ଲକ୍ଷ୍ନୌ, ୯।୬ : ଯୋଗୀ ଆଦିତ୍ୟନାଥ ସରକାରଙ୍କ ଦ୍ୱିତୀୟ ପାଳିରେ ଉତ୍ତରପ୍ରଦେଶରେ ଦୁର୍ନୀତି ରୋକିବା ପାଇଁ ଏକ ଅଭିଯାନ ଆରମ୍ଭ ହୋଇଛି। ଏହା ଅନ୍ତର୍ଗତ ମନ୍ତ୍ରୀମାନଙ୍କୁ ପ୍ରତିବର୍ଷ ନିଜ ତଥା ସେମାନଙ୍କ ପରିବାର ସଦସ୍ୟଙ୍କ ସମ୍ପତ୍ତିର ବିବରଣୀ ଦେବାକୁ କୁହାଯାଇଛି। ମନ୍ତ୍ରୀଙ୍କ ସହ ସରକାର ପିସିଏସ ଅଧିକାରୀଙ୍କ ପାଇଁ ବଙ୍ଗଳା, କାର୍, ଅଳଙ୍କାର, ବ୍ୟାଙ୍କ ବାଲାନ୍ସ, ପ୍ଲଟ ସମେତ ସମସ୍ତ ସମ୍ପତ୍ତିର ବିବରଣୀ ଦେବା ବାଧ୍ୟତାମୂଳକ କରାଯାଇଛି। ଏଥିପାଇଁ ’ସ୍ପାରୋ-ୟୁପି’ ପୋର୍ଟାଲ ଏନଆଇସି ମାଧ୍ୟମରେ ପ୍ରସ୍ତୁତ କରାଯାଇଛି।
ପୋର୍ଟାଲରେ, ପିସିଏସ ଅଧିକାରୀମାନଙ୍କୁ ପ୍ରତ୍ୟେକ ବର୍ଷ ଆରମ୍ଭରେ ଜାନୁଆରୀ ୧ ରୁ ଜାନୁୟାରୀ ୨୧ ମଧ୍ୟରେ ସେମାନଙ୍କର ସମ୍ପତ୍ତି ବିବରଣୀ ଅନଲାଇନରେ ଦାଖଲ କରିବାକୁ ପଡିବ। ଏହାର ଲଗଇନ ଏବଂ ପାସୱାର୍ଡ ଅଧିକାରୀମାନଙ୍କୁ ଦିଆଯାଇଛି।
ଏହା ନ କଲେ ବିଭାଗୀୟ କାର୍ଯ୍ୟାନୁଷ୍ଠାନ ହେବ। ପ୍ରତ୍ୟେକ ଅଧିକାରୀଙ୍କୁ ପ୍ରତିବର୍ଷ ଏପ୍ରିଲରେ ଗତ ଆର୍ଥିକ ବର୍ଷ ପାଇଁ ଅନଲାଇନ ଆତ୍ମ-ମୂଲ୍ୟାଙ୍କନ ମଧ୍ୟ ଦେବାକୁ ପଡିବ ।
ରାଜ୍ୟର ସରକାରୀ ଅଧିକାରୀଙ୍କ ବାର୍ଷିକ ଗୋପନୀୟ ରିପୋର୍ଟ (ଏସିଆର୍) ମଧ୍ୟ ଅନଲାଇନରେ ଦିଆଯିବ।
ଆଇଏଏସ୍ ଅଧିକାରୀଙ୍କ ପାଇଁ ସେମାନଙ୍କର ସମ୍ପତ୍ତିର ବିବରଣୀ ଦେବା ପୂର୍ବରୁ ବାଧ୍ୟତାମୂଳକ କରାଯାଇଥିଲା। ଭାରତ ସରକାରଙ୍କ ପର୍ସନାଲ ଆଣ୍ଡ ଟ୍ରେନିଂ ବିଭାଗ ଅଧୀନରେ ଏହି ବ୍ୟବସ୍ଥା କାର୍ଯ୍ୟକାରୀ ହୋଇସାରିଛି। ଅଧିକାରୀମାନଙ୍କୁ ସ୍ପାରୋ ସଫ୍ଟୱେର୍ ସହିତ ଅନଲାଇନରେ ସେମାନଙ୍କର ସମ୍ପତ୍ତି ବିବରଣୀ ପ୍ରଦାନ କରିବାକୁ ପଡୁଛି।