ମହାକାଳପଡ଼ା,୮ା୮ (ଡି.ଏନ୍. ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳ ଦେଇ ନିର୍ମାଣ ହେବ ଗ୍ରୀନ ଫିଲ୍ଡ ରାଜପଥ। ଏହି ରାଜପଥ ନିର୍ମାଣ ହେଲେ ସମୁଦ୍ର ଉପକୂଳ ଅଞ୍ଚଳ ପଶ୍ଚିମବଙ୍ଗର କୋଲକାତା ପର୍ଯ୍ୟନ୍ତ ପରିବହନ, ଗମନାଗମନ ସୁଦୃଢ ହେବ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି। ବ୍ଲକର ପାଟୁକି ପଙ୍କ, ଦେକଣି, କୋରଡପଙ୍କା, ନଳଦିଆ ଶାସନ, ଗତାନଈ, ନାରାୟଣପୁର, ମଶାକଣି, ଯଦୁପୁର, ନୂଆଗଁା, ଓସ୍ତର, ତେରଗଁା, ସାମନ୍ତସିଂହାରପୁର, ମଙ୍ଗଳପୁର, ବଉଳପଡ଼ା, ତିଥି, କିଆରବାଙ୍କ, ବିଜୟନଗର, ବାବର, ପୋଟିଆ, ରାମଚନ୍ଦ୍ରପୁର ଆଦି ଗଁାର ଚାଷଜମି ଉପରେ ଏହି ରାଜପଥ ନିର୍ମାଣ ହେବ ବୋଲି କେନ୍ଦ୍ର ସରକାରଙ୍କ ସଡ଼କ ପରିବହନ ଓ ରାଜ ମାର୍ଗ ମନ୍ତ୍ରଣାଳୟ ଜାତୀୟ ରାଜପଥ ଗ୍ରୀନ ଫିଲ୍ଡ ହାଇୱେ ପ୍ରକଳ୍ପ ଓଡ଼ିଶା କେନ୍ଦ୍ରାପଡ଼ା ଜିଲା ପକ୍ଷରୁ ଦୈନିକ ଓଡ଼ିଆ ଖବର କାଗଜ ଧରିତ୍ରୀରେ ରବିବାର ବିଜ୍ଞାପିତ ପ୍ରକାଶିତ ପାଇଛି। ଏହାପରେ ସ୍ଥାନୀୟ ଲୋକମାନେ ଖୁସି ପ୍ରକଟ କରିଛନ୍ତି। ରାଜପଥ ନିର୍ମାଣ ହେଲେ ଜମି ଅଧିଗ୍ରହଣ କରାଯାଇ କ୍ଷତିଗ୍ରସ୍ତ ଜମି ମାଲିକଙ୍କୁ ଉଚିତ ମୂଲ୍ୟ ମିଳିବ। ରାଜପଥ ନିର୍ମାଣ ହେଲେ ପରୋକ୍ଷ ଓ ପ୍ରତ୍ୟକ୍ଷ ଭାବେ ବହୁ ଛୋଟ ବଡ଼ ବ୍ୟବସାୟ ପ୍ରତିଷ୍ଠାନ ଗଢ଼ି ଉଠିବା ସହ ଶିଳ୍ପ କାରଖାନା ପ୍ରତିଷ୍ଠା ପାଇଁ ଅନୁକୂଳ ବାତାବରଣ ସୃଷ୍ଟି ହେବ ବୋଲି ସ୍ଥାନୀୟ ଲୋକମାନଙ୍କ ମନରେ ଆଶା ସଞ୍ଚାର ହୋଇଛି। ଜାତୀୟ ରାଜପଥ ଗ୍ରୀନ ଫିଲ୍ଡ ହାଇୱେ ପ୍ରକଳ୍ପ ନିର୍ମାଣ ହେଲେ ମହାକାଳପଡ଼ା ବ୍ଲକ ବିକାଶର ନୂଆ ଯୁଗ ଆରମ୍ଭ ହେବ ବୋଲି ସାମାଜିକ କର୍ମୀ ସୁବାସ ଚନ୍ଦ୍ର ସ୍ବାଇଁ କହିଛନ୍ତି।