ନୂଆଦିଲ୍ଲୀ,୨୪।୯: ଅରବିନ୍ଦ କେଜରିୱାଲ ମୁଖ୍ୟମନ୍ତ୍ରୀ ପଦ ଛାଡିବା ପରେ ଆତିଶୀ ସୋମବାର ନୂଆ ମୁଖ୍ୟମନ୍ତ୍ରୀ ଭାବରେ ପ୍ରଥମ ଥର ପାଇଁ ଦିଲ୍ଲୀର ସିଂହାସନରେ ବସିଛନ୍ତି। ସେ ତାଙ୍କ ଚେୟାର ପାଖରେ ଏକ ଚେୟାର ଖାଲି ରଖିଛନ୍ତି। ଆତିଶୀ କହିଛନ୍ତି ଯେ ପ୍ରଭୁ ରାମଙ୍କ ୧୪ ବର୍ଷ ନିର୍ବାସନ ସମୟରେ ଭରତ ତାଙ୍କ ବଡ଼ ଭାଇଙ୍କ କଠଉକୁ ତାଙ୍କ ଚେୟାରରେ ରଖି ଅଯୋଧ୍ୟା ଉପରେ ଶାସନ କରୁଥିଲେ। ସେହିଭଳି ଅରବିନ୍ଦ କେଜରିୱାଲଙ୍କ ଚେୟାରକୁ ତାଙ୍କ ପାଖରେ ରଖି ସେ ଆସନ୍ତା ୪ ମାସ ପାଇଁ ଦିଲ୍ଲୀ ସରକାର ଚଳାଇବେ। ଆତିଶୀଙ୍କ ରାମାୟଣ, ରାମ ଏବଂ ଭରତ ରାଜନୀତି ତାଙ୍କ ବ୍ୟକ୍ତିଗତ ରାଜନୈତିକ କ୍ୟାରିୟର ଏବଂ ଆମ ଆଦମୀ ପାର୍ଟି ସହିତ ମେଳ ଖାଇପାରେ, କିନ୍ତୁ ଦିଲ୍ଲୀର ସ୍ଥାନୀୟ ପ୍ରସଙ୍ଗ ସହିତ ଏହାର କୌଣସି ସମ୍ପର୍କ ନାହିଁ ବୋଲି ଆଲୋଚନା ହେଲାଣି।
ମାର୍ଚ୍ଚରେ ଏଏପି ସଂଯୋଜକ ଅରବିନ୍ଦ କେଜରିୱାଲ ଜେଲ ଯିବା ପରଠାରୁ ଦିଲ୍ଲୀର ଲୋକମାନେ ବହୁ ଯନ୍ତ୍ରଣା ଭୋଗୁଛନ୍ତି। ଆତିଶୀଙ୍କ ଚେୟାର ରାଜନୀତିରେ ସେମାନଙ୍କର ସମସ୍ୟାର ସମାଧାନ ହେବ ନାହିଁ। ସିଏମଙ୍କ ଅନୁପସ୍ଥିତିରେ ରାଜଧାନୀରେ ୬ମାସରୁ ଅଧିକ ସମୟ ଧରି ଦିଲ୍ଲୀ ସରକାରଙ୍କ କୌଣସି କ୍ୟାବିନେଟ ବୈଠକ ଅନୁଷ୍ଠିତ ହୋଇନାହିଁ। ସରକାରୀ କାର୍ଯ୍ୟ ଏବଂ ଏମସିଡି ସମ୍ବନ୍ଧୀୟ ଫାଇଲଗୁଡିକ ମୁଖ୍ୟମନ୍ତ୍ରୀଙ୍କ ଦସ୍ତଖତକୁ ଅପେକ୍ଷା କରିଛନ୍ତି । ଯାହା ତୁରନ୍ତ କାମ କରିବା ଆବଶ୍ୟକ ବୋଲି ଦାବି କରାଯାଉଛି।