ବ୍ରିସବେନ୍,୧୪।୧: ଆସନ୍ତା ଜାନୁୟାରୀ ୧୫ରୁ ବ୍ରିସବେନ୍ରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ବର୍ଡର-ଗାଭାସ୍କର ଟ୍ରଫିର ଶେଷ ମ୍ୟାଚ୍ ଖେଳାଯିବ। ଏହି ମ୍ୟାଚ୍ରେ ଅଷ୍ଟ୍ରେଲିଆ ଅଫ୍ ସ୍ପିନର୍ ନାଥାନ ଲିଅନଙ୍କ ପାଇଁ ଖାସ୍ ହେବ। କାରଣ ତାଙ୍କର ଏହା ୧୦୦ତମ ଟେଷ୍ଟ ହେବ। ଶେନ ୱାର୍ନଙ୍କ ପରେ ଅଷ୍ଟ୍ରେଲିଆ ସବୁଠାରୁ ସଫଳ ସ୍ପିନ ବୋଲର ନାଥନ ଲିଅନ। ଅଷ୍ଟ୍ରେଲିଆ ପାଇଁ ୯୯ ଟି ଟେଷ୍ଟରେ ୩୯୬ ଉଇକେଟ ନେଇଛନ୍ତି। ଏହି ବୋଲର ୧୫ ଥର ଇନିଂସରେ ୫ ଉଇକେଟ ନେଇଛନ୍ତି। ନାଥନ ଲିଅନ ମଧ୍ୟ ୩ ଥର ଗୋଟିଏ ମ୍ୟାଚରେ ୧୦ ଉଇକେଟ ନେଇଛନ୍ତି। ବହୁତ କମ ଲୋକ ଜାଣନ୍ତି ଯେ କ୍ରିକେଟର ହେବା ପୂର୍ବରୁ ନାଥନ ଲିଅନ ଜଣେ ଗ୍ରାଉଣ୍ଡମ୍ୟାନ ଥିଲେ। ନ୍ୟୁ ସାଉଥ ୱେଲ୍ସରେ ଜନ୍ମଗ୍ରହଣ କରିଥିବା ଅଫ ସ୍ପିନର ଜୁନିଅର କ୍ରିକେଟ ଖେଳିଥିଲେ କିନ୍ତୁ ଦୀର୍ଘ ସମୟ ଧରି କୌଣସି ସଫଳତା ହାସଲ କରି ନ ଥିଲେ। ନାଥନ ଲିଅନ ଆଡିଲେଡ ଓଭାଲ ଗ୍ରାଉଣ୍ଡରେ ଗ୍ରାଉଣ୍ଡ ଷ୍ଟାଫ ଚାକିରି ନେଇଥିଲେ। ନାଥନ ଲିଅନଙ୍କର କାମ ଥିଲା ପ୍ରତିଦିନ ପିଚ ଏବଂ ଗ୍ରାଉଣ୍ଡରେ ପାଣି ପହଞ୍ଚାଇବା। ସେ ପଡିଆରେ ଘାସର ଯତ୍ନ ନେଉଥିଲେ। କିନ୍ତୁ ୨୦୧୦-୧୧ ବର୍ଷରେ ଏକ ଅଭ୍ୟାସ ମ୍ୟାଚରେ ରେଡବ୍ୟାକ୍ରେ ଜଣେ ବୋଲର କମ ଥିଲେ। କେହି କେହି ରେଡବ୍ୟାକ କୋଚ ଡାରେନ ବ୍ୟାରିଙ୍କୁ କହିଥିଲେ ଯେ ପଡିଆରେ ପାଣି ଢାଳୁଥିବା ନାଥନ ଲିଅନ ଜଣେ ଭଲ ବୋଲର ଅଟନ୍ତି। ଏହା ପରେ ତାଙ୍କୁ ବୋଲିଂ କରିବାର ସୁଯୋଗ ମିଳିଥିଲା ଏବଂ ସେ ମାତ୍ର ୩-୪ ବଲରେ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲେ। ପରେ ତାଙ୍କ ଭାଗ୍ୟ ସେଠାରୁ ବଦଳି ଯାଇଥିଲା। ନାଥନ ଲିଅନ ୨୦୧୦-୧୧ ରେ ବିଗ ବ୍ୟାସ ଡେବ୍ୟୁ କରି ୧୧ ଉଇକେଟ ନେଇଥିଲେ। ଏହାର ଠିକ ପରେ ଅଷ୍ଟ୍ରେଲିଆ ଦଳରେ ସୁଯୋଗ ପାଇଲେ ଏବଂ ଏବେ ସେ ଶୁକ୍ରବାର ଦିନ ତାଙ୍କର ୧୦୦ ତମ ଟେଷ୍ଟ ମ୍ୟାଚ ଖେଳିବେ।
