ନୂଆଦିଲ୍ଲୀ,୮।୯: ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ର ପୂର୍ବତନ ଡେପୁଟି ଗଭର୍ଣ୍ଣର ବିରଲ ଆଚାର୍ଯ୍ୟ ଏକ ବଡ ଦାବି କରିଛନ୍ତି। ସେ କହିଛନ୍ତି, ୨୦୧୮ ମସିହାରେ ସରକାର ୧୯ନିର୍ବାଚନ ପୂର୍ବରୁ କେନ୍ଦ୍ରୀୟ ବ୍ୟାଙ୍କ ଅର୍ଥାତ୍ ଆରବିଆଇରୁ ୨ରୁ ୩ଲକ୍ଷ କୋଟି ଟଙ୍କା ଉଠାଇବାକୁ ଚେଷ୍ଟା କରିଥିଲେ। ସେମାନେ ଏହି ଟଙ୍କାକୁ ନିର୍ବାଚନ ପୂର୍ବରୁ ଲୋକାଭିମୁଖୀ କାମରେ ଲଗାଇବେ ବୋଲି ବ୍ୟାଙ୍କ୍ ପାଖରେ ଦାବି କରିଥିଲେ। ଟଙ୍କା ଉଠାଣକୁ ନେଇ ଆରବିଆଇ ଓ ସରକାରଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା।
ଆଚାର୍ଯ୍ୟ ତାଙ୍କ ପୁସ୍ତକ ‘କ୍ୱେଷ୍ଟ ଫର ରିଷ୍ଟୋରିଙ୍ଗ୍ ଫାଇନାସିଙ୍ଗ୍ ଷ୍ଟାବିଲିଟି ଅଫ୍ ଇଣ୍ଡିଆ’ରେ ଏ ପ୍ରସଙ୍ଗରେ ଆଲୋକପାତ କରିଛନ୍ତି। ଏଥିରେ ସରକାରଙ୍କ ଏହି ଉଦ୍ୟମକୁ ‘ରାଷକୋଷରେ ଅଭାବ ଦେଖାଯିବା’ ଏବଂ ବ୍ୟାକଡୋର୍ ମୋନେଟାଇଜେସନ’ ବୋଲି ବର୍ଣ୍ଣନା କରାଯାଇଛି।
୨୦୧୯ ସାଧାରଣ ନିର୍ବାଚନରେ ବିଜୟୀ ହେବା ପାଇଁ ସରକାର ଆରବିଆଇରୁ ବିପୁଳ ପରିମାଣର ଅର୍ଥ ଉଠାଣ କରି ଲୋକାଭିମୁଖୀ କାର୍ଯ୍ୟ କରିବାକୁ ଚେଷ୍ଟା କରୁଥିଲେ। ତେବେ ଆରବିଆଇ ଏହା ସପକ୍ଷରେ ନ ଥିଲା। ତେଣୁ ସରକାର ଓ ଅରବିଆଇ ମଧ୍ୟରେ ମତଭେଦ ସୃଷ୍ଟି ହୋଇଥିଲା।
ସେତେବେଳେ ସରକାର ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ) ଆକ୍ଟର ଧାରା ୭ ବ୍ୟବହାର କରି ଆରବିଆଇକୁ ନିର୍ଦ୍ଦେଶ ଦେବା ପାଇଁ ଚେତାବନୀ ମଧ୍ୟ ଦେଇଥିଲେ। ଅକ୍ଟୋବର ୨୬ ୨୦୧୮ରେ ଆବିଆଇର ତତ୍କାଳୀନ ଡେପୁଟି ଗଭର୍ଣ୍ଣର ଆଚାର୍ଯ୍ୟ ଏକ ବକ୍ତବ୍ୟ ଦେବାବେଳେ ଏହି ପ୍ରସଙ୍ଗ ଉଠାଇଥିଲେ।
୨୦୨୦ରେ ଆଚାର୍ଯ୍ୟଙ୍କ ପ୍ରକାଶିତ ତାଙ୍କ ପୁସ୍ତକର ନୂତନ ସଂସ୍କରଣର ସେ କହିଥିଲେ, ଅମଲାତନ୍ତ୍ର ଏବଂ ସରକାରରେ ବସିଥିବା କିଛି ‘ସୃଜନଶୀଳ ମସ୍ତିଷ୍କ’ର କିଛି ଲୋକ ପୂର୍ବ ସରକାରଙ୍କ କାର୍ଯ୍ୟକାଳ ମଧ୍ୟରେ ଆରବିଆଇରେ ଜମା ହୋଇଥିବା ବଡ ରକମର ଟଙ୍କାକୁ ବର୍ତ୍ତମାନର ସରକାରଙ୍କ ଖାତାରେ ସ୍ତାନାନ୍ତରିତ କରିବା ପାଇଁ ଯୋଜନା ପ୍ରସ୍ତୁତ କରିଥିଲେ।