ଗ୍ରୀଷ୍ମପ୍ରବାହ ମଧ୍ୟରେ ଜଙ୍ଗଲରେ ଲାଗିଲା ନିଆଁ, ୩୫ ବର୍ଗ କିଲୋମିଟର ଜଙ୍ଗଲ ହେଲା ପାଉଁଶ

ଆଥେନ୍ସ,୨୧।୭: ୟୁରୋପରେ ଗତ କିଛି ଦିନ ହେବ ଗ୍ରୀଷ୍ମପ୍ରବାହ ଜାରି ରହିଛି। ଏଭଳି ପରିସ୍ଥିତିରେ ଗ୍ରୀସର ଜଙ୍ଗଲରେ ନିଆଁ ଲାଗିଥିବାର ଖବର ଆସିଛି। ନିଆଁ ଏତେ ଭୟଙ୍କର ଯେ ବର୍ତ୍ତମାନ ପର୍ଯ୍ୟନ୍ତ ୩୫ ବର୍ଗ କିଲୋମିଟର ଜଙ୍ଗଲ ପାଉଁଶ ହୋଇଯାଇଛି। ଲୋକଙ୍କୁ ପ୍ରଭାବିତ ସ୍ଥାନରୁ ବହୁ ପରିମାଣରେ ସ୍ଥାନାନ୍ତର କରାଯାଉଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ବୁଧବାର ରାତିରେ ନିଆଁକୁ ନିୟନ୍ତ୍ରଣକୁ ନିଆଯାଇଥିଲା କିନ୍ତୁ ଗୁରୁବାର ପବନ ହେତୁ ଏହା ପୁଣି ଅନିୟନ୍ତ୍ରିତ ହୋଇଯାଇଥିଲା।

ଗ୍ରୀସ ଅଗ୍ନିଶମ ବିଭାଗର ମୁଖପାତ୍ର ଗତ ବିବୃତ୍ତିରେ କହିଛନ୍ତି ଯେ, ଗତ ୨୪ଘଣ୍ଟା ମଧ୍ୟରେ ୬୨ଟି ସ୍ଥାନରେ ଗ୍ରୀସର ଜଙ୍ଗଲରେ ଅଗ୍ନିକାଣ୍ଡ ଘଟିଛି। ଗ୍ରୀସର ପଶ୍ଚିମ ଆଟିକା ଅଞ୍ଚଳରେ ଅଗ୍ନିକାଣ୍ଡ ଯୋଗୁଁ ଲୋକଙ୍କୁ ସ୍ଥାନାନ୍ତର କରାଯାଉଛି। କିଛି ଲୋକ ନିଜ ଘର ଛାଡିବାକୁ ପ୍ରସ୍ତୁତ ନୁହଁନ୍ତି ଏବଂ ପ୍ରଶାସନର ନିର୍ଦ୍ଦେଶକୁ ଅବମାନନା କରୁଛନ୍ତି।