ଜେନେଭା, ୨୯।୧୦: ଗ୍ରୀନ୍ ହାଉସ୍ ଗ୍ୟାସ୍ର ସ୍ତର ୨୦୨୩ରେ ଏକ ନୂତନ ରେକର୍ଡ ଛୁଇଁଛି। କେବଳ ଗତ ୨ ଦଶନ୍ଧି ମଧ୍ୟରେ ୧୦%ରୁ ଅଧିକ ଗ୍ରୀନ୍ ହାଉସ୍ ଗ୍ୟାସ୍ ନିର୍ଗମନ ବୃଦ୍ଧି ପାଇଛି ବୋଲି ସୋମବାର ବିଶ୍ୱ ପାଣିପାଗ ସଙ୍ଗଠନ(ଡବ୍ଲ୍ୟୁଏମ୍ଓ) ପକ୍ଷରୁ ଜାରି ହୋଇଥିବା ଏକ ରିପୋର୍ଟରେ କୁହାଯାଇଛି। ଡବ୍ଲ୍ୟୁଏମ୍ଓର ବାର୍ଷିକ ଗ୍ରୀନ୍ ହାଉସ୍ ଗ୍ୟାସ୍ ବୁଲେଟିନ ଅନୁଯାୟୀ, ୨୦୨୩ରେ ଅଙ୍ଗାରକାମ୍ଳ ନିର୍ଗମନ ସର୍ବାଧିକ ସ୍ତରରେ ପହଞ୍ଚିଛି। ଖାସ୍କରି ଜଙ୍ଗଲ ଦ୍ୱାରା ଅଙ୍ଗାରକାମ୍ଳ ଅବଶୋଷଣରେ ହ୍ରାସ ଲକ୍ଷ୍ୟ କରାଯିବା ସହ ଶିଳ୍ପ କାର୍ଯ୍ୟକଳାପରେ ବୃଦ୍ଧି ଯୋଗୁ ଏପରି ଘଟିଥିବା ନେଇ ଡବ୍ଲ୍ୟୁଏମ୍ଓ ପକ୍ଷରୁ କୁହାଯାଇଛି। ୨୦୨୩ରେ ଅଙ୍ଗାରକାମ୍ଳର ବୈଶ୍ୱିକ ହାରାହାରି ଭୂପୃଷ୍ଠ ସାନ୍ଦ୍ରତା ୪୨୦ ପିପିଏମ୍(ପାଟର୍ସ ପର୍ ମିଲିୟନ୍), ମିଥେନର ୧୯୩୪ ପିପିବି(ପାଟର୍ସ ପର୍ ବିଲିୟନ୍) ଏବଂ ନାଇଟ୍ରୋଜେନ ଅକ୍ସାଇଡ୍ ୩୩୬.୯ ପିପିବି ରହିଛି। ଡବ୍ଲ୍ୟୁଏମ୍ଓ ସାଧାରଣ ସମ୍ପାଦକ ସେଲେଷ୍ଟେ ସାଓଲୋ କହିଛନ୍ତି, ଗ୍ରୀନ୍ ହାଉସ୍ ଗ୍ୟାସ୍ ନିର୍ଗମନ ପ୍ରତି ବର୍ଷ ନୂତନ ରେକର୍ଡକୁ ଛୁଇଁବାରେ ଲାଗିଛି। ବୈଶ୍ୱକ ତାପମାତ୍ରା ବୃଦ୍ଧିକୁ ୧.୫ ଡିଗ୍ରୀ ସେଲସିୟସ୍ ସ୍ତରରୁ କମ୍ ରଖିବା ପାଇଁ କରାଯାଇଥିବା ପ୍ୟାରିସ୍ ଚୁକ୍ତିନାମା ଏହାର ଲକ୍ଷ୍ୟ ପୂରଣଠାରୁ ବହୁ ଦୂରରେ ରହିଛି।
ସୋମବାର ଜଳବାୟୁ ପରିବର୍ତ୍ତନକୁ ଆକଳନ କରୁଥିବା ଜାତିସଂଘର ‘ଇଣ୍ଟର ଗଭର୍ମେଣ୍ଟାଲ ପ୍ୟାନେଲ ଅନ୍ କ୍ଲାଇମେଣ୍ଟ ଚେଞ୍ଜ’ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି, ବୈଶ୍ୱିକ ତାପମାତ୍ରା ବୃଦ୍ଧିକୁ ୧.୫ ଡିଗ୍ରୀ ମଧ୍ୟରେ ସୀମିତ ରଖିବା ପାଇଁ ସମ୍ପ୍ରତି ବିଶ୍ୱର ବିଭିନ୍ନ ଦେଶ ପକ୍ଷରୁ ଲାଗୁ କରାଯାଇଥିବା ଜଳବାୟୁ ଯୋଜନାଗୁଡ଼ିକ ଯଥେଷ୍ଟ ନୁହେଁ। ବୈଶ୍ୱିକ ତାପମାତ୍ରା ବୃଦ୍ଧିକୁ ୧.୫ ଡିଗ୍ରୀ ମଧ୍ୟରେ ସୀମିତ ରଖିବାକୁ ୨୦୩୦ ସୁଦ୍ଧା ବୈଶ୍ୱିକ ନିର୍ଗମନ(ଗ୍ଲୋବାଲ ଏମିଶନ)କୁ ୪୩% ଏବଂ ୨୦୩୫ ସୁଦ୍ଧା ୬୦% ପର୍ଯ୍ୟନ୍ତ ହ୍ରାସ କରିବାକୁ ପଡ଼ିବ। ଜଳବାୟୁ ପରିବର୍ତ୍ତନକୁ ମୁକାବିଲା କରିବା ପାଇଁ ବିଭିନ୍ନ ଦେଶର ଜାତୀୟ ଜଳବାୟୁ ଯୋଜନା ଦ୍ୱାରା ବୈଶ୍ୱିକ ନିର୍ଗମନ ୨୦୧୯ର ସ୍ତରଠାରୁ ମାତ୍ର ୨.୬% ହ୍ରାସ ପାଇଛି। ଜାତିସଂଘ ପକ୍ଷରୁ ଜାରି ଏହି ନୂଆ ରିପୋର୍ଟରେ, ପ୍ୟାରିସ୍ ଚୁକ୍ତିନାମାରେ ସହଭାଗୀଥିବା ୧୬୮ ଦେଶ ପକ୍ଷରୁ ଲାଗୁ କରାଯାଇଥିବା ୧୯୫ଟି ଜାତୀୟ ଜଳବାୟୁ ଯୋଜନାଗୁଡ଼ିକୁ ସୂଚିତ କରାଯାଇଛି। ସାମ୍ପ୍ରତିକ ବୈଶ୍ୱିକ ନିର୍ଗମନ ୧୯୯୦ ତୁଳନାରେ ୪୯.୮% ଅଧିକ, ୨୦୧୦ ତୁଳନାରେ ୮.୩% ପ୍ରତିଶତ ଅଧିକ, ୨୦୧୯ ତୁଳନାରେ ୨.୬% କମ୍ ଥିବା ନେଇ ଉକ୍ତ ରିପୋର୍ଟ କହିଛି। ସେହିପରି ସ୍ଥିତି ଏପରି ରହିଲେ ୨୦୩୦ ସୁଦ୍ଧା ବୈଶ୍ୱିକ ନିର୍ଗମନ ଚରମ ସୀମାରେ ପହଞ୍ଚିବ ବୋଲି ଉକ୍ତ ରିପୋର୍ଟରେ ଆଶଙ୍କା ପ୍ରକଟ କରାଯାଇଛି।