ଗୁଣପୁର,୫ା୪ (ପ୍ରଦୀପ କୁମାର ପାଢ଼ୀ):ରାୟଗଡ଼ା ଜିଲା ଗୁଣପୁର ବିଧାନସଭା ନିର୍ବାଚନମଣ୍ଡଳୀର ୩ ପ୍ରମୁଖ ରାଜନୈତିକ ଦଳ ପକ୍ଷରୁ ପ୍ରାର୍ଥୀ ଘୋଷଣା ହୋଇସାରିଛି। ବିଜେଡି ପକ୍ଷରୁ ରଘୁନାଥ ଗମାଙ୍ଗ, କଂଗ୍ରେସର ସତ୍ୟଜିତ ଗମାଙ୍ଗ ଏବଂ ଭାଜପାର ତ୍ରିନାଥ ଗମାଙ୍ଗ ପ୍ରାର୍ଥୀ ହୋଇଛନ୍ତି। ତେବେ ୩ ପ୍ରମୁଖ ଦଳର ପ୍ରାର୍ଥୀମାନେ ଗୋଟିଏ ପରିବାରର ଏବଂ ପରସ୍ପରର ସମ୍ପର୍କୀୟ ହୋଇଥିବାରୁ ଗୁଣପୁର ରାଜନୀତି ବେଶ୍ ରୋଚକ ମୋଡ଼ ନେଇଛି। ପୂର୍ବରୁ ପୂର୍ବତନ ମୁଖ୍ୟମନ୍ତ୍ରୀ ଡ. ଗିରିଧର ଗମାଙ୍ଗଙ୍କ ପରିବାର ରାଜନୀତିକୁ ନେଇ ଚର୍ଚ୍ଚା ରହିଛି। ହେଲେ ଚଳିତ ନିର୍ବାଚନରେ ତାଙ୍କ ପରିବାରର ସ୍ତ୍ରୀ ହେମା ଗମାଙ୍ଗ କିମ୍ବା ପୁଅ ଶିଶିର ଗମାଙ୍ଗଙ୍କୁ ଟିକେଟ ମିଳି ନ ଥିବାରୁ ସେମାନେ ଅସନ୍ତୋଷ ପ୍ରକାଶ କରିଛନ୍ତି। ହେଲେ ଚଳିତ ନିର୍ବାଚନରେ ପ୍ରତିଦ୍ବନ୍ଦ୍ୱିତା କରୁଥିବା ପ୍ରାର୍ଥୀମାନଙ୍କର ଗିରିଧର ଗମାଙ୍ଗଙ୍କ ପରିବାର ସହ ପାରିବାରିକ ସମ୍ପର୍କ ରହିଛି ା ଭାଜପା ପ୍ରାର୍ଥୀ ତ୍ରିନାଥ ଗମାଙ୍ଗ ହେଉଛନ୍ତି ହେମା ଗମାଙ୍ଗଙ୍କ ଭାଇ। ଅନ୍ୟପକ୍ଷରେ ବିଜେଡିର ରଘୁନାଥ ଗମାଙ୍ଗ, କଂଗ୍ରେସର ସତ୍ୟଜିତ ଗମାଙ୍ଗ ଏବଂ ତ୍ରିନାଥ ଗମାଙ୍ଗ ମଧ୍ୟରେ ପାରିବାରିକ ସମ୍ପର୍କ ରହିଛି। ବିଜେଡି ପ୍ରାର୍ଥୀ ରଘୁନାଥ ଗମାଙ୍ଗ ଦାଦା ହୋଇଥିବାବେଳେ ଭାଜପାରୁ ପ୍ରତିଦ୍ୱନ୍ଦ୍ୱିତା କରୁଥିବା ତ୍ରିନାଥ ଗମାଙ୍ଗ ତାଙ୍କ ପୁତୁରା। ସେହିପରି ରଘୁନାଥଙ୍କ ସହ କଂଗ୍ରେସ ପ୍ରାର୍ଥୀ ସତ୍ୟଜିତଙ୍କ ଅଜା ନାତିର ସମ୍ପର୍କ ରହିଛି। ଭାଜପାର ତ୍ରିନାଥ ଏବଂ କଂଗ୍ରେସର ସତ୍ୟଜିତଙ୍କ ମଧ୍ୟରେ ମାମୁ-ଭଣଜାର ସମ୍ପର୍କ ରହିଥିବା ଜଣାପଡ଼ିଛି।
ରଘୁନାଥଙ୍କୁ ବିଜେଡି ରିପିଟ୍ କରିଥିବାବେଳେ ତ୍ରିନାଥ ନିକଟରେ ବିଜେଡି ଛାଡ଼ି ଭାଜପାରେ ଯୋଗଦେଇ ପ୍ରାର୍ଥୀ ହୋଇଛନ୍ତି। ହେଲେ ସତ୍ୟଜିତ କଂଗ୍ରେସ ପାଇଁ ନବାଗତ। ୩ ପ୍ରମୁଖ ପ୍ରାର୍ଥୀ ନିଜ ନିଜ ଦଳର ସଫଳତାକୁ ଆୟୁଧ କରିବା ସହ ବିରୋଧୀ ବିଫଳତାକୁ ନେଇ ନିର୍ବାଚନ ବୈତରଣୀ ପାର କରିବାକୁ ଚେଷ୍ଟା ଚଳାଇଛନ୍ତି। ଗତ ନିର୍ବାଚନରେ କମ୍ ଭୋଟ ବ୍ୟବଧାନ ରହିଥିବାରୁ ବିଜେଡି ପାଇଁ ଗଡ଼ ବଞ୍ଚାଇବା ଚ୍ୟାଲେଞ୍ଜ ହୋଇପଡ଼ିଛି। ସେହିପରି ବିରୋଧୀ କଂଗ୍ରେସକୁ ପୁନର୍ବାର ଗଡ଼ ଅକ୍ତିଆର କରିବାର ଚିନ୍ତା ଘାରିଛି। ତେବେ ଭାଜପା ଦୁଇ ଜଣଙ୍କୁ ଟକ୍କର ଦେଇ ବିଜୟ ଲକ୍ଷ୍ୟରେ ରହିଛି।