ସବୁଜିମାଭରା ପ୍ରାକୃତିକ ପରିବେଶରେ ରହୁଥିବା ଲୋକେ ସୁସ୍ଥ ସବଳ ରୁହନ୍ତି ଏକଥା ସମସ୍ତେ ଜାଣନ୍ତି। କିନ୍ତୁ ଏମିତି ପରିବେଶରେ ରହୁଥିବା ଲୋକଙ୍କ ଆୟୁଷ ଅଧିକ ହୋଇଯାଏ ବୋଲି ଗବେଷଣାରୁ ଜଣାପଡ଼ିଛି।
ଆମେରିକାର ନର୍ଥୱେଷ୍ଟର୍ନ ୟୁନିଭର୍ସିଟିର ଏକ ରିସର୍ଚ୍ଚରୁ ଜଣାପଡ଼ିଛି କି ଗଛଲତାଭରା ଏକ ସୁନ୍ଦର ପ୍ରାକୃତିକ ପରିବେଶରେ ରହୁଥିବା ବ୍ୟକ୍ତିଙ୍କ ଜୀବନ ଦୁଇରୁ ଅଢ଼େଇ ବର୍ଷ ପର୍ଯ୍ୟନ୍ତ ବଢ଼ି ଯାଇଥାଏ। ବିଭିନ୍ନ ସ୍ଥାନରେ ରହୁଥିବା ଲୋକଙ୍କୁ ନେଇ ରିସର୍ଚ୍ଚ କରିବା ପରେ ବୈଜ୍ଞାନିକମାନେ ଜାଣିପାରିଛନ୍ତି ଯେ, ସବୁଜିମା ପରିବେଶରେ ରହୁଥିବା ଲୋକଙ୍କ କ୍ଷେତ୍ରରେ ବିଭିନ୍ନ ପ୍ରକାରର ଜୈବିକ ଏବଂ ମଲିକ୍ୟୁଲାର ପରିବର୍ତ୍ତନ ଆସିଥାଏ। ଫଳରେ ସେମାନଙ୍କ ପ୍ରକୃତ ବୟସ ବଢ଼ିଥାଏ। ପୂର୍ବରୁ ଲୋକେ ସୁସ୍ଥ ସବଳ ରହିବା ପାଇଁ ସବୁଜ ପନିପରିବା ଖାଇବା ଏବଂ ଯୋଗ ବ୍ୟାୟାମ କରିବା ଉପରେ ଗୁରୁତ୍ୱ ଦେଉଥିଲେ। କିନ୍ତୁ ଏସବୁର ଫାଇଦା କେବଳ ଗଛଲତାଭରା ଏକ ପରିବେଶରେ ସବୁ ସମୟରେ ରହିବା ଫଳରେ ମିଳି ପାରିଥାଏ ବୋଲି ଏବେ ବୈଜ୍ଞାନିକମାନେ ମତ ଦେଇଛନ୍ତି। ଏଥିପାଇଁ ବୈଜ୍ଞାନିକମାନେ ୨୦ ବର୍ଷ ହେଲା ରିସର୍ଚ୍ଚ କରୁଥିଲେ। ପ୍ରାକୃତିକ ପରିବେଶରେ ବର୍ଷ ବର୍ଷ ଧରି ରହିବା ଫଳରେ ଲୋକଙ୍କ ଡିଏନ୍ଏରେ ପରିବର୍ତ୍ତନ ଆସିବା କଥା ଜଣାପଡ଼ିଥିଲା। ସାଧାରଣତଃ ବୟସ ବଢ଼ିବା ସଙ୍ଗେ ସଙ୍ଗେ ଡିଏନ୍ଏରେ ଯେଉଁ ପରିବର୍ତ୍ତନ ଆସିଥାଏ, ତାହାକୁ ଏପିଜେନେଟିକ୍ କ୍ଲକ କହନ୍ତି। ତେବେ ପ୍ରାକୃତିକ ପରିବେଶରେ ଦୀର୍ଘଦିନ ରହୁଥିବା ଲୋକଙ୍କର ଏପିଜେନେଟିକ୍ କ୍ଲକ ଧୀରେ ଧୀରେ ଚାଲିଥାଏ। ତେଣୁ ବ୍ୟକ୍ତି ବିଳମ୍ବରେ ବୃଦ୍ଧାବସ୍ଥାର ଶିକାର ହୁଅନ୍ତି ଓ ଅଧିକ ବର୍ଷ ଜୀବିତ ରୁହନ୍ତି।