ନୂଆଦିଲ୍ଲୀ,୧୩।୧୨: ଚାଇନା କେବଳ ସୀମାରେ ନୁହେଁ, ସାଇବର ଆକ୍ରମଣ ମାଧ୍ୟମରେ ବି ଭାରତକୁ ପ୍ରଭାବିତ କରିବାକୁ ଚେଷ୍ଟା କରୁଛି। ନିକଟରେ ଦିଲ୍ଲୀ ଏମ୍ସରେ ସର୍ଭର ହ୍ୟାକର ଖବର ସାମ୍ନାକୁ ଆସିଥିଲା। କ୍ରମାଗତ ଭାବେ ସାଇବର ଆକ୍ରମଣ ମାମଲା ଆସିବା ପରେ ବର୍ତ୍ତମାନ ଭାରତ ସରକାର ପୂର୍ବ ଅପେକ୍ଷା ଅଧିକ ସଚେତନ ହୋଇଯାଇଛନ୍ତି। ମନ୍ତ୍ରଣାଳୟ ଏବଂ ପବ୍ଲିକ ସେକ୍ଟର ୟୁନିଟ (ପିଏସୟୁ)ର କର୍ମଚାରୀମାନେ ଏକ ମାନକ ଅପରେଟିଂ ପ୍ରୋଟୋକଲ ଅନୁସରଣ କରିବା ପାଇଁ ସରକାର ଏକ ପଦକ୍ଷେପ ଗ୍ରହଣ କରିଛନ୍ତି। ସମସ୍ତ କର୍ମଚାରୀଙ୍କ ପାଇଁ ସରକାର ଏକ ଏସ୍ଓପି ଜାରି କରିଛନ୍ତି। ଏଥିରେ କମ୍ପ୍ୟୁଟର ବନ୍ଦ କରିବା, ଇମେଲରୁ ସାଇନ ଆଉଟ ଏବଂ ଅପଡେଟ ଆଦି ଅନ୍ତର୍ଭୁକ୍ତ ରହିଛି। ସରକାରୀ ସୂତ୍ରରୁ ଜଣାପଡିଛି ଯେ, ଏହି ପ୍ରୋଟୋକଲଗୁଡିକ ପାଳନ ନ ହେବା କାରଣରୁ ଏମ୍ସରେ ସାଇବର ଆକ୍ରମଣ ହୋଇଥିଲା। ପ୍ରାୟତଃ କର୍ମଚାରୀମାନେ ସେମାନଙ୍କ ଇମେଲରୁ ସାଇନ ଆଉଟ କରନ୍ତି ନାହିଁ କିମ୍ବା ସିଷ୍ଟମ୍ ବନ୍ଦ କରନ୍ତି ନାହିଁ। ଏମ୍ସରେ ମଧ୍ୟ ସମାନ ଘଟଣା ଘଟିଥିଲା। ଯେଉଁଥିପାଇଁ ସାଇବର ଅପରାଧର ସାମ୍ନା କରିବାକୁ ପଡ଼ିଥିଲା ବୋଲି କୁହାଯାଉଛି।
