ଝାରସୁଗୁଡ଼ା ଅଫିସ,୧୭ା୧୨: ଏନ୍ଏଲ୍ସି ଇଣ୍ଡିଆ ଲିଃର ତଲାବିରା ଦ୍ୱିତୀୟ ଓ ତୃତୀୟ କୋଇଲା ଖଣି ଦ୍ୱାରା ବିସ୍ଥାପିତ ପରିବାରଙ୍କ ପୁନର୍ବାସ ଓ ଥଇଥାନ ନେଇ ଜିଲା ପ୍ରଶାସନ ତରଫରୁ ପତ୍ରାପାଲି ଗ୍ରାମରେ ଶୁକ୍ରବାର ଗ୍ରାମସଭା ଅନୁଷ୍ଠିତ ହୋଇଥିଲା। ଏଥିରେ ଉପଜିଲାପାଳ ଦୟାମୟ ପାଢୀ ଅଧ୍ୟକ୍ଷତା କରିଥିବାବେଳେ ତହସିଲଦାର ବସନ୍ତ ହାତୀ, ଏସିଏଫ୍ ସସ୍ମିତା ସାହୁ, ରେଞ୍ଜର ରମେଶ ଚନ୍ଦ୍ର ନାଥ, ଏବିଡିଓ ଭଜ ମୋହନ କିଷାନ, ଏସ୍ଡିପିଓ ନିର୍ମଳ ମହାପାତ୍ର, ଆଇଆଇସି ଅମିତାଭ ପଣ୍ଡା, ସରପଞ୍ଚ ଖଗେଶ୍ୱର ନାୟକ, ସମିତି ସଭ୍ୟ ଗଣେଶ୍ୱର ରାଉତ, ଏନ୍ଏଲ୍ସି କମ୍ପାନୀର ସିଜିଏମ୍ ହେମନ୍ତ କୁମାର ପ୍ରମୁଖ ଯୋଗଦେଇଥିଲେ।
ପ୍ରାରମ୍ଭରେ ଉପଜିଲାପାଳ ପାଢୀ ସୂଚନା ଦେଇ କହିଥିଲେ, ୨ୟ ଓ ୩ୟ ଖଣି ଉତ୍ତୋଳନ ପାଇଁ ୨୦୧୩ ମସିହା ଗଣନା ଅନୁଯାୟୀ ଝାରସୁଗୁଡା ବନଖଣ୍ଡ ଅନ୍ତର୍ଗତ ପତ୍ରାପାଲି ଓ ମଲଦା ପଞ୍ଚାୟତର ୮୪୫ ହେକ୍ଟର ଜଙ୍ଗଲରୁ ୧ଲକ୍ଷ ୨୦ହଜାର ଗଛ କଟିବ। ପ୍ରଥମ ପର୍ଯ୍ୟାୟରେ ୧୩ ହେକ୍ଟର ଜଙ୍ଗଲରୁ ୧,୫୨୮ବଡ ଓ ୨ହଜାରରୁ ଊର୍ଦ୍ଧ୍ୱ ଛୋଟ ଗଛ କଟାଯିବ। ବିସ୍ଥାପିତ ପରିବାରଙ୍କ ପୁନର୍ବାସ ଓ ପୁନଃ ଥଇଥାନକୁ ନେଇ ଗ୍ରାମସଭାର ଆୟୋଜନ କରାଯାଇଛି ବୋଲି ସେ କହିଥିଲେ। ଏହା ଶୁଣିବାପରେ ୯ଜଣ ଗ୍ରାମବାସୀ ସେମାନଙ୍କ ମତ ରଖିଥିଲେ। ସେମାନେ ଅଭିଯୋଗ କରିଥିଲେ, ଗ୍ରାମର ୨୪୦ପରିବାର ହୀରାକୁଦ ନଦୀବନ୍ଧ ଯୋଜନାରେ ବିସ୍ଥାପିତ ହୋଇଥିବାବେଳେ ଦୀର୍ଘ ୬ଦଶନ୍ଦି ହେଲାଣି ଅଦ୍ୟାବଧି ସେମାନଙ୍କୁ ୧୦ ଡେସିମିଲ୍ ଘର ଡିହ ଯୋଗାଇ ଦିଆଯାଇନାହିଁ ା ଏଦିଗରେ ପୁନଃ ସର୍ଭେ କରାଯାଇ ଘରଡିହ ଜମି ସହ ଉପଯୁକ୍ତ କ୍ଷତିପୂରଣ ଦିଆଯିବବୋଲି ଉପଜିଲାପାଳ ପାଢୀ କହିଥିଲେ। ଏହାଛଡା କମ୍ପାନୀ ଦ୍ୱାରା ବିସ୍ଥାପିତ ହେବାକୁଥିବା ଲୋକଙ୍କୁ ଏକକାଳୀନ କ୍ଷତିପୂରଣ ପ୍ରଦାନ, ଗ୍ରାମର ବିକାଶପାଇଁ କମ୍ପାନୀ ଓ ଗ୍ରାମବାସୀଙ୍କୁ ନେଇ ଉନ୍ନୟନ କମିଟି ଗଠନ, କାଇଲା ଉତ୍ତୋଳନ ପରେ ଗର୍ତ୍ତକୁ ମାଟି ଭର୍ତ୍ତିକରି ବୃକ୍ଷରୋପଣ କରିବା, ବେକାର ଯୁବତୀ ଯୁବକଙ୍କୁ ପ୍ରଶିକ୍ଷଣ ଦିଆଯାଇ ଯୋଗ୍ୟତା ଭିତ୍ତିକ ନିଯୁକ୍ତି, ଜଙ୍ଗଲ କାଟିବା ପରେ ଗଛର ମୂଲ୍ୟରୁ କିଛି ଅର୍ଥ ଗ୍ରାମବାସୀଙ୍କୁ ପ୍ରଦାନ, କମ୍ପାନୀ ତରଫରୁ ରୋଜଗାରର ବ୍ୟବସ୍ଥା ଆଦି ଦାବି ହୋଇଥିଲା ା ଏହିସବୁ ଦାବି ପୂରଣ ନ ହେଲେ ଗଛ କାଟିବାକୁ ଦିଆଯିବ ନାହିଁ ବୋଲି ଗ୍ରାମବାସୀ ଜଣାଇଥିଲେ ା ଏ ନେଇ ଉପଜିଲାପାଳ ପାଢୀ କହିଛନ୍ତି, ଗ୍ରାମସଭାରେ ସକରାମତ୍କ ଆଲୋଚନା ହୋଇଛି। ଆଗକୁ ଏହି ପ୍ରକ୍ରିୟା ଜାରି ରହିବ।