ଫୋନିକ୍ସ (ୟୁଏସ),୨୩ା୭: ଦିନ ଥିଲା ବ୍ରିଟନୀ ଗ୍ରିନର ୟୁଏସ୍ଏ ବାସ୍କେଟବଲ୍ ଜର୍ସି ପୁଣି ପିନ୍ଧିବେ ଏକଥା ତାଙ୍କ କଳ୍ପନା ବାହାରେ ଥିଲା। ଦୁଇଥର ଅଲିମ୍ପିକ ସ୍ବର୍ଣ୍ଣ ପଦକ ବିଜେତା ପାଖରେ ଡ୍ରଗ୍ସ ରଖିବା ଓ ସ୍ମଗଲିଂ କରିବା ଅଭିଯୋଗରେ ୨୦୨୨ରେ ରୁଷିଆର ଏକ ବନ୍ଦୀଶାଳାରେ ଥିଲେ। ମାତ୍ର ୧୦ମାସ ପରେ ଏକ ହାଇ ପ୍ରୋଫାଇଲ ବନ୍ଦୀ ବିନିମୟରେ ସେ ଜେଲ୍ରୁ ଖଲାସ ହେବାପରେ ତାଙ୍କ ଦେଶ ତରଫରୁ ଖେଳିବା ପାଇଁ ସେ ପୁଣି ସୁଯୋଗ ପାଇଛନ୍ତି। ବର୍ତ୍ତମାନ ୧୯ମାସ ଅତିକ୍ରମ କରିବା ପରେ ସେ ଆମେରିକା ତରଫରୁ ପ୍ୟାରିସ ଗେମ୍ସରେ ଭାଗ ନେବାକୁ ମନୋନୀତ ହୋଇଛନ୍ତି। ରୁଷିଆରୁ ଫେରିବା ପରେ ପ୍ରଥମ ଥର ସେ ବିଦେଶରେ ଖେଳିବାକୁ ଯାଉଛନ୍ତି। ଶନିବାର ତାଙ୍କ ଦଳ ଅଲ୍-ଷ୍ଟାର ଗେମ୍ରେ ଖେଳିବା ପୂର୍ବରୁ ସେ ତାଙ୍କ ଜର୍ସି ନମ୍ବର-୧୫ ୟୁଏସ୍ ପରିଧାନ କରିଥିଲେ। ଗ୍ରୀନର ତାଙ୍କ ଓମେନ୍ସ ନ୍ୟାଶନାଲ ବାସ୍କେଟବଲ୍ ଆସୋସିଏଶନ (ଡବ୍ଲ୍ୟୁଏନ୍ବିଏ)ର ଆୟ ପାଇଁ ବାସ୍କେଟବଲ ଖେଳିବା ପାଇଁ ରୁଷିଆ ଯାଇଥିଲେ। ସେ ବର୍ଷବର୍ଷ ଧରି ଏହି କାର୍ଯ୍ୟ କରି ଆସୁଥିଲେ। ୩୩ ବର୍ଷୀୟ ଏହି ଖେଳାଳି କହିଥିଲେ, ୟୁଏସ୍ଏ ବାସ୍କେଟବଲ୍ ଯେ ପର୍ଯ୍ୟନ୍ତ ତାଙ୍କୁ ଖେଳିବା ଲାଗି ନ କହିଛି, ସେ ପର୍ଯ୍ୟନ୍ତ ସେ ଖେଳିବେ ନାହିଁ। ଗ୍ରିନର ଆମେରିକା ଦଳ ସହିତ ଖେଳିବା ପାଇଁ ବହୁ ସମୟ ଦେଇଛନ୍ତି। ବର୍ତ୍ତମାନ ସେ ଶତ ପ୍ରତିଶତ ଫିଟ୍ ଥିବା କହିଛନ୍ତି। ଜୁଲାଇ ୮ରେ ଗ୍ରୀନରଙ୍କ ସମଲିଙ୍ଗୀ ସ୍ତ୍ରୀ ଚାର୍ଲି ପୁତ୍ର ସନ୍ତାନ ବାଶକୁ ଜନ୍ମ ଦେଇଛନ୍ତି। ଗ୍ରୀନର କହିଛନ୍ତି, ଅଲିମ୍ପିକ୍ସ ପାଇଁ ତାଙ୍କୁ କିଛି ସପ୍ତାହ ସନ୍ତାନଠାରୁ ଦୁରରେ ରହିବାକୁ ପଡ଼ିବ ଯାହାକି କଷ୍ଟଦାୟକ।
