ଭୁବନେଶ୍ୱର, ୨୭।୧୨ (ଅନୁରାଧା ମହାରଣା): ସରକାରୀ ଚାକିରି ପାଇଁ ଆବେଦନର ସର୍ବୋଚ୍ଚ ବୟସସୀମା ସାଧାରଣ ବର୍ଗ ପ୍ରାର୍ଥୀଙ୍କ ପାଇଁ ୪୨ ବର୍ଷକୁ ସ୍ଥାୟୀଭାବେ ବୃଦ୍ଧି କରାଯାଉ ବୋଲି ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷାର ଆଶାୟୀମାନେ ଦାବି କରିଛନ୍ତି। ଏନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ମଙ୍ଗଳବାର ଦାବିପତ୍ର ପ୍ରଦାନ କରାଯାଇଛି। ଆଶାୟୀଙ୍କ କହିବାନୁସାରେ, ବିଧାନସଭାରେ ବିଧାୟକମାନେ ବାରମ୍ବାର ଏହି ଦାବିକୁ ଉପସ୍ଥାପନ କରିଛନ୍ତି। ଓଡିଶା ଲୋକସେବା ଆୟୋଗ, ଓଡିଶା କର୍ମଚାରୀ ପ୍ରବରଣ ଆୟୋଗ, ଓଡିଶା କର୍ମଚାରୀ ଚୟନ ଆୟୋଗ ଓ ଅନ୍ୟାନ୍ୟ ବୋର୍ଡ ଦ୍ୱାରା ପରିଚାଳିତ ବିଭିନ୍ନ ପ୍ରକାର ଚାକିରିରେ ଖାଲିଥିବା ପଦ ନିୟମାନୁସାରେ ପ୍ରତିବର୍ଷ ପୂରଣ କରାଯାଉନାହିଁ। ରାଜ୍ୟ ସରକାର ୨୦୨୧, ୨୦୨୨ ଓ ୨୦୨୩ ତିନିବର୍ଷ ଲାଗି ନିଯୁକ୍ତି କ୍ଷେତ୍ରରେ ସର୍ବାଧିକ ବୟସସୀମା ୩୨ ବର୍ଷରୁ ୩୮ବର୍ଷକୁ ବୃଦ୍ଧି କରିଛନ୍ତି। ଏହି ୩ ବର୍ଷ ମଧ୍ୟରୁ ୨୦୨୨ରେ ଓଡ଼ଶା ସବ୍ଅର୍ଡିନେଟ୍ ଷ୍ଟାଫ୍ ସିଲେକ୍ସନ୍ କମିଶନ (ଓଏସ୍ଏସ୍ଏସ୍ସି) ପକ୍ଷରୁ କୌଣସି ନିଯୁକ୍ତି ବିଜ୍ଞପ୍ତି ପ୍ରକାଶ ପାଇଲା ନାହଁି। ୨୦୨୩ରେ ବିଜ୍ଞପ୍ତି ପ୍ରକାଶ ପାଇଥିଲେ ମଧ୍ୟ ଅଧିକାଂଶ ପରୀକ୍ଷାର୍ଥୀଙ୍କ ଆବେଦନର ବସୟ ସୀମା ଗଡ଼ିଗଲା। ଯଦି ପୂର୍ବବର୍ଷ ଅନୁସାରେ ଆବେଦନର ବୟସସୀମା ୩୮ବର୍ଷ ଥାନ୍ତା ତେବେ ସେମାନେ ଆବେଦନ କରିବା ପାଇଁ ସୁଯୋଗ ପାଇଥାନ୍ତେ। ସେହିଭଳି ୨୦୨୨ରେ ବିଭିନ୍ନ ପଦବୀ ପାଇଁ ବିଜ୍ଞପ୍ତି ପ୍ରକାଶ ନ ପାଇବାରୁ ବହୁ ଆଶାୟୀ ଏବେ ଆବେଦନରୁ ବଞ୍ଚତ୍ତ ହେବେ। ୨୦୦୦ମସିହାରୁ ବର୍ତ୍ତମାନ ଯାଏ ସଧାରଣବର୍ଗର ଅନେକ ଗରିବ ମେଧାବୀ ଆଶାୟୀ ଚାକିରି ସୁଯୋଗରୁ ବଞ୍ଚତ୍ତ ହୋଇଛନ୍ତି। ଏବେ ରାଜ୍ୟର ବିଭିନ୍ନ ବିଭାଗରେ ଲକ୍ଷାଧିକ ପଦ ଖାଲି ପଡିଥିବା ବିଧାନସଭା ତଥ୍ୟରୁ ଜଣାପଡ଼ିଛି।