ନୂଆଦିଲ୍ଲୀ,୧୮।୯: ସଂସଦର ସ୍ବତନ୍ତ୍ର ଅଧିବେଶନ ସୋମବାରରୁ ଆରମ୍ଭ ହୋଇଛି। ଅଧିବେଶନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଣମାଧ୍ୟମକୁ ସମ୍ବୋଧିତ କରିଥିଲେ ଏବଂ ଏହା ପରେ ପୁରୁଣା ସଂସଦରେ ଭାଷଣ ଦେଇଥିଲେ। ସଂସଦର ସ୍ବତନ୍ତ୍ର ଅଧିବେଶନରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ଶକ୍ତିଶାଳୀ ବିରୋଧୀଙ୍କୁ ଦୁର୍ବଳ କରିବା ପାଇଁ ସରକାର ଇଡି ଏବଂ ସିବିଆଇ ବ୍ୟବହାର କରୁଛନ୍ତି ବୋଲି ଖାର୍ଗେ ଅଭିଯୋଗ କରିଛନ୍ତି।
ସେ କହିଛନ୍ତି, ଯଦି ଭାଜପା କୌଣସି ନେତାଙ୍କୁ ଦଳର ସାମିଲ କରିବାକୁ ଚାହୁଁଛି, ତେବେ ତାଙ୍କୁ ୱାଶିଂ ମେସିନରେ ପକାଇ କ୍ଲିନ୍ କରି ଦିଆଯାଉଛି। ପ୍ରଧାନମନ୍ତ୍ରୀ ବେଳେବେଳେ ସଂସଦକୁ ଆସନ୍ତି ଏବଂ କାର୍ଯ୍ୟକ୍ରମ ଆୟୋଜନ କରିବା ପରେ ଚାଲିଯାଆନ୍ତି। ମଣିପୁର ଜଳୁଛି। ମେ ୩ରୁ ସେଠାରେ ଦଙ୍ଗା ଘଟୁଛି। ସେଠାରେ ମଧ୍ୟ ଲୋକଙ୍କୁ ହତ୍ୟା କରାଯାଉଛି, ଘର ପୋଡି ଦିଆଯାଉଛି। ଆଜି ବି ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଛି। ଏ ବିଷୟରେ ଏକ ଆଲୋଚନା ହେବା ଉଚିତ୍ ଏବଂ ପ୍ରଧାନମନ୍ତ୍ରୀ ଏହା ଉପରେ ଏକ ବିବୃତ୍ତି ଦେବା ଆବଶ୍ୟକ। ପ୍ରଧାନ୍ତdନ୍ତ୍ରୀ ଦେଶର ପ୍ରତ୍ୟେକ କୋଣକୁ ଯାଆନ୍ତି, କିନ୍ତୁ ସେ ମଣିପୁରକୁ କାହିଁକି ଯାଉନାହାଁନ୍ତି?
ଖାର୍ଗେ ଆହୁରି ମଧ୍ୟ କହିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ତାଙ୍କ କାର୍ଯ୍ୟକାଳ ମଧ୍ୟରେ ମୋଟ ୨୧ ଥର ବିବୃତ୍ତି ଦେଇଛନ୍ତି। ଏଥି ସହିତ ମନମୋହନ ସିଂ ୩୦ଥର ବିବୃତ୍ତି ଦେଇଛନ୍ତି, କିନ୍ତୁ ବର୍ତ୍ତମାନର ପ୍ରଧାନମନ୍ତ୍ରୀଙ୍କ ପାରମ୍ପରିକ ବିବୃତ୍ତିକୁ ଛାଡି ୯ ବର୍ଷ ମଧ୍ୟରେ କେବଳ ଦୁଇଥର ବିବୃତ୍ତି ଦେଇଛନ୍ତି।