ପୁରୀ ଅଫିସ,୯।୯: ସମ୍ମିଳିତ କର୍ମଜୀବୀ ଖବରଦାତା ମହାସଂଘ ପକ୍ଷରୁ ୧୦ଦଫା ଦାବି ନେଇ ଗୁରୁବାର ପୁରୀ ବଡ଼ଦାଣ୍ଡରେ ଶୋଭାଯାତ୍ରା କରାଯିବା ସହ ମୁଖ୍ୟ ଶାସନ ସଚିବଙ୍କ ଉଦ୍ଦେଶ୍ୟରେ ଜିଲାପାଳ ସମର୍ଥ ବର୍ମାଙ୍କୁ ଦାବିପତ୍ର ଦିଆଯାଇଛି। ଖବରଦାତାଙ୍କ ସ୍ବାସ୍ଥ୍ୟବୀମା ୧୦ ଲକ୍ଷ ଟଙ୍କାକୁ ବୃଦ୍ଧି, ପେନସନ୍ ଦେବା, ଖବରଦାତାଙ୍କ ପିଲାଙ୍କୁ ବିଦ୍ୟାଳୟ ଓ କଲେଜ ସ୍ତରରେ ଶିକ୍ଷା ପାଇଁ ସ୍ବତନ୍ତ୍ର ସୁବିଧା, କ୍ଷୁଦ୍ର ଓ ମଧ୍ୟମ ଖବରକାଗଜକୁ ବିଜ୍ଞାପନ ବୃଦ୍ଧି, ବସ୍ ଯାତାୟାତରେ ରିହାତି, ଉଦ୍ଦେଶ୍ୟମୂଳକ ଭାବେ ଖବରଦାତାଙ୍କୁ ପୋଲିସ ଆକ୍ରମଣରୁ ସୁରକ୍ଷା ଏବଂ ଖବରଦାତାଙ୍କ ବିରୋଧରେ ଘଟୁଥିବା ହିଂସାତ୍ମକ କାର୍ଯ୍ୟକଳାପ ରୋକିବା ପ୍ରଭୃତି ଦଫା ଦାବି କରାଯାଇଛି। ଶୋଭାଯାତ୍ରା ସିଂହଦ୍ୱାର, ଟାଉନ ଥାନା, ଜିଲା ମୁଖ୍ୟ ଚିକିତ୍ସାଳୟ ଓ ମହାତ୍ମାଗାନ୍ଧୀ ରୋଡ୍ ଦେଇ ଜିଲାପାଳଙ୍କ କାର୍ଯ୍ୟାଳୟରେ ସମ୍ମୁଖରେ ପହଞ୍ଚିଥିଲା। ଏହାପରେ ଖବରଦାତାମାନେ ଜିଲାପାଳଙ୍କୁ ଭେଟି ଦାବିପତ୍ର ଦେଇଥିଲେ। ଖବରଦାତାଙ୍କ ନାର୍ଯ୍ୟ ଦାବି ଉପରେ ସରକାର ବିଚାର ନ କଲେ ଆନ୍ଦୋଳନ କରାଯିବ ବୋଲି ମହାସଂଘ ପକ୍ଷରୁ କୁହାଯାଇଛି। ଏହି ଶୋଭାଯାତ୍ରାରେ କେନ୍ଦ୍ରୀୟ ସାଧାରଣ ସମ୍ପାଦକ ତପନ ମହାରଣ୍ୟ ଶର୍ମା, ଉପସଭାପତି ସୁନୀଲ ମିଶ୍ର, ମାନସ ମହାପାତ୍ର, କୋଷାଧ୍ୟକ୍ଷ ଗଜେନ୍ଦ୍ର ବେହେରା, ଆଇନ ଉପଦେଷ୍ଟା ଦିଲୀପ ଦାସ, ଜୟକୃଷ୍ଣ ଦାସ, ସୁବୋଧ କୁମାର ସୁବୁଦ୍ଧି, ପ୍ରସନ୍ନ କୁମାର ଦାଶ, ପ୍ରସନ୍ନ ଲେଙ୍କା, ସାଗର ମଦନ ମୋହନ ପ୍ରତିହାରୀ, ରବିନ୍ଦ୍ର ମହାନ୍ତି, ବିବେକାନନ୍ଦ ଦାଶ, ବିଶ୍ୱମିତ ମିଶ୍ର, ସ୍ତମ୍ଭକାର ବଦ୍ରି ମିଶ୍ର ଏବଂ ସାମାଜିକ କର୍ମୀ ଷ୍ଟାଲିନ ପରିଜା ପ୍ରମୁଖ ସାମିଲ ଥିଲେ।