ମାଲକାନଗିରି,୧୯।୯(ଡି.ଏନ୍.ଏ.): ମାଲକାନଗିରି ଜିଲା ମୋଟୁ ଥାନାଧିକାରୀ ଏବଂ ପରିବହନ ଅଧିକାରୀ(ଆର୍ଟିଓ)ଙ୍କ ମିଳିତ ସହଯୋଗରେ ମୋଟୁ ତହସିଲ ଅଧୀନ ପେଟା ଗ୍ରାମରୁ ଭିଜି ଗ୍ରାନାଇଟ୍ ବେଆଇନ ପରିବହନ କରାଯାଇଥିବା ପୂର୍ବତନ ନବରଙ୍ଗପୁର ଏମ୍ପି ତଥା କଂଗ୍ରେସ ନେତା ପ୍ରଦୀପ ମାଝି ଅଭିଯୋଗ କରିଛନ୍ତି। ବେଣୁ ଗୋପାଳ(ଭିଜି) ଗ୍ରାନାଇଟର ୯ଟି ଗାଡ଼ି ଗ୍ରାନାଇଟ ପଥର ନେଇ ଓଡ଼ିଶା-ଆନ୍ଧ୍ର ସୀମାନ୍ତ ମୋଟୁ ଦେଇ ଶୁକ୍ରବାର ରାତିରେ ବାହାର ରାଜ୍ୟକୁ ପରିବହନ ହେଉଥିବାବେଳେ ମୋଟୁ ଥାନାଧିକାରୀ ଅଟକାଇ ଯାଞ୍ଚ କରିଥିଲେ। ପଥର ଚାଲାଣରେ ଅନିୟମିତତା ରହିଥିବା ଏବଂ କାଗଜପତ୍ର ଠିକ୍ ନ ଥିବା ନେଇ ଗାଡ଼ିଗୁଡ଼ିକୁ ଅଟକ ରଖିଥିଲେ। ତେବେ ପରବର୍ତ୍ତୀ ସମୟରେ ଗ୍ରାନାଇଟ୍ କମ୍ପାନୀ ପକ୍ଷରୁ ଥାନା ଓ ଆର୍ଟିଓ କାର୍ଯ୍ୟାଳୟରୁ ନକଲି ନଥିପତ୍ର ତିଆରି କରାଯାଇଥିବା ଏବଂ ସନ୍ଦେହଜନକ ଭାବେ ଅଟକ ରଖାଯାଇଥିବା ଗାଡ଼ିଗୁଡ଼ିକୁ ଛାଡ଼ି ଦିଆଯାଇଥିବା ନେଇ ରମେଶ ସିଧାସଳଖ ଅଭିଯୋଗ କରିଛନ୍ତି। ପୋଲିସ ଏବଂ ପ୍ରଶାସନକୁ ହାତବାରିସି କରି ଏଭଳି ବେଆଇନ ଚାଲାଣ ହେଉଥିବା ସେ କହିଛନ୍ତି। ବେଆଇନ ଖଣି କାରବାରରେ ସମ୍ପୃକ୍ତ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେ ଦାବି କରିଛନ୍ତି। ପ୍ରକାଶଯୋଗ୍ୟ, ଭିଜି ଗ୍ରାନାଇଟର ଖଣି ଖାଦାନ ଦୁର୍ନୀତିକୁ ନେଇ କିଛି ମାସ ତଳେ ବିବାଦ ସୃଷ୍ଟି ହୋଇଥିଲା। ଏହି ଘଟଣାରେ ମାଲକାନଗିରିର ପୂର୍ବତନ ଜିଲାପାଳ ଓ୍ବାଇ. ବିଜୟଙ୍କ ବଦଳି ହୋଇଥିବାବେଳେ ଏବେ ପୁଣି ଏହି ବିବାଦ ଘନେଇବାରେ ଲାଗିଛିା ନୂତନ ଜିଲାପାଳ ଏଦିଗରେ କିଭଳି ପଦକ୍ଷେପ ନେଉଛନ୍ତି ତାହାକୁ ସମସ୍ତଙ୍କ ଅପେକ୍ଷା।