ସୋନପୁର,୨୯।୧(ମୃତ୍ୟୁଞ୍ଜୟ ଶତପଥୀ): ରାଜ୍ୟପାଳ ରଘୁବର ଦାସ ସୋମବାର ଦିନିକିଆ ସୁବର୍ଣ୍ଣପୁର ଜିଲା ଗସ୍ତ କରିଥିଲେ। ବଲାଙ୍ଗୀର ଜିଲା ଗସ୍ତ ସାରି ପୂର୍ବାହ୍ନ ପ୍ରାୟ ୧୦ଟାରେ ରାଜ୍ୟପାଳ ସୋନପୁର ବ୍ଲକ ହରଡଖୋଲ ପଥପାର୍ଶ୍ୱ ସୁବିଧା କେନ୍ଦ୍ରରେ ମହିଳା ସ୍ବୟଂ ସହାୟକ ଗୋଷ୍ଠି ସଦସ୍ୟଙ୍କ ସହ ଆଲୋଚନା କରିଥିଲେ। ପରେ ସୋନପୁର କେନ୍ଦ୍ରୀୟ ବିଦ୍ୟାଳୟଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପରୀକ୍ଷା ପେ ଚର୍ଚ୍ଚା(ପିପିସି) ୨୦୨୪ କାର୍ଯ୍ୟକ୍ରମରେ ଛାତ୍ରୀଛାତ୍ରଙ୍କ ସହ ସାମିଲ ହୋଇଥିଲେ।
ରାଜ୍ୟପାଳ ବିଦ୍ୟାଳୟର ଛାତ୍ରୀଛାତ୍ରଙ୍କ ସହିତ ଏକାଠି ବସି ଭିଡିଓ କନ୍ଫେରେନ୍ସିଂ ଯୋଗେ କାର୍ଯ୍ୟକ୍ରମକୁ ଦେଖିଥିଲେ। ରାଜ୍ୟପାଳଙ୍କ ସହ କାର୍ଯ୍ୟକ୍ରମ ଦେଖି ଛାତ୍ରୀଛାତ୍ର ବେଶ ଖୁସି ଅନୁଭବ କରିଥିଲେ। ଛାତ୍ରୀଛାତ୍ରଙ୍କ ମଧ୍ୟରେ ପରୀକ୍ଷା ସହ ଜଡିତ ଚାପକୁ ଦୂର କରିବା ପାଇଁ ରାଜ୍ୟପାଳ ପରାମର୍ଶ ଦେଇଥିଲେ। ପରେ ସୋନପୁର ବ୍ଲକ ରୁଗୁଡିପାଲି ଅଙ୍ଗନଓ୍ବାଡି କେନ୍ଦ୍ର ପରିଦର୍ଶନ କରିବା ସହ ପୋଷଣ କାର୍ଯ୍ୟକ୍ରମ ସମ୍ପର୍କରେ ସମ୍ପୃକ୍ତ କର୍ମୀ ଓ ଶିଶୁଙ୍କ ମାତାପିତାଙ୍କ ସହ ଆଲୋଚନା କରିଥିଲେ। ସେଠାରୁ ରେଙ୍ଗାଲି ପଞ୍ଚାୟତର ବାଙ୍କତେନ୍ତୁଳି ଗାଁକୁ ଯାଇ ଗ୍ରାମବାସୀ ଓ କୃଷକଙ୍କ ସହ ବିଭିନ୍ନ ପ୍ରସଙ୍ଗ ଏବଂ ସରକାରଙ୍କ ଯୋଜନା ସମ୍ପର୍କରେ ଆଲୋଚନା କରିଥିଲେ। ମଧ୍ୟାହ୍ନରେ ରାଜ୍ୟପାଳ ବିନିକା ବ୍ଲକର କର୍ତ୍ତଙ୍ଗ ଗ୍ରାମରେ ପହଞ୍ଚି ପ୍ରଧାନମନ୍ତ୍ରୀ ଆବାସ ଯୋଜନା ଗ୍ରାମୀଣ ସମ୍ପର୍କରେ ଗ୍ରାମବାସୀଙ୍କ ସହ ଆଲୋଚନା କରିବା ସହ ମହିଳା ସଶକ୍ତିକରଣ, କୃଷି ଓ ଶିକ୍ଷାର ବିକାଶ ଉପରେ ଗୁରୁତ୍ୱାରୋପ କରିଥିଲେ।
ପରେ କର୍ତ୍ତଙ୍ଗ ଉଚ୍ଚ ବିଦ୍ୟାଳୟ ସୁବର୍ଣ୍ଣ ଜୟନ୍ତୀ ଉତ୍ସବରେ ମୁଖ୍ୟ ଅତିଥିଭାବେ ଯୋଗଦେଇ ରାଷ୍ଟ୍ର ନିର୍ମାଣରେ ଶିକ୍ଷାର ମହତ୍ତ୍ୱ ସବୁଠାରୁ ଅଧିକ ବୋଲି କହିଥିଲେ। ଓଡ଼ିଶାରେ ୪୯ପ୍ରତିଶତ ଛାତ୍ରୀଛାତ୍ର ଅଧାରୁ ପାଠ ଛାଡୁଛନ୍ତି। ଏହା ଚିନ୍ତାଜନକ ବିଷୟ। କେବଳ ସରକାର ଚାହିଁଲେ ହେବନି। ଜନସାଧାରଣ, ବୁଦ୍ଧିଜୀବୀ ଓ ଅଭିଭାବକ ଏଥିପାଇଁ ଆଗେଇ ଆସିବା ଉଚିତ। ଶିକ୍ଷାର ବିକାଶ ପାଇଁ ଜନଆନ୍ଦୋଳନ ସକାଶେ ରାଜ୍ୟପାଳ ଏହି ଅବସରରେ ଆହ୍ବାନ ଦେଇଥିଲେ। ସେହିପରି ନାରୀ ଶିକ୍ଷାର ପ୍ରସାର ଉପରେ ରାଜ୍ୟପାଳ ଗୁରୁତ୍ୱ ଦେବା ସହ ଝିଅ ଶିକ୍ଷିତା ହେଲେ ୨ ପରିବାର ଶିକ୍ଷିତ ଓ ସଂସ୍କାରୀ ହୋଇଥାଏ ବୋଲି ମତପ୍ରକାଶ କରିଥିଲେ। ଶିକ୍ଷା ରୋଜଗାର ଆଧାରିତ ହେବା ଆବଶ୍ୟକ। ନୂଆ ଶିକ୍ଷାନୀତି ଏ କ୍ଷେତ୍ରରେ ପରିବର୍ତ୍ତନ ଆଣିବ ବୋଲି ରାଜ୍ୟପାଳ ଆଶାପ୍ରକାଶ କରିଥିଲେ। ଏହି ଅବସରରେ ରାଜ୍ୟପାଳ ବିଦ୍ୟାଳୟର ଛାତ୍ରୀଛାତ୍ରଙ୍କ ସହିତ ଆଲୋଚନା କରିବା ସହ ସେମାନଙ୍କ ଭବିଷ୍ୟତ ଲକ୍ଷ୍ୟ ସମ୍ପର୍କରେ ପଚାରିଥିଲେ। ଶିକ୍ଷାବିତ୍ ମଧୁସୂଦନ ପତି ମୁଖ୍ୟବକ୍ତାଭାବେ ଯୋଗଦେଇ ଛାତ୍ରୀଛାତ୍ରଙ୍କୁ ଭଲ ମଣିଷ ହେବାକୁ ପରାମର୍ଶ ଦେଇଥିଲେ। ଜୟନ୍ତୀ ପାଳନ କମିଟି ଅଧ୍ୟକ୍ଷ ରଘୁମଣି ଦେହୁରୀ ସ୍ବାଗତ ଭାଷଣ ପ୍ରଦାନ କରିଥିଲେ। ଜିଲାପାଳ ବିମଳେନ୍ଦୁ ରାୟ, ପ୍ରେମାନନ୍ଦ ହୋତା ମଞ୍ଚାସୀନ ଥିଲେ। ଘାସିରାମ ପଣ୍ଡା ସଭା ସଂଯୋଜନା କରିଥିଲେ।