ନୂଆଦିଲ୍ଲୀ,୪।୮: କରୋନା ମହାମାରୀ ସଂକ୍ରମଣ ସଙ୍କଟ ଯୋଗୁ ଦେଶରେ ପ୍ରବାସୀ ଶ୍ରମିକଙ୍କ ଆର୍ଥିକ ଅବସ୍ଥା ଶୋଚନୀୟ ହୋଇପଡ଼ିଛି। ଏପରିସ୍ଥଳେ ସରକାର ସେମାନଙ୍କର ସଞ୍ଚୟ ଖାତାକୁ ଟଙ୍କା ପଠାଇବାର ଆବଶ୍ୟକତା ରହିଛି ବୋଲି ପାର୍ଲାମେଣ୍ଟାରୀ କମିଟି ପକ୍ଷରୁ କେନ୍ଦ୍ର ସରକାରଙ୍କୁ ସୁପାରିଶ୍ କରାଯାଇଛି। ଶ୍ରମ ମନ୍ତ୍ରଣାଳୟ ସହିତ ଜଡ଼ିତ ଥିବା ପାର୍ଲାମେଣ୍ଟାରୀ ଷ୍ଟାଣ୍ଡିଂ କମିଟି କରୋନା ମହାମାରୀ ଯୋଗୁ ଲକ୍ଡାଉନ ଭଳି ପରିସ୍ଥିତିରେ ସିଧାସଳଖ ଟଙ୍କା ପଠାଇ ଶ୍ରମିକମାନଙ୍କୁ ସାହାଯ୍ୟ କରିବାକୁ ସରକାରଙ୍କୁ ପରାମର୍ଶ ଦେଇଛନ୍ତି। କମିଟି ମଙ୍ଗଳବାର ଦିନ ସଂସଦରେ ’ସଂଗଠିତ ତଥା ଅସଂଗଠିତ କ୍ଷେତ୍ରରେ ବେକାରୀ ବୃଦ୍ଧି ଉପରେ କରୋନା ପ୍ରଭାବ’ ପ୍ରସଙ୍ଗରେ ଏହାର ରିପୋର୍ଟ ଉପସ୍ଥାପନ କରିଛି। କମିଟିର ରିପୋର୍ଟରେ ଉଲ୍ଲେଖ କରାଯାଇଛି ଯେ ଭାରତର ମୋଟ ୪୬ କୋଟି ୫୦ ଲକ୍ଷ ଶ୍ରମିକଙ୍କ ମଧ୍ୟରୁ ପ୍ରାୟ ୪୨ କୋଟି ଅର୍ଥାତ୍ ୯୦ ପ୍ରତିଶତ ଅଣ-ସଂଗଠିତ କ୍ଷେତ୍ରରେ ଶ୍ରମିକ ଭାବେ କାର୍ଯ୍ୟ କରିଥାନ୍ତି।
ଅଣ-ସଂଗଠିତ କ୍ଷେତ୍ର କରୋନା ଦ୍ୱାରା ଅଧିକ ପ୍ରଭାବିତ ହୋଇଛି। ତେଣୁ ଏହି କ୍ଷେତ୍ରର ଶ୍ରମିକଙ୍କୁ ସହାୟତା ଯୋଗାଇ ଦେବା ଆବଶ୍ୟକ ବୋଲି କମିଟି କହିଛି। ସାହାଯ୍ୟ ଆବଶ୍ୟକ କରନ୍ତି। ଅଣ-ସଂଗଠିତ କ୍ଷେତ୍ରର ଶ୍ରମିକମାନଙ୍କୁ ସାହାଯ୍ୟ କରିବା ପାଇଁ ବିସ୍ତୃତ ଆଲୋଚନା କରାଯିବା ସହିତ ଶୀଘ୍ର ପଦକ୍ଷେପ ଗ୍ରହଣ କରିବାକୁ କମିଟି ପକ୍ଷରୁ କୁହାଯାଇଛି। କରୋନା ମହାମାରୀ ଭଳି ବିପଦ ସମୟରେ ଶ୍ରମିକଙ୍କ ଆକାଉଣ୍ଟକୁ ସିଧାସଳଖ ଟଙ୍କା ଟ୍ରାନ୍ସଫର କରିବାକୁ କମିଟି ସରକାରଙ୍କୁ ସୁପାରିଶ କରିଛି। ବିଜେଡି ସାଂସଦ ଭତ୍ତୃହରି ମହତାବଙ୍କ ନେତୃତ୍ୱରେ ଗଠିତ କମିଟି କରୋନାର ପ୍ରଥମ ଲହର ସମୟରେ ଘରକୁ ଫେରିଥିବା ପ୍ରବାସୀ ଶ୍ରମିକଙ୍କ ଅବସ୍ଥା ପାଇଁ ସରକାରଙ୍କୁ ତାଗିଦ କରିଛି। ଏଭଳି ଲୋକଙ୍କ ବିଷୟରେ ତଥ୍ୟ ସଂଗ୍ରହ କରିବାକୁ ସରକାର ପ୍ରାୟ ଦୁଇମାସ ସମୟ ନେଇଥିଲେ। ଯେତେବେଳେ ସମଗ୍ର ଦେଶ ପ୍ରବାସୀ ଶ୍ରମିକଙ୍କ ହୃଦୟ ବିଦାରକ ଦୃଶ୍ୟକୁ ଦେଖୁଥିଲା, ସେତେବେଳେ ସରକାର ତଥ୍ୟ ସଂଗ୍ରହ ଲାଗି ପ୍ରାୟ ଦୁଇମାସ ଅପେକ୍ଷା କରିଥିବାରୁ କମିଟି ଆଶ୍ଚର୍ଯ୍ୟ ପ୍ରକଟ କରିଛି।
ରିପୋର୍ଟରେ କୁହାଯାଇଛି ଯେ ୨୦୨୦ ଜୁନ୍ ୯ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ କେନ୍ଦ୍ର ସରକାରଙ୍କ ନିଦ ଭାଙ୍ଗିଥିଲା। ରାଜ୍ୟ ସରକାରଙ୍କୁ ତଥ୍ୟ ସଂଗ୍ରହ କରିବାକୁ କୁହାଯାଇଥିଲା। ଏହା ଶ୍ରମ ମନ୍ତ୍ରଣାଳୟର ଅବହେଳା। କରୋନାର ପ୍ରଥମ ଲହର ସମୟରେ ଲକ୍ ଡାଉନ୍ ଘୋଷଣା ପରେ ୧ କୋଟି ୧୫ ଲକ୍ଷ ପ୍ରବାସୀ ଶ୍ରମିକ ଘରକୁ ଫେରିଥିଲେ। ଏଥିମଧ୍ୟରୁ ସର୍ବାଧିକ ୩୨ ଲକ୍ଷ ଉତ୍ତରପ୍ରଦେଶର ଥିଲେ। ସେହିଭଳି ଅନ୍ୟ ରାଜ୍ୟ ବ୍ୟତୀତ ବିହାରରେ ୧୫ ଲକ୍ଷ ଏବଂ ପଶ୍ଚିମବଙ୍ଗରେ ୧୩,୫ ଲକ୍ଷ ଶ୍ରମିକ ନିଜ ରାଜ୍ୟକୁ ଫେରିଥିଲେ।