ଭୁବନେଶ୍ୱର,୧୯।୯: ସାରା ଦେଶରେ ବ୍ୟବସାୟିକ କ୍ଷେତ୍ରରେ କମର୍ସିଆଲ ଗ୍ୟାସ୍ ପରିବର୍ତ୍ତେ ଘରୋଇ ଗ୍ୟାସ୍ର ବହୁଳ ବ୍ୟବହାର ଯୋଗୁ ଉଭୟ ରାଜ୍ୟ ଓ କେନ୍ଦ୍ର ପ୍ରତି ବର୍ଷ କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି। ସେହିଭଳି ଉଭୟ ସରକାରଙ୍କ ସମ୍ପୃକ୍ତ ବିଭାଗର ଅବହେଳା ନୀତି ଯୋଗୁ ଏଭଳି ଘଟଣା ଘଟୁଥିବା ଓଡିଶା ଏଲପିଜି ବିତରକ ସଂଘ ପକ୍ଷରୁ ଅଭିଯୋଗ ସହ ନିକଟରେ ଏକ ପ୍ରତିନିଧି ଦଳ ରାଜ୍ୟ ଖାଦ୍ୟ ଯୋଗାଣ ଏବଂ ଖାଉଟି ବିଭାଗ ମନ୍ତ୍ରୀ ଅତନୁ ସବ୍ୟସାଚ୍ଚୀ ନାୟକଙ୍କୁ ଭେଟି ଏକ ୧୦ ଦଫା ସମ୍ମିଳିତ ଦାବି ପତ୍ର ପ୍ରଦାନ କରିଥିଲେ। ସେହିପରି ସଂଘର କହିବା ଅନୁସାରେ ସରକାର ୧୯କି.ଗ୍ରା ଏଲପିଜି ସିଲିଣ୍ଡର ଉପରେ ୧୮% ଜିଏସଟି ଏବଂ ୧୪.୨କି.ଗ୍ରା ଏଲପିଜି ସିଲିଣ୍ଡର ଉପରେ ୫% ଜିଏସଟି ଆଦାୟ କରୁଛନ୍ତି। ହେଲେ କିଛି ଅସାଧୁ ବ୍ୟବସାୟୀ ନିଜର ଲାଭ ପାଇଁ ବ୍ୟବସାୟ କ୍ଷେତ୍ରରେ ଘରୋଇ ଗ୍ୟାସର ବ୍ୟାପକ ବ୍ୟବହାର କରୁଛନ୍ତି। ଫଳରେ ସରକାରଙ୍କର କର୍ମସିଆଲ ଗ୍ୟାସ ବିକ୍ରି ବାବଦୀୟ ଟିକସ (ଜିଏସଟି) ହ୍ରାସ ପାଉଛି। ଏପରିକି ଉଭୟ ସିଲିଣ୍ଡର ଉପରେ ଜିଏସଟିର ଅସମାନତା ଅଭାବରୁ ସରକାର ରାଜସ୍ବ କ୍ଷତି ସହୁଥିବା ଦର୍ଶାଇବା ସହ ସେଥିରେ ସୁଧାର ଆଣିବା ପାଇଁ ସଂଘ ପକ୍ଷରୁ ମଧ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ଉକ୍ତ ପ୍ରତିନିଧି ଦଳରେ ସଂଘର ସଭାପତି ବିଶ୍ୱନାଥ ମୁଖାର୍ଜୀ, ଉପସଭାପତି ବାଣୀ ନିର୍ମାଲ୍ୟ ଦାସ, ସମ୍ପାଦକ ଡ.ଲୋପାମୁଦ୍ରା ବକ୍ସିପାତ୍ରଙ୍କ ସମେତ ସୂର୍ଯ୍ୟସାରଥୀ ବେହେରା,ଅଭିଜିତ ବରାଳ, ପବିତ୍ର ସାହୁ, ରଞ୍ଜନ ମହାପାତ୍ର,ନନ୍ଦ କୁମାର ମିଶ୍ର ଏବଂ ଆଶିଷ ପ୍ରଧାନ ପ୍ରମୁଖ ସାମିଲ ଥିଲେ।