ରାୟଗଡା ଅଫିସ,୨୫।୬-ରାୟଗଡ଼ା ସହରସ୍ଥିତ ତୁମ୍ବିଗୁଡ଼ା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ବିଦ୍ୟୁତ୍ ସଂସ୍ପର୍ଶରେ ଆସି ଗୁରୁବାର ଜେଜେମା ଓ ନାତୁଣୀଙ୍କ ମୃତ୍ୟୁ ଘଟିଛି। ମୃତକ ହେଲେ ବାଙ୍ଗାରାମା ମାଣ୍ଡାଙ୍ଗୀ (୭୦) ଓ ତପସ୍ବିନୀ ମାଣ୍ଡାଙ୍ଗୀ।
ଘଟଣାରୁ ଜଣାପଡ଼ିଛି, ବାଙ୍ଗାରାମା ଘରେ ଥିବା କରେଣ୍ଟ ବୋର୍ଡ଼ ନିକଟରେ ଲୁଗା ସୁଖାଇବା ପାଇଁ ଏକ ତାର ବନ୍ଧା ଯାଇଥିଲା। ଦୁର୍ଭାଗ୍ୟବଶତଃ ସୁଖାଇବା ପାଇଁ ବନ୍ଧା ଯାଇଥିବା ତାରଟି କରେଣ୍ଟ ବୋର୍ଡ଼ ସଂସ୍ପର୍ଶରେ ଆସିଥିଲା। ପୂର୍ବାହ୍ନରେ ଲୁଗା ଧୋଇ ସାରି ଉଭୟେ ଜେଜେମା ଓ ନାତୁଣୀ ସୁଖାଇବା ସମୟରେ ବିଦ୍ୟୁତ୍ ସଂସ୍ପର୍ଶରେ ଆସି ଗୁରୁତର ହୋଇଥିଲେ। ପରେ ଗ୍ରାମବାସୀ ଉଭୟଙ୍କୁ ଉଦ୍ଧାର କରି ରାୟଗଡା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।