ଭୁବନ, ୨୩।୭(ଡି.ଏନ.ଏ.) କାନକୁ ଶୁଭୁନି, ହେଲେ ଭିଡିଓ ଦେଖି ଅବିକଳ ନାଚିପାରନ୍ତି। ଜନ୍ମରୁ ପାଟି ଫିଟୁନି ତଥାପି ଥରେ ତୂଳି ଧରିଲେ କଥାକୁହେ ତାଙ୍କ ହାତ ତିଆରି ମୂର୍ତ୍ତି ଆଉ ଚିତ୍ରକଳା। ସଂଘର୍ଷ ନ କଲେ ଜିଇବା ହୋଇଯିବ ମୁସ୍କିଲ। ଏକଥାକୁ ସେ ବୁଝିପାରିଛନ୍ତି ଛୋଟବେଳୁ। ନିଜର ଶାରୀରିକ ଭିନ୍ନକ୍ଷମତାକୁ ସଫଳତାର ଶିଡି କରି ଠାରରେ ଜୀବନ ଠିକଣା ଖୋଜିଥିବା ଏଭଳି ଜଣେ ଶିଳ୍ପୀ ହେଉଛନ୍ତି ଢେଙ୍କାନାଳ ଜିଲା ଭୁବନ ଏନ୍ଏସି ଅଧୀନ ୧୩ ନମ୍ବର ଓ୍ବାର୍ଡର ନିରଞ୍ଜନ ସାହୁ।
ଜନ୍ମରୁ ମୂକ ଆଉ ବଧିର ନିରଞ୍ଜନ। ପିଲାଟି ଦିନରୁ ବାପାଙ୍କୁ ହରାଇଛନ୍ତି। ମା’ ଆଉ ୪ ଭାଇଙ୍କୁ ନେଇ ପରିବାର। ବାପାଙ୍କ ହାତ ମୁଣ୍ଡ ଉପରୁ ଉଠିଯିବା ପରେ ଶୈଶବରୁ ହିଁ ସଂଘର୍ଷ ଆରମ୍ଭ କରିଥିଲେ ସେ। କଷ୍ଟ କରି ୧୦ମ ଯାଏ ପାଠ ମଧ୍ୟ ପଢ଼ିଛନ୍ତି। ହେଲେ ପେଟର ଭୋକ, ସକାଳ ହେଲେ ୫ ଜଣଙ୍କ ପାଇଁ ଆହାର ଯୋଗାଡ଼ କରିବା ଚିନ୍ତାରେ ତାଙ୍କ ଉଚ୍ଚଶିକ୍ଷିତ ସ୍ବପ୍ନ ଅଧୁରା ରହିଗଲା। ଛୋଟବେଳୁ ମୂର୍ତ୍ତି କାରିଗରୀ ପ୍ରତି ଥିବା ଆଗ୍ରହକୁ ପୁଞ୍ଜି କରି ଆଗକୁ ବଢ଼ିବାକୁ ସେ ଅଣ୍ଟା ଭିଡ଼ିଲେ। ପ୍ରଥମେ ବିନା ପାରିଶ୍ରମିକରେ ଖୁଦୁରୁକୁଣି, ଗଣେଶ, ସରସ୍ବତୀ ମୂର୍ତ୍ତି ନିର୍ମାଣ କଲେ, ଯାହା ତାଙ୍କୁ ଅଞ୍ଚଳବାସୀଙ୍କ ନିକଟରେ ବେଶ୍ ଲୋକପ୍ରିୟ କରିଦେଲା। ଧୀରେ ଧୀରେ ମୂର୍ତ୍ତିଗଢ଼ିବାରେ ସେ ନିପୂଣ ହୋଇଗଲେ। ଏବେ ପୂଜାପର୍ବାଣି ଆସିଲେ ପ୍ରଥମେ ଖୋଜାହୁଅନ୍ତି ନିରଞ୍ଜନ। ବିଶ୍ୱକର୍ମା, ଗଣେଶ, କାଳୀ, ଲକ୍ଷ୍ମୀ, କାର୍ତ୍ତିକେଶ୍ୱର, ସରସ୍ବତୀ ପୂଜା ସମୟରେ ତାଙ୍କୁ ତର ମିଳେନି।
ତେବେ ବ୍ୟବସାୟ ଆରମ୍ଭରେ ତାଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡୁଥିଲା। କଥା କହିପାରୁ ନ ଥିବା ଏବଂ ଶୁଣି ପାରୁ ନ ଥିବାରୁ ଲୋକମାନଙ୍କୁ ବୁଝିବା କଷ୍ଟକର ହୋଇପଡୁଥିଲା। ଗୋଟିଏ ଅନୁଷ୍ଠାନ କେଉଁ ପ୍ରକାରର ମୂର୍ତ୍ତି ଚାହୁଁଛି ତାହାକୁ ସେ ତୁରନ୍ତ ବୁଝି ପାରୁ ନ ଥିଲେ। ଏହି ସମୟରେ କଲେଜ ପଢୁଆ ସାନଭାଇ ବାପିନା ସାଜିଲେ ତାଙ୍କ ସ୍ବର। ସେ ନିରଞ୍ଜନଙ୍କୁ ଠାରରେ ସବୁକଥା ବୁଝାଇବା ସହ ମୂର୍ତ୍ତି ଗଢ଼ିବାରେ ସହାୟତା କଲେ। ଏଥିସହ ଗ୍ରାହକଙ୍କ ସହ ମୂର୍ତ୍ତି ଦର ସମ୍ପର୍କରେ ଆଲୋଚନା ମଧ୍ୟ କଲେ। ନିରଞ୍ଜନ ବାର୍ଷିକ ମୂର୍ତ୍ତି ନିର୍ମାଣ କରି ୨ଲକ୍ଷ ଟଙ୍କା ଯାଏ ରୋଜଗାର କରିପାରୁଛନ୍ତି। ସାନଭାଇ ବାପିନାଙ୍କୁ ମଣିଷ କରିବାକୁ ଭଦ୍ରକ ଆର୍ଟ କଲେଜରେ ନାମ ଲେଖାଇଛନ୍ତି। ତେବେ କରୋନା ମହାମାରୀ ଯୋଗୁ ଏବେ ନିରଞ୍ଜନ ଏବଂ ବାପିନା ଚିନ୍ତାରେ ପଡ଼ିଛନ୍ତି। ପୂଜାପର୍ବାଣି ବନ୍ଦ ସହ ମୂର୍ତ୍ତି ତିଆରି ମଧ୍ୟ ଠପ୍ ହୋଇଯାଇଛି। ନିରଞ୍ଜନଙ୍କୁ ମିଳୁଥିବା ୭୦୦ ଟଙ୍କା ଦିବ୍ୟାଙ୍ଗ ଭତ୍ତା ଏବେ ଏକମାତ୍ର ସମ୍ବଳ। ଏପରି ଘଡ଼ିସନ୍ଧି ମୁହୂର୍ତ୍ତରେ ମୂର୍ତ୍ତିକାର ପରିବାରକୁ ସହାୟତାର ହାତ ବଢ଼ାଇବାକୁ ବାପିନା ନିବେଦନ କରିଛନ୍ତି।