କାଏମା,୧ା୧୧(ଡି.ଏନ.ଏ.):ସରକାରଙ୍କ ଅନେକ ଲୋକହିତକର ଯୋଜନା ମଧ୍ୟରୁ ଖାଦ୍ୟ ସୁରକ୍ଷା ଯୋଜନା, ବିଧବା ଓ ଭିନ୍ନକ୍ଷମ ଭତ୍ତା ଅନ୍ୟତମ। ହେଲେ ଏହି ଯୋଜନାରୁ ଏବେବି ଶତାଧିକ ଅସହାୟ ଯୋଗ୍ୟ ହିତାଧିକାରୀ ବଞ୍ଚିତ ରହିଛନ୍ତି। ଧର୍ମଶାଳା ବ୍ଲକ ବଡ଼ କାଏମା ପଞ୍ଚାୟତର କାଏମା (ମହଲା ସାହି) ଗ୍ରାମରେ ଥିବା ଶୁଭସ୍ମିତା ସାହୁଙ୍କ ପରିବାରକୁ ଏଠାରେ ଉଦାହରଣ ଭାବେ ନିଆଯାଇପାରେ। ଶୁଭସ୍ମିତାଙ୍କ ସ୍ବାମୀ ତପନ କୁମାର ସାହୁଙ୍କ ୨ ବର୍ଷ ତଳେ ଯାଜପୁର ରୋଡ୍ରେ ଏକ ସଡକ ଦୁର୍ଘଟଣାରେ ମୃତ୍ୟୁ ହୋଇଥିଲା। ପୁଅ ପୀୟୂଷ (୫ ବର୍ଷ) ଓ ଦିବ୍ୟାଙ୍ଗ ଝିଅ ତନୁଷ୍କା (୨ ବର୍ଷ)ଙ୍କୁ ନେଇ ଶୁଭସ୍ମିତା ଏବେ ବହୁ କଷ୍ଟରେ ରହୁଛନ୍ତି। ଶୁଭସ୍ମିତାଙ୍କୁ ରାଶନ କାର୍ଡଟିଏ ମିଳି ପାରିନାହିଁ। ତପନଙ୍କ ମୃତ୍ୟୁର ୪ ମାସ ପରେ ଜନ୍ମ ହୋଇଥିଲା ଶିଶୁ କନ୍ୟା। କିନ୍ତୁ ଭାଗ୍ୟର ବିଡମ୍ବନା ଯେ, ଶିଶୁ କନ୍ୟା ତନୁଷ୍କା ଜନ୍ମରୁ ଦୃଷ୍ଟିହୀନା। ଏହା ଶୁଭସ୍ମିତାଙ୍କ ଜୀବନରେ ଆଉ ଏକ ଦୁଃଖର ପାହାଡ଼ ଭାବେ ଲଦି ହୋଇଥିଲା। ଧାର ଉଧାର କରି ତନୁଷ୍କାଙ୍କ ଚିକିତ୍ସା ପାଇଁ ଖର୍ଚ୍ଚ କରିଥିଲେ ମଧ୍ୟ କିଛି ସୁଫଳ ମିଳି ପାରିନାହିଁ। ତନୁଷ୍କାଙ୍କୁ ଏକ ଦିବ୍ୟାଙ୍ଗ ପରିଚୟପତ୍ର ମିଳିଛି। କିନ୍ତୁ ଆଜିଯାଏଁ ଭିନ୍ନକ୍ଷମ ଭତ୍ତା ମିଳିପାରିନାହିଁ। ଏନେଇ ଶୁଭସ୍ମିତା ପ୍ରଶାସନକୁ ଅନେକ ଥର ଗୁହାରି କରିବା ସତ୍ତ୍ବେ ବି ଦୁଃଖ ବୁଝିବାକୁ କେହି ନାହାନ୍ତି।
