ଝାରସୁଗୁଡ଼ା ଅଫିସ,୨୨ା୧୧: ପୁରୀରେ ଖୁବ୍ଶୀଘ୍ର ଗ୍ରୀନ୍ଫିଲ୍ଡ ବିମାନ ବନ୍ଦର ନିର୍ମାଣ ହେବ। ଏ ନେଇ କେନ୍ଦ୍ର ସରକାର ରାଜ୍ୟ ସରକାରଙ୍କ ସହଯୋଗ ଲୋଡ଼ିଛନ୍ତି। ରାଜ୍ୟ ସରକାରଙ୍କଠାରୁ ଆବଶ୍ୟକ ଜବାବ ମିଳିବା ପରେ ପୁରୀରେ ବିମାନ ବନ୍ଦର ନିର୍ମାଣ କରାଯିବ ବୋଲି ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ କହିଛନ୍ତି। ଝାରସୁଗୁଡା ବୀର ସୁରେନ୍ଦ୍ର ସାଏ (ଭିଏସ୍ଏସ୍) ବିମାନ ବନ୍ଦର ପରିସରରେ ସୋମବାର କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ରାଷ୍ଟ୍ରୀୟସ୍ତରୀୟ ଉଡ଼ାନ ଉତ୍ସବ ସୋମବାର ଅନୁଷ୍ଠିତ ହୋଇଯାଇଛି। ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ରିଜିଓନାଲ କମ୍ୟୁନିକେଶନ ସ୍କିମ୍(ଆର୍ସିଏସ୍) ଉଡ଼ାନ ଯୋଜନାକୁ ଲୋକାର୍ପିତ କରିଥିଲେ। ପରେ ସେ ବନ୍ଦର ପରିସରରେ ପ୍ରଦର୍ଶିତ ସମ୍ବଲପୁରୀ ବାନ୍ଧକଳା, ହସ୍ତତନ୍ତ ଓ ଚିତ୍ରକଳା ପରିଦର୍ଶନ କରିଥିଲେ।
ଏହି ଅବସରରେ ବନ୍ଦର ପରିସରରେ ଏକ ସଭା ଅନୁଷ୍ଠିତ ହୋଇଥିଲା। ଏଥିରେ କେନ୍ଦ୍ର ମନ୍ତ୍ରୀ ସିନ୍ଧିଆ ମୁଖ୍ୟଅତିଥି ଭାବେ ଯୋଗଦେଇଥିବା ବେଳେ ରାଜ୍ୟ ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା, ଏମ୍ପି ସୁରେଶ ପୂଜାରୀ, ଜୁଏଲ ଓରାମ, ବିଧାୟକ କିଶୋର ମହାନ୍ତି, କୁସୁମ ଟେଟେ, ଶଙ୍କର ଓରାମ, ଭବାନୀ ଭୋଇ, ନାଉରୀ ନାୟକ, ମଧୁସୂଦନ ପାଢୀ, ସଚିବ ରାଜୀବ ବଂଶଲ, ଯୁଗ୍ମସଚିବ ଉଷା ପାଢୀ, ଜିଲାପାଳ ସରୋଜ କୁମାର ସାମଲ, ଭାଜପା ରାଜ୍ୟ ସମ୍ପାଦକ ଟଙ୍କଧର ତ୍ରିପାଠୀ ପ୍ରମୁଖ ସମ୍ମାନିତ ଅତିଥିଭାବେ ଯୋଗଦେଇଥିଲେ। ଦେଶର ଝାରସୁଗୁଡ଼ା ସମେତ ସମୁଦାୟ ୫୩ ବିମାନ ବନ୍ଦରରେ ଉଡାନ ଉତ୍ସବ ପାଳନ କରାଯାଇଥିଲା। ଭର୍ଚ୍ଚୁଆଲ ମାଧ୍ୟମରେ ୫୨ ବିମାନ ବନ୍ଦର ଯୋଡି ହୋଇଥିଲେ। ଏଥିରେ ଶିଲଂର ମେଘାଳୟ ବିମାନ ବନ୍ଦରରୁ ଏକ ନୂଆ ବିମାନ ଉଡାଣ କରିଥିଲା। କେନ୍ଦ୍ରମନ୍ତ୍ରୀ ସିନ୍ଧିଆ ଓ ଅନ୍ୟ ଅତିଥିମାନେ ପତାକା ଦେଖାଇ ଏହାକୁ ଶୁଭାରମ୍ଭ କରିଥିଲେ। କେନ୍ଦ୍ରମନ୍ତ୍ରୀ କହିଥିଲେ, ଝାରସୁଗୁଡ଼ା ବିମାନ ବନ୍ଦର କାର୍ଯ୍ୟକ୍ଷମ ହେବାର ମାତ୍ର ୨ବର୍ଷ ହୋଇଛି। ହେଲେ ଅନ୍ୟାନ୍ୟ ବିମାନ ବନ୍ଦର ତୁଳନାରେ ଏହି ବିମାନ ବନ୍ଦରର ବ୍ୟବସାୟିକ ସଫଳତା ବହୁତ ଭଲ ରହିଛି। କରୋନା ସମୟରେ ସାରା ଦେଶରେ ଯାତ୍ରୀ ସଂଖ୍ୟା ୬୨% ହ୍ରାସ ପାଇଥିବା ବେଳେ ଝାରସୁଗୁଡ଼ା ବିମାନ ବନ୍ଦରରେ ମାତ୍ର ୫% ହ୍ରାସ ପାଇଥିବା ଦେଖିବାକୁ ମିଳିଥିଲା ବୋଲି ସିନ୍ଧିଆ କହିଛନ୍ତି।