ମୁନ୍ସୀ ପ୍ରେମଚାନ୍ଦ ତାଙ୍କ କାହାଣୀ ‘ବୁଢ଼ୀ କାକି’ରେ କହିଥିଲେ, ବୃଦ୍ଧାବସ୍ଥା ପ୍ରାୟତଃ ପିଲାଦିନକୁ ଫେରିବା ପରି ହୋଇଥାଏ। ଯେତେବେଳେ ଲୋକମାନେ ବୃଦ୍ଧ ହେବା ଆରମ୍ଭ କରନ୍ତି, ସେମାନେ ପୁନର୍ବାର ପିଲାମାନଙ୍କ ପରି ଅଭିନୟ ଆରମ୍ଭ କରନ୍ତି। ଛୋଟ ଜିନିଷ ସେମାନଙ୍କୁ ଆନନ୍ଦ ଆଣିଦିଏ। ସେମାନେ ଶୀଘ୍ର ଆଘାତ ପାଆନ୍ତି ଏବଂ ସହଜରେ ବିରକ୍ତ ହୁଅନ୍ତି। ପିଲାମାନଙ୍କ ପରି ଯଦି କିଛି ଉପହାର ଦିଆଯାଏ ସେମାନେ ବହୁତ ଖୁସି ହୁଅନ୍ତି। ସେହିଭଳି ଜଣେ ବୃଦ୍ଧାଙ୍କ ସହିତ ଘଟିଛି।
ଇନଷ୍ଟାଗ୍ରାମ୍ ଆକାଉଣ୍ଟରେ ‘ଗୁଡ ନ୍ୟୁଜ୍ ମୁଭମେଣ୍ଟ’ରେ ଏକ ଭିଡିଓ ଶେୟାର କରାଯାଇଛି। ଯାହା ଖୁବ୍ ଭାଇରାଲ ହେବାରେ ଲାଗିଛି। ଭିଡିଓରେ ଜଣେ ଜେଜେମା’ଙ୍କୁ ତାଙ୍କ ନାତୁଣୀ ଏକ କଣ୍ଢେଇ ଉପହାର ଦେଇଥିଲେ। ଏହି ପ୍ୟାକେଟ ଖୋଲିବା ପରେ ଜେଜେମା’ ଭାବବିହ୍ବଳ ହୋଇପଡୁଥିବା ଦେଖିବାକୁ ମିଳିଛି। ଠିକ୍ ଏକ କୁନି ପିଲା ପରି ସେ ଖୁସି ହେଉଛନ୍ତି।
ଆମେ ଯେତେବେଳେ ଛୋଟ ଥାଉ, ଆମର ଜେଜେମା’-ଜେଜେବାପାମାନେ ଆମର ଯତ୍ନ ନିଅନ୍ତି, ଆମକୁ ଭଲ ପାଆନ୍ତି, କିନ୍ତୁ ଯେତେବେଳେ ଆମେ ବଡ଼ ହୋଇଥାଉ, ସେତେବେଳେ ଜେଜେମା’ କିମ୍ବା ଜେଜେବାପାଙ୍କର ଯତ୍ନ ନେବା ଆମର କର୍ତ୍ତବ୍ୟ ହୋଇଥାଏ।
ଭିଡିଓରେ ଜେଜେମା ନାତୁଣୀକୁ କହୁଛନ୍ତି, ତାଙ୍କୁ ଉପହାର ଦେବା କୌଣସି ଆବଶ୍ୟକତା ନାହିଁ, ସେ ଏତେ ଦୂରରୁ ତାଙ୍କୁ ଭେଟିବାକୁ ଆସିଛନ୍ତି, ତାହା ହେଉଛି ବଡ଼ କଥା। ସେ ଉପହାର ଖୋଲିବା ମାତ୍ରେ ରଖାଯାଇଥିବା ଜିନିଷକୁ ଦେଖିବା ମାତ୍ରେ ତାଙ୍କ ମୁହଁରେ ଏକ ସୁନ୍ଦର ହସ ଫୁଟିଉଠୁଛି। ସେ ପ୍ୟାକେଟ ଭିତର କଣ୍ଡେଇକୁ ଦେଖି କହିଲେ ଏମିତି କଣ୍ଢେଇ କେଉଁଠି ନାହିଁ। ଏହା ପରେ ନାତୁଣୀକୁ ଧନ୍ୟବାଦ ଦେଇ କହୁଛନ୍ତି, ସେ ଛୋଟବେଳେ ଏମିତି କଣ୍ଢେଇକୁ ଭଲ ପାଉଥିଲେ।
ଏହି ଭିଡିଓ ବର୍ତ୍ତମାନ ସୁଦ୍ଧା ୬ ଲକ୍ଷରୁ ଅଧିକ ଭ୍ୟୁ ପାଇଛି। ଅନେକ ୟୁଜର ସେମାନଙ୍କର ମତାମତ ମଧ୍ୟ ଦେଇଛନ୍ତି। ଜଣେ ୟୁଜର କହିଛନ୍ତି, ବୃଦ୍ଧାଙ୍କ ପାଇଁ ଏହା ନିଶ୍ଚିତ ଭାବରେ ଏକ ଭାବପ୍ରବଣ ମୁହୂର୍ତ୍ତ ଥିଲା। କାରଣ ନାତୁଣୀ ଦେଇଥିବା ଉପହାର ପୁରୁଣା କାଳରେ ବହୁତ ପ୍ରସିଦ୍ଧ ଥିଲା।