ଭୁବନେଶ୍ୱର,୨୪।୭(ବ୍ୟୁରୋ): ଉଦୟଗିରି ଫାଉଣ୍ଡେଶନ୍ ଟ୍ରଷ୍ଟ ପକ୍ଷରୁ ରିସାଇଟ୍ ଡଟ୍ ଓ୍ବାଲର୍ଡ ଓ୍ବେବ୍ସାଇଟ ଶୁକ୍ରବାର ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ ଦ୍ୱାରା ଉନ୍ମୋଚିତ ହୋଇଯାଇଛି। ଫାଉଣ୍ଡେଶନ୍ର ଚେୟାରମ୍ୟାନ୍ ଜେ.ପି.ଜଗଦେବ ଯୋଗଦେଇ ଓ୍ବେବସାଇଟ୍ ସମ୍ପର୍କରେ ସୂଚନା ଦେଇଥିଲେ। www.recite.world ୱେବ୍/ମୋବାଇଲ୍ ଆପ୍ଲିକେଶନ୍ରେ ଆମର ଅତୀତ ଏବଂ ବର୍ତ୍ତମାନର ବିଭିନ୍ନ ସାହିତି୍ୟକ କାର୍ଯ୍ୟକ୍ରମଗୁଡ଼ିକ ସହଜରେ ଓ ମାଗଣାରେ ଉପଲବ୍ଧ ହେବ। ଯେକୌଣସି ସ୍ଥାନରେ, ଯେକୌଣସି ସମୟରେ ଏହାକୁ ଲୋକମାନେ ଦେଖିପାରିବେ। ଦର୍ଶକଙ୍କ ମଧ୍ୟରେ ଆଦୃତି ପାଇବା ପାଇଁ ଏହା ଅଡିଓ ବୁକ୍ ଫର୍ମାଟରେ ମଧ୍ୟ ଉପଲବ୍ଧ ବୋଲି ଜଗ୍ଦେବ କହିଥିଲେ। ଲେଖକଙ୍କ ପ୍ରଥମ ବ୍ଲକରେ ଫକୀରମୋହନ ସେନାପତି, ଗୋଦାବରୀଶ ମହାପାତ୍ର, ଲକ୍ଷ୍ମୀକାନ୍ତ ମହାପାତ୍ର, ଭଗବତୀ ଚରଣ ପାଣିଗ୍ରାହୀ, ସୁରେନ୍ଦ୍ର ମହାନ୍ତି ଏବଂ ଅଖିଲ ମୋହନ ପଟ୍ଟନାୟକଙ୍କ ପରି ମହାନ ଲେଖକମାନଙ୍କର ୫୦ଟି କ୍ଷୁଦ୍ର ଗଳ୍ପ ଚୟନ କରି ଉପସ୍ଥାପିତ କରାଯାଇଛି। ପରବର୍ତ୍ତୀ ସମୟରେ ନୂତନ ଏବଂ ଆଧୁନିକ ସାହିତ୍ୟର ବିଭିନ୍ନ କୃତି ପ୍ରକାଶ କରାଯିବ ବୋଲି ଜଗଦେବ କହିଛନ୍ତି। କାର୍ଯ୍ୟକ୍ରମରେ ଅତିଥିଭାବେ ଇଷ୍ଟର୍ନ ମିଡିଆ ଲିମିଟେଡ୍ର କାର୍ଯ୍ୟନିର୍ବାହୀ ନିର୍ଦ୍ଦେଶକ ତନୟା ପଟ୍ଟନାୟକ ଏବଂ ମୋ ସ୍କୁଲ୍ ଅଭିଯାନର ଚେୟାରମ୍ୟାନ୍ ଏସ୍. ସୁସ୍ମିତା ବାଗଚି ଉପସ୍ଥିତ ଥିଲେ।