ନୂଆଦିଲ୍ଲୀ, ୨୩।୫ : କରୋନାରୁ ପୁନରୁଦ୍ଧାର ହୋଇଥିବା ଅର୍ଥନୀତି ପାଇଁ ମୁଦ୍ରାସ୍ଫୀତି ଏକ ନୂତନ ଆହ୍ବାନ ପାଲଟିଛି । ଏହାକୁ ରୋକିବା ପାଇଁ ସରକାର ନୂତନ ପଦକ୍ଷେପ ନେଉଛନ୍ତି। ଏହି କ୍ରମରେ ଅର୍ଥମନ୍ତ୍ରୀ ନିର୍ମଳାସୀତାରମଣ ପେଟ୍ରୋଲ ଏବଂ ଡିଜେଲ ଉପରେ ଉତ୍ପାଦ ଶୁଳ୍କ ହ୍ରାସ କରିବାକୁ ଘୋଷଣା କରିଛନ୍ତି। ରଏଟର୍ସ ରିପୋର୍ଟ ଅନୁଯାୟୀ, ମୁଦ୍ରାସ୍ଫୀତି ନିୟନ୍ତ୍ରଣ ପାଇଁ ଚଳିତ ଆର୍ଥିକ ବର୍ଷରେ ସରକାର ଅତିରିକ୍ତ ୨ ଲକ୍ଷ କୋଟି ଟଙ୍କା ଖର୍ଚ୍ଚ କରିବେ। ଏହା ଦ୍ୱାରା ଉପଭୋକ୍ତା ମୂଲ୍ୟ ବୃଦ୍ଧି ଏବଂ ବହୁ ବର୍ଷର ମୁଦ୍ରାସ୍ଫୀତିର ମୁକାବିଲା କରାଯାଇ ପାରିବ।
ଅଧିକାରୀ କହିଛନ୍ତି ଯେ ଅର୍ଥମନ୍ତ୍ରୀଙ୍କ ଦ୍ୱାରା ପେଟ୍ରୋଲ ଏବଂ ଡିଜେଲ ଉପରେ ଟିକସ ହ୍ରାସ ଘୋଷଣା ଯୋଗୁ ସରକାରଙ୍କ ରାଜସ୍ବ ଉପରେ ସିଧାସଳଖ ୧ ଲକ୍ଷ କୋଟି ଟଙ୍କାର ବୋଝ ପଡ଼ିବ। ଏପ୍ରିଲରେ ଭାରତର ରିଟେଲ ମୁଦ୍ରାସ୍ଫୀତି ଆଠ ବର୍ଷର ସର୍ବୋଚ୍ଚ ସ୍ତରରେ ଥିଲା। ଏଥି ସହିତ ହୋଲସେଲ ମୁଦ୍ରାସ୍ଫୀତି ୧୭ ବର୍ଷର ଉଚ୍ଚ ସ୍ତରକୁ ଯାଇଛି। ଚଳିତ ବର୍ଷ କେତେକ ରାଜ୍ୟରେ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ପାଇଁ ମୁଦ୍ରାସ୍ଫୀତି ମୁଣ୍ଡବିନ୍ଧାର କାରଣ ପାଲଟିଛି।
ସରକାରଙ୍କ ସମ୍ପୂର୍ଣ୍ଣ ଧ୍ୟାନ ମୁଦ୍ରାସ୍ଫୀତି ହ୍ରାସ କରିବା ଉପରେ ରହିଛି। ରୁଷିଆ-ୟୁକ୍ରେନ ଯୁଦ୍ଧର ପ୍ରଭାବ ମଧ୍ୟ ଦେଶର ଅର୍ଥନୀତି ଉପରେ ଅନୁଭୁତ ହେଉଛି। ଏହି ସଙ୍କଟ ଏତେ ବୃଦ୍ଧି ପାଇବ ଏବଂ ଏହାର ପାର୍ଶ୍ୱ ପ୍ରତିକ୍ରିୟା ଏଭଳି ସଙ୍କଟ ସୃଷ୍ଟି କରିବ ବୋଲି କଳ୍ପନା କରାଯାଇ ନଥିଲ। ସରକାର ସାର ସବସିଡି ପାଇଁ ୫୦ ହଜାର କୋଟି ଟଙ୍କାର ଅତିରିକ୍ତ ପାଣ୍ଠି ଆବଶ୍ୟକ କରୁଛନ୍ତି। ମୋଟ ଅତିରିକ୍ତ ଆବଶ୍ୟକ ପାଣ୍ଠିର ଆନୁମାନିକ ପରିମାଣ ୨.୧୫ ଲକ୍ଷ କୋଟି ଟଙ୍କା ରହିଛି। ଅଧିକାରୀ କହିଛନ୍ତି ଯେ ଯଦି ଅଶୋଧିତ ତୈଳର ମୂଲ୍ୟ ହ୍ରାସ ନହୁଏ, ତେବେ ସରକାରଙ୍କୁ ପୁଣି ଥରେ ପେଟ୍ରୋଲ ଏବଂ ଡିଜେଲ ଉପରେ ଟ୍ୟାକ୍ସ ହ୍ରାସ କରିବାକୁ ପଡ଼ିବ।
ଏହା ଦ୍ୱାରା ସରକାରଙ୍କ ଉପରେ ଆର୍ଥିକ ବୋଝ ପୁଣି ବଢ଼ିବାର ଆଶଙ୍କା ରହିଛି। ଚଳିତି ଆର୍ଥିକ ବର୍ଷ ଆରମ୍ଭରୁ ସରକାର ଦେଢ଼ ଲକ୍ଷ କୋଟି ଟଙ୍କାର କ୍ଷତି ସହିଛନ୍ତି। ଜଣେ ଅଧିକାରୀ କହିଛନ୍ତି ଯେ ଏହି ପଦକ୍ଷେପ ପାଇଁ ସରକାରଙ୍କୁ ବଜାରରୁ ଅତିରିକ୍ତ ପାଣ୍ଠି ଋଣ ନେବାକୁ ପଡିପାରେ। ଏହାର ଅର୍ଥ ୨୦୨୨-୨୩ରେ ସରକାରଙ୍କ ଆର୍ଥିକ ନିଅଣ୍ଟ ବୃଦ୍ଧି ପାଇବ। ଫେବୃଆରୀରେ କରାଯାଇଥିବା ବଜେଟ ଘୋଷଣା ଅନୁଯାୟୀ ସରକାର ଚଳିତ ଆର୍ଥିକ ବର୍ଷରେ ୧୪.୩୧ ଲକ୍ଷ କୋଟି ରେକର୍ଡ ପରିମାଣର ଋଣ କରିବାକୁ ଯୋଜନା କରିଛନ୍ତି।