କେପ୍ ଟାଉନ,୧୫।୧୦(ଏପି): ଦକ୍ଷିଣ ଆଫ୍ରିକା କ୍ରିକେଟ ଏବେ ବାସନ୍ଦଜନିତ ବିପଦର କଳା ବାଦଲ ମଧ୍ୟରେ ରହିଛି। ଦକ୍ଷିଣ ଆଫ୍ରିକା କ୍ରିକେଟ ବୋର୍ଡର ବିଭିନ୍ନ ମାମଲାରେ ବୁଧବାର ସରକାର ମୁଣ୍ଡ ପୂରାଇବେ ବୋଲି କହିବା ପରେ ବିପଦ ସୃଷ୍ଟି ହୋଇଛି। ସରକାରଙ୍କ ହସ୍ତକ୍ଷେପ ଯୋଗୁ ଅନ୍ତର୍ଜାତୀୟ କ୍ରିକେଟରୁ ଦକ୍ଷିଣ ଆଫ୍ରିକା କ୍ରିକେଟ ବାସନ୍ଦ ହେବାର ସମ୍ଭାବନା ସୃଷ୍ଟି ହୋଇଛି। ବୋର୍ଡର କେତେଜଣ ବରିଷ୍ଠ ଅଧିକାରୀ ବଡ଼ ଦୁର୍ନୀତି କରିବା ଅଭିଯୋଗରେ ସରକାର ବୋର୍ଡ ବ୍ୟାପାରରେ ହସ୍ତକ୍ଷେପ କରିବେ ବୋଲି ସ୍ପଷ୍ଟ କରିଛନ୍ତି।
ଦକ୍ଷିଣ ଆଫ୍ରିକା କ୍ରୀଡ଼ାମନ୍ତ୍ରୀ ନାଥି ଏମ୍ଥେଥ୍ବା ସରକାରଙ୍କ ଆଭିମୁଖ୍ୟ ନେଇ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)କୁ ସ୍ପଷ୍ଟ କରିଛନ୍ତି। ତେବେ ସରକାର ହସ୍ତକ୍ଷେପ କଲେ ଅନ୍ତର୍ଜାତୀୟ କ୍ରିକେଟରୁ ଦକ୍ଷିଣ ଆଫ୍ରିକାକୁ ବାସନ୍ଦ କରାଯିବ ବୋଲି ଆଇସିସି ସ୍ପଷ୍ଟ କରିଛି। ଯେପର୍ଯ୍ୟନ୍ତ ଜାତୀୟ ବୋର୍ଡ ସ୍ବାଧୀନ ଭାବେ କାର୍ଯ୍ୟ କରବାର ଅଧିକାର ପାଇନାହିଁ ସେପର୍ଯ୍ୟନ୍ତ ବାସନ୍ଦ ଜାରି ରହିବ ବୋଲି କୁହାଯାଇଛି। ଦକ୍ଷିଣ ଆଫ୍ରିକା କ୍ରିକେଟରେ ବଡ଼ଧରଣର ଦୁର୍ନୀତି ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି। ତେବେ ସରକାର କାହିଁକି ବୋର୍ଡର କାର୍ଯ୍ୟ ଶୈଳୀରେ ମୁଣ୍ଡ ପୂରାଇବ ନାହିଁ ଏ ନେଇ ଜବାବ ରଖିବାକୁ କ୍ରିକେଟ ଅଧିକାରୀମାନଙ୍କୁ ଆଗାମୀ ୨୭ ତାରିଖ ସୁଦ୍ଧା ଜବାବ ରଖିବାକୁ କ୍ରୀଡ଼ାମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।