ଭୋଗରାଇ, ୫।୧୨(ଡି.ଏନ.ଏ.) – କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ସାମୁଦ୍ରିକ ଝଡ଼ ଜୱାଦ କ୍ରମଶଃ ଦୁର୍ବଳ ହୋଇ ଗଭୀର ଅବପାତରେ ପରିଣତ ହୋଇ ଉତ୍ତର-ପୂର୍ବ ମୁହାଁ ହେଉଥିବାରୁ କୂଳବାସୀଙ୍କୁ ଆଶ୍ୱସ୍ତି କରିଛି। ତେବେ ପାଗର ଅବନତି ହୋଇଥିବା ବେଳେ ବାତ୍ୟାର ଭୟ ମନରୁ ଲିଭିନାହିଁ । ଶୁକ୍ରବାର ମଧ୍ୟରାତ୍ରିରୁ ଅବିଶ୍ରାନ୍ତ ବିକ୍ଷିପ୍ତ ବର୍ଷା ଲାଗି ରହିଥିବା ବେଳେ ପାଗ କୋହଲା ରହିଛି। ବତାଶର ବେଗ ସ୍ବାଭାବିକ ଥିବା ବେଳେ ସମୁଦ୍ର ଅଶାନ୍ତ ହୋଇଛି। ବାତ୍ୟାଜନିତ କାରଣ ଓ ଅମାବାସ୍ୟା ତିଥି ଭରା ଜୁଆରସାଥୀ ହେବାରୁ ସମୁଦ୍ର ଉତ୍ତାଳ ହୋଇ କୂଳଆଡ଼କୁ ୭ରୁ ୮ଫୁଟ୍ ଉଚ୍ଚର ଢ଼େଉ ମାଡ଼ି ଆସି ସୁରକ୍ଷିତ ଓ ଅସୁରକ୍ଷିତ ଦୁର୍ବଳ ନଦୀବନ୍ଧରେ ଧକ୍କା ଦେଉଛି।
ବାଲେଶ୍ୱର ଉପକୂଳ ତଳିଆ ଅଞ୍ଚଳର ଲୋକମାନଙ୍କୁ ସତର୍କ ରହିବା ସହିତ ଆବଶ୍ୟକ ପଡ଼ିଲେ ସେମାନଙ୍କୁ ବାତ୍ୟା ଆଶ୍ରୟସ୍ଥଳୀ କିମ୍ବା ସ୍କୁଲ ଗୃହକୁ ନିଆଯିବ ବୋଲି ପ୍ରଶାସନ ପକ୍ଷରୁ ଘୋଷଣା କରାଯାଇଛି। ବାଲେଶ୍ୱର ଜିଲା ଭୋଗରାଇର ଉଦୟପୁର, ତାଳସାରୀ, ରଣସିଂପୁର, କୀର୍ତ୍ତନିଆ, ବାଲିଆପାଳର ଡଗରା, କଙ୍କଡ଼ାପାଳ, ଚାଉଳତି ସହ ବାହାବଳପୁର, ବଳରାମଗଡ଼ି, ଚାନ୍ଦିପୁର ଆଦି ପର୍ଯ୍ୟଟନ ଏବଂ ମତ୍ସ୍ୟ ଅବତରଣ କେନ୍ଦ୍ରରେ ଡାକବାଜି ଯନ୍ତ୍ର ସାହାଯ୍ୟରେ ସମୁଦ୍ରକୁ ନ ଯିବାକୁ ପର୍ଯ୍ୟଟକ ଓ ମତ୍ସ୍ୟଜୀବୀଙ୍କୁ ବାରଣ କରାଯାଇଛି। ଅପରପକ୍ଷରେ ଭୋଗରାଇ ସୀମାନ୍ତ ଦୀଘା, ଶଙ୍କରପୁର, ତାଜପୁର, ମନ୍ଦାରମଣୀ ପର୍ଯ୍ୟଟନସ୍ଥଳୀଗୁଡ଼ିକରେ ପଶ୍ଚିମବଙ୍ଗ ପ୍ରଶାସନ ପର୍ଯ୍ୟଟକଙ୍କ ନିମନ୍ତେ ସମୁଦ୍ରକୂଳିଆ କଡ଼ା ପହରା ଓ ସଚେତନ ସତର୍କତା କରୁଛନ୍ତି। ସେଠାରେ ଏନ୍ଡିଆର୍ଏଫ୍ର ୨୫ଜଣିଆ ୧୮ଟି ଟିମ୍ ମୁତୟନ କରାଯାଇଥିବା ସୂଚନା ମିଳିଛି। ସହସ୍ରାଧିକ ମାଛଧରା ଟ୍ରଲର ଓ ଡଙ୍ଗା କୂଳରେ ସୁରକ୍ଷିତ ଭାବେ ରହିଥିବା ବେଳେ ଅଦିନିଆ ଝଡ଼ବର୍ଷା ଚାଷୀ କୂଳକୁ ଚିନ୍ତିତ କରିଛି।