଛନ୍ତି। ଗତ ୨୭ ତାରିଖରେ ସେ ଆଲିପୁର ଠାରେ କହୁ କହୁ ଭାଜପା ସପକ୍ଷରେ ମୁହଁ ଖୋଲିବା ସହ ପଦ୍ମପୁର ଉପନିର୍ବାଚନର ଭାଜପା ପ୍ରାର୍ଥୀଙ୍କୁ ଭୋଟ ଦେବା ପାଇଁ ପଦ୍ମପୁର ନିର୍ବାଚନ ମଣ୍ଡଳୀବାସୀଙ୍କୁ ଆହ୍ବାନ ଦେଇଥିଲେ। ଏହାକୁ ନେଇ ରାଜନୈତିକ ହଇଚଇ ସୃଷ୍ଟି ହୋଇଛି । ପ୍ରଦୀପ ପଦ୍ମ ପୋଖରୀରେ ବୁଡ଼ ପକାଇବାର ସନ୍ଦେଶ ଦେଇଛନ୍ତି ବୋଲି ଲୋକେ ଆଲୋଚନା କରୁଛନ୍ତି। ଇତିମଧ୍ୟରେ ଗୋପାଳପୁର ନିର୍ବାଚନ ମଣ୍ଡଳୀରେ ପାଣିଗ୍ରାହୀଙ୍କ ସମର୍ଥକମାନେ ପ୍ରଦୀପ ସେନା ମଧ୍ୟ ଗଠନ କରିଛନ୍ତି। ସେହି ସେନାରେ ସୈନିକ ସଂଖ୍ୟା କ୍ରମଶଃ ବଢ଼ୁଥିବାରୁ ଆଗାମୀ ସାଧାରଣ ନିର୍ବାଚନରେ ସେଠାର ରାଜନୀତି ରୋଚକ ହେବାର ରାଜନୈତିକ ବିଶ୍ଲେଷକ ଅନୁମାନ କରୁଛନ୍ତି।