ନୂଆଦିଲ୍ଲୀ,୧୮।୧୧: ଦେଶରେ ବ୍ୟାଙ୍କିଙ୍ଗ୍ କ୍ଷେତ୍ର ସମ୍ପ୍ରତି ସୁଦୃଢ଼ ହୋଇ ପାରିଛି। ୨୦୧୪ରେ ଭାଜପା ସରକାର କ୍ଷମତାକୁ ଆସିବା ପରେ ବ୍ୟାଙ୍କିଙ୍ଗ୍ କ୍ଷେତ୍ରରେ ୬-୭ ବର୍ଷ ମଧ୍ୟରେ ବହୁ ସଂଶୋଧନ ଆଣିଛନ୍ତି। ଫଳରେ ୫ ଲକ୍ଷ କୋଟିରୁ ଅଧିକ ରିକଭରି ସମ୍ଭବ ହୋଇପାରିଛି। ଅର୍ଥ ମନ୍ତ୍ରଣାଳୟର ଆର୍ଥିକ ସେବା ବିଭାଗ ପକ୍ଷରୁ ଏକ କାର୍ଯ୍ୟକ୍ରମରେ ଯୋଗଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଭଳି କହିଛନ୍ତି।
ଏହା ସହିତ ପ୍ରଧାନମନ୍ତ୍ରୀ ପୂର୍ବ ସରକାରଙ୍କୁ ଟାର୍ଗେଟ ମଧ୍ୟ କରଛନ୍ତି। ସେ କହିଛନ୍ତି ଯେ ପୂର୍ବ ସରକାରରେ କିଛି ଲୋକ ବ୍ୟାଙ୍କଗୁଡ଼ିକୁ ନିଜର ବୋଲି ଭାବିବା ଆରମ୍ଭ କରିଥିଲେ। କିନ୍ତୁ ଭାଜପା ସରକାରରେ ୫ ଲକ୍ଷ କୋଟିରୁ ଅଧିକ ଟଙ୍କା ରିକଭରି କରିବାକୁ ସକ୍ଷମ ହୋଇପାରିଛନ୍ତି। ଗତ ପାଞ୍ଚ ବର୍ଷ ମଧ୍ୟରେ ଏନପିଏ ମଧ୍ୟ ହ୍ରାସ ପାଇଛି। ସେ କହିଛନ୍ତି ଯେ ଆମେ ଏନପିଏ ସମସ୍ୟାର ସମାଧାନ ପାଇଁ ଅନେକ ଆଇନରେ ସଂସ୍କାର ଆଣାଯାଇଛି। ସେହିପରି ରିକଭରି ଟ୍ରିବ୍ୟୁନାଲକୁ ସଶକ୍ତ କରାଯାଇଛି।
ପ୍ରଧାନମନ୍ତ୍ରୀ କହିଛନ୍ତି ଯେ ବ୍ୟାଙ୍କିଙ୍ଗ କ୍ଷେତ୍ରର ଏକ ଅନୁସନ୍ଧାନ ସାମ୍ନାକୁ ଆସିଛି। ଯେଉଁଥିରେ ଜନ ଧନ ଆକାଉଣ୍ଟ ଅଧିକ ଖୋଲା ଥିବା ରାଜ୍ୟରେ ଅପରାଧ ହାର ମଧ୍ୟ ସମାନ ଭାବରେ ହ୍ରାସ ପାଇଛି। ସେ କହିଛନ୍ତି ଯେ ଆଜି ଯେତେବେଳେ ଆର୍ଥିକ ଅନ୍ତର୍ଭୂକ୍ତିକୁ ନେଇ ଦେଶରେ ଯୋଜନା ଜାରି ରହିଛି। ଏପରିସ୍ଥଳେ ନାଗରିକଙ୍କ ଉତ୍ପାଦନ କ୍ଷମତା ବୃଦ୍ଧି କରିବାକୁ ଗୁରୁତ୍ୱାରୋପ କରାଯାଉଛି। କର୍ପୋରେଟ ଏବଂ ଷ୍ଟାର୍ଟ ଅପ ସମ୍ପ୍ରତି ଅଦ୍ଭୁତ ପୂର୍ବଭାବେ ଆଗକୁ ଆସିବାରେ ଲାଗିଛି।
ଏହି କାର୍ଯ୍ୟକ୍ରମରେ ଉପସ୍ଥିତ ଥିବା ବ୍ୟାଙ୍କରମାନଙ୍କୁ ପରାମର୍ଶ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ ଭାରତର ଆକାଂକ୍ଷାକୁ ମଜବୁତ କରିବା, ପାଣ୍ଠି ଯୋଗାଇବା, ବିନିଯୋଗ କରିବା ପାଇଁ ପଦକ୍ଷେପ ଗ୍ରହଣର ଆବଶ୍ୟକତା ରହିଛି। ଭାରତରେ ବ୍ୟାଙ୍କଗୁଡ଼ିକର ଶକ୍ତି ଏତେ ବୃଦ୍ଧି ପାଇଛି । ବ୍ୟାଙ୍କଗୁଡ଼ିକ ଦେଶର ଅର୍ଥବ୍ୟବସ୍ଥାକୁ ନୂତନ ଶକ୍ତି ଦେବାରେ, ଏକ ବଡ଼ ଧରଣର ଅଗ୍ରଗତି କରିବାରେ ତଥା ଭାରତକୁ ଆତ୍ମନିର୍ଭରଶୀଳ କରିବାରେ ଏକ ବଡ଼ ଭୂମିକା ଗ୍ରହଣ କରିପାରିବେ ବୋଲି ପ୍ରଧାନମନ୍ତ୍ରୀ କହିଛନ୍ତି।