ବିଶ୍ୱରେ ପ୍ରଦୂଷଣ ମାତ୍ରା ବଢ଼ିଚାଲିଛି। ଶିଳ୍ପାୟନର ଦ୍ରୁତ ବିକାଶ ସହିତ ପ୍ରଦୂଷଣମୁକ୍ତ ଶକ୍ତିର ଚାହିଦା ବଢ଼ିବାରେ ଲାଗିଛି। ପୃଥିବୀକୁ ଆସନ୍ତା ପିଢ଼ିଙ୍କ ଲାଗି ଜୀବିତ ରଖିବା ପାଇଁ ସବୁଜ ଶକ୍ତି ଉତ୍ସ ଉପରେ ଗୁରୁତ୍ୱାରୋପ କରାଯାଉଛି। ସବୁଜ ଶକ୍ତି ମଧ୍ୟରେ ପବନ ଶକ୍ତି ବିଶେଷ ଆଦୃତି ଲାଭ କରିପାରିଛି। ପବନ ଶକ୍ତି ସମ୍ପର୍କରେ ସଚେତନତା ସୃଷ୍ଟି ଲାଗି ପ୍ରତିବର୍ଷ ଜୁନ୍ ୧୫ ରେ ‘ବିଶ୍ୱ ପବନ ଦିବସ’ ପାଳନ କରାଯାଇଥାଏ।
ପବନ ଶକ୍ତି ସଙ୍ଗଠନ ଏବଂ ପବନ ଶକ୍ତି ଉତ୍ପାଦନରେ ଜଡ଼ିତ କମ୍ପାନୀଗୁଡିକ ମିଳିତ ଭାବେ ବିଶ୍ୱର ଅନେକ ଦେଶରେ ଏହି ଦିବସ ପାଳନ ଅବସରରେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରିଥାନ୍ତି। ୨୦୧୧ରେ, ୪ଟି ମହାଦେଶର ୩୦ଟି ଦେଶରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏସବୁ କାର୍ଯ୍ୟକ୍ରମରେ ଉପକୂଳ ଏବଂ ଅଫ୍ଶୋର ପବନ ଫାର୍ମ ପରିଦର୍ଶନ, ସୂଚନା ଅଭିଯାନ, ସହରରେ ସ୍ଥାପିତ ଟର୍ବାଇନ୍ ପ୍ରଦର୍ଶନୀ, ପବନ କର୍ମଶାଳା ଏବଂ ପବନ ପରେଡ ଅନ୍ତର୍ଭୁକ୍ତ ଥିଲା।
ମସିହାରେ ପ୍ରଥମଥର ପାଇଁ ୟୁରୋପୀୟ ପବନ ଶକ୍ତି ସଂଘ (ଇଡବ୍ଲୁଇଏ) ଦ୍ୱାରା ଆନୁଷ୍ଠାନିକ ଭାବେ ସଂଗଠିତ ହୋଇଥିଲା। ୨୦୦୭ରେ, ୟୁରୋପରେ ପ୍ରଥମଥର ପାଇଁ ପବନ ଦିବସ ପାଳନ କରାଯାଇଥିଲା। ପବନ ଶକ୍ତିର ଉପଯୋଗିତା ଏବଂ ଏକ ସ୍ଥାୟୀ ଉତ୍ସ ଭାବରେ ଏହାର ଅପାର ପରିସର ହୃଦୟଙ୍ଗମ ହୋଇପାରିଥିଲା। ୨୦୦୯ରେ ଗ୍ଲୋବାଲ ପବନ ଶକ୍ତି ପରିଷଦ(ଜିଇଡବ୍ଲୁଇସି) ଏବଂ ୟୁରୋପୀୟ ପବନ ଶକ୍ତି ସଂଘ ବିଶ୍ୱ ପବନ ଦିବସକୁ ଏକ ବିଶ୍ୱସ୍ତରୀୟ କାର୍ଯ୍ୟକ୍ରମ କରିବା ପାଇଁ ସହଯୋଗ କରିଥିଲେ ।
୨୦୧୨ରେ ବିଭିନ୍ନ ଦେଶରେ ପ୍ରାୟ ୨୫୦ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବିଶ୍ୱ ପବନ ଦିବସ ଏକ ଗୁରୁତ୍ୱପୂର୍ଣ୍ଣ ଅନ୍ତର୍ଜାତୀୟ ଦିବସ ଭାବେ ଏକ ଜରୁରୀ ପ୍ରାକୃତିକ ସମ୍ପଦ ରୂପେ ପବନ ଶକ୍ତି ବିଷୟରେ ସଚେତନତା ସୃଷ୍ଟି କରିଥାଏ। ପବନ ଭଳି ନବୀକରଣଯୋଗ୍ୟ ସବୁଜ ଶକ୍ତି ଉତ୍ସଗୁଡ଼ିକ ଅତ୍ୟନ୍ତ ମୂଲ୍ୟବାନ୍। ସେଗୁଡ଼ିକ ମୁକ୍ତ ଏବଂ ପରିବେଶ ପାଇଁ ମଧ୍ୟ କ୍ଷତିକାରକ ନୁହେଁ। ଏହି ପ୍ରଦୂଷଣମୁକ୍ତ ସର୍ବୋତ୍ତମ ସବୁଜ ଶକ୍ତି ଉତ୍ସର ବିକାଶ ପାଇଁ ଏହି ଦିବସ ପାଳନ ଅବସରରେ ଉଦ୍ୟମ ହୋଇଥାଏ।