ପଢ଼ିବା ଏବଂ ଲେଖିବା ପାଇଁ ବୟସର କୌଣସି ସୀମା ନ ଥାଏ। ଏହାକୁ କିଛି ଲୋକ ଗମ୍ଭୀରତାର ସହ ନେଇ ନିଜ ଇଚ୍ଛାଶକ୍ତି ବଳରେ ଏହାକୁ ପ୍ରମାଣ ବି କରାଇଥାନ୍ତି। ସାଧାରଣତଃ କଲେଜ ପାଠପଢ଼ା ୨୦-୨୨ ବର୍ଷ ମଧ୍ୟରେ ଶେଷ ହୋଇଯାଏ। ଅଧିକାଂଶ ଲୋକ ଭାବନ୍ତି ସେମାନେ ୩୦ ବର୍ଷରେ ପହଞ୍ଚିବା ବେଳକୁ ଶିକ୍ଷାର ବୟସ ବି ଶେଷ ହୋଇଯାଏ। ପଢ଼ିବାକୁ ଇଚ୍ଛା ନ ଥାଏ। ମାତ୍ର ଏମିତି କିଛି ଲୋକ ଅଛନ୍ତି, ଯେଉଁମାନେ ବୟସ ନ ଦେଖି ପାଠପଢ଼ାରେ ମନ ଦିଅନ୍ତି ଆଉ ଏଥିରେ ସଫଳ ମଧ୍ୟ ହୋଇଥାନ୍ତି। ଏହି ଯେମିତି ୮୭ ବର୍ଷୀୟ ଭାରତୀୟ ମୂଳ ଜେଜେମା ଏହାକୁ ବାସ୍ତବରେ ପରିଣତ କରିଛନ୍ତି। ଯାହାକି ଦୁନିଆର ଲୋକଙ୍କ ପାଇଁ ଏକ ଉଦାହରଣ ପାଲଟିଛି।
ଭାରତୀୟ ମୂଳ କାନାଡୀୟ ଭାର୍ଥା ଶନମୁଗନାଥନ ୮୭ ବର୍ଷ ବୟସରେ ଦ୍ୱିତୀୟ ଥର ପାଇଁ ମାଷ୍ଟର ଡିଗ୍ରୀ ହାସଲ କରି ଇତିହାସ ରଚିଛନ୍ତି। ଏଥିପାଇଁ ସେ ଦୁନିଆର ସବୁଠାରୁ ବୟସ୍କା ମହିଳା ହୋଇପାରିଛନ୍ତି। ଯେଉଁଥିପାଇଁ ତାଙ୍କୁ ଅଣ୍ଟାରିଓ ବିଧାନସଭାରେ ସମ୍ମାନିତ କରାଯାଇଛି। ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ଏହା ପୂର୍ବରୁ ମଧ୍ୟ ଭାରଥା ମାଷ୍ଟର ଡିଗ୍ରୀ କରିଥିଲେ। ଏହା ଦ୍ୱିତୀୟ ଥର। ପ୍ରଥମ ମାଷ୍ଟର ଡିଗ୍ରୀ ପାସ୍ କରିବା ପରେ ତାଙ୍କର ଆଗ୍ରହ ଆହୁରି ବଢ଼ିଥିଲା। ସେ କେବଳ ସୁଯୋଗକୁ ଅପେକ୍ଷା କରିଥିଲେ ବୋଲି କୁହନ୍ତି। ଏହାପୂର୍ବରୁ ସେ ୫୦ ବର୍ଷ ବୟସରେ ଲଣ୍ଡନ ବିଶ୍ୱବିଦ୍ୟାଳୟରୁ ମାଷ୍ଟର ଡିଗ୍ରୀ ସମାପ୍ତ କରିଥିଲେ। ଏବେ ୮୭ ବର୍ଷରେ ପୁଣି ଥରେ ମାଷ୍ଟର ଡିଗ୍ରୀ ହାସଲ କରିଛନ୍ତି।
