କେନ୍ଦୁଝର,୫।୧(ସ୍ବ.ପ୍ର.): ରାଜ୍ୟପାଳ ପ୍ରଫେସର ଗଣେଶୀ ଲାଲ ଶୁକ୍ରବାର କେନ୍ଦୁଝର ଗସ୍ତରେ ଯିବାର କାର୍ଯ୍ୟକ୍ରମ ରହିଛି। ସେ ଭୁବନେଶ୍ୱର ବିମାନବନ୍ଦରରୁ ସ୍ବତନ୍ତ୍ର ହେଲିକପ୍ଟର ବାହାରି ଯୋଡା ଟିସ୍କୋ ହେଲିପ୍ୟାଡ୍ରେ ପହଞ୍ଚିବେ। ସେଠାରୁ ସେ ଯୋଡା ଭ୍ୟୁକୁ ଯାଇ କିଛି ସମୟ ବିଶ୍ରାମ କରିବା ପରେ ଯୋଡା ଇଷ୍ଟ ଟାଉନଶିପ୍ରେ ଥିବା ଦୁର୍ଗାପୂଜା ମଣ୍ଡପକୁ ଯାଇ ଭ୍ୟାଲି ବୁକ୍ ଫେୟାରକୁ ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି। ସେଠାରୁ ଆଦିବାସୀ ବିକାଶ ସମିତିକୁ ଯାଇ ପଦ୍ମଶ୍ରୀ ତୁଳସୀ ମୁଣ୍ଡାଙ୍କୁ ସାକ୍ଷାତ କରିବା ସହ ସେଠାରେ ପଢୁଥିବା ପିଲାଙ୍କ ସହିତ ଆଲୋଚନା କରି କିଛି ସମୟ ବିତାଇବେ। ଏହାପରେ ଯୋଡା ଫେରି ହେଲିକପ୍ଟରରେ ପୁରୀ ଯିବେ ବୋଲି ସୂଚନା ମିଳିଛି।