ନୂଆଦିଲ୍ଲୀ,୧୧ା୩: ଅଲିମ୍ପିକ୍ସ ପୂର୍ବରୁ ପୂର୍ବତନ ବିଶ୍ୱ ଚାମ୍ପିୟନ ଭାରୋତ୍ତୋଳିକା ମୀରାବାଈ ଚାନୁ ପ୍ୟାରିସ୍ରେ ଟ୍ରେନିଂ ନେବା ପ୍ରସ୍ତାବ ସରକାରଙ୍କ ଅନୁମୋଦନ ଲାଭ କରିଛି। ଟୋକିଓ ଅଲିମ୍ପିକ୍ସ ରୌପ୍ୟ ପଦକ ବିଜେତା ପୂର୍ବରୁ ସେଠିକାର ଜଳବାୟୁ ସହ ଅଭ୍ୟସ୍ତ ହେବା ସାଙ୍ଗକୁ ନିଜକୁ ପ୍ରସ୍ତୁତ କରିପାରିବେ। ସେ ୧ ମାସ ଧରି ଲା ଫର୍ଟେ-ମିଲନଠାରେ ଟ୍ରେନିଂ ନେବେ ବୋଲି କ୍ରୀଡ଼ା ମନ୍ତ୍ରଣାଳୟର ମିଶନ ଅଲିମ୍ପିକ ସେଲ୍ (ଏମ୍ଓସି) ତରଫରୁ ସୂଚନା ଦିଆଯାଇଛି। ।
୪୯ କେଜି ଶ୍ରେଣୀରେ ଭାଗନେବାକୁ ଥିବା ୨୯ ବର୍ଷୀୟା ଚାନୁଙ୍କ ସହ ୨ଜଣ କୋଚ୍ ଏବଂ ଜଣେ ଫିଜିଓଥେରାପିଷ୍ଟ ଯିବେ। ଟାର୍ଗେଟ ଅଲିମ୍ପିକ ପୋଡିୟମ ସ୍କିମ୍ ଅଧୀନରେ ସରକାର ବିମାନ ଟିକେଟ, ଭିଜା ଫି’, ରହଣି, ଖାଦ୍ୟ, ଟ୍ରେନିଂ, ସ୍ଥାନୀୟ ପରିବହନ ଓ ମେଡିକାଲ ଇନ୍ସ୍ୟୁରାନ୍ସ ବ୍ୟତୀତ ଅନ୍ୟାନ୍ୟ ଖର୍ଚ୍ଚ ବହନ କରିବେ। ଆହୁରି ମଧ୍ୟ ବିଶିଷ୍ଟ ଅଶ୍ୱାରୋହୀ ଅନୁଶ ଅଗ୍ରଓ୍ବାଲଙ୍କ ପ୍ରସ୍ତାବ ମିଶନ ଅଲିମ୍ପିକ ସେଲ୍ ଦ୍ୱାରା ଅନୁମୋଦନ ଲାଭ କରିଛି। ସେ ୮ଟି ପ୍ରତିଯୋଗିତାରେ ଭାଗନେବା ସହ ତାଙ୍କ ଘୋଡ଼ା ପାଇଁ ଆବଶ୍ୟକ ସରଞ୍ଜାମ କ୍ରୟକରିବେ। ଟପ୍ସ ଅନୁଶଙ୍କ ବ୍ୟତୀତ ତାଙ୍କ କୋଚ୍ଙ୍କ ରହଣି, ଏଣ୍ଟ୍ରି ଫି’, ୨ ଘୋଡ଼ାର ଖାଦ୍ୟ ଖର୍ଚ୍ଚ, କୋଚ୍ ଫି’ ବ୍ୟତୀତ ଅନ୍ୟାନ୍ୟ ଆନୁଷଙ୍ଗିକ ଖର୍ଚ୍ଚ ବହନ କରିବ।
ଏମ୍ଓସି ଆହୁରି ମଧ୍ୟ ଜୁଡୋକା ଅସ୍ମିତା ଦେ ଓ ଶୁଟର ଅର୍ଜୁନ ସି ଂ ଚିମାଙ୍କୁ ଆର୍ଥିକ ସହାୟତା ପ୍ରଦାନ କରିବାକୁ ରାଜି ହୋଇଛି। ଅସ୍ମିତା ଅଷ୍ଟ୍ରିଆରେ ଅନୁଷ୍ଠିତ ହେବାକୁ ଥିବା ଗ୍ରାଁ ପ୍ରିରେ ଭାଗ ନେବେ। ଅର୍ଜୁନ ସିଂ ଆଇଏସ୍ଏଏସ୍ ଡର୍ଟମୁଣ୍ଡ ପ୍ରତିଯୋଗିତାରେ ଭାଗ ନେବାକୁ ଚାହୁଁଛନ୍ତି। ଏମ୍ଓସି ଦ୍ୱାରା ଗୃହୀତ ଅନ୍ୟାନ୍ୟ ପ୍ରସ୍ତାବ ମଧ୍ୟରେ ବ୍ୟାଡ୍ମିଣ୍ଟନ ଖେଳାଳି ଚିରାଜ ଶେଟ୍ଟି ଓ ସାତ୍ତ୍ୱିକ ସାଇରାଜ ରାଙ୍କିରେଡ୍ଡୀଙ୍କ ଲାଗି ଭିଡି ଆନିଲିଷ୍ଟ ନିଯୁକ୍ତି, ଭାରୋତ୍ତୋଳକ ଜେରେମି ଲାଲରିନୁଙ୍ଗାଙ୍କ ଫିଜିଓଥେରାପିଷ୍ଟଙ୍କୁ ଚୁକ୍ତି ମିଆଦ ବୃଦ୍ଧି ଏବଂ ଟ୍ରାକ୍ ଆଥ୍ଲେଟ୍ ଆମୋଜ ଜାକବଙ୍କ ପାଇଁ ଆବଶ୍ୟକ ସରଞ୍ଜାମ କ୍ରୟ ଅନ୍ୟତମ।