ନ୍ୟୁୟର୍କ, ୨୫ା୮ (ପି.ଟି.)-ବୁଲଗେରିଆର ଗ୍ରିଗୋର ଦିମିତ୍ରୋଭ୍ ଟେନିସ୍କୁ ସଫଳ ପ୍ରତ୍ୟାବର୍ତ୍ତନ କରିଛନ୍ତି। ଓ୍ବେଷ୍ଟର୍ନ ଆଣ୍ଡ୍ ସଦର୍ନ ଓପନ ଟେନିସ ପ୍ରତିଯୋଗିତାରେ ସେ ଫ୍ରାନ୍ସର ଉଗୋ ହମବର୍ଟଙ୍କୁ ୬-୩, ୬-୪ ସେଟ୍ରେ ପରାସ୍ତ କରିଛନ୍ତି। ସେ କହିଛନ୍ତି ଏହି ମ୍ୟାଚ ବିଜୟ ତାଙ୍କ ପାଇଁ ସେତେଟା ଗୁରୁତ୍ୱପୂର୍ଣ୍ଣ ନ ଥିଲା। ଦୁଇମାସ ପୂର୍ବେ ନୋଭାକ ଜୋକୋଭିଚ୍ଙ୍କ ଦ୍ୱାରା ଆୟୋଜିତ ପ୍ରଦର୍ଶନୀ ଟେନିସ୍ ଟୁର୍ନାମେଣ୍ଟରେ ଅଂଶଗ୍ରହଣ ବେଳେ ସେ କୋଭିଡ୍-୧୯ରେ ସଂକ୍ରମିତ ହୋଇଥିଲେ। ଅସୁସ୍ଥ ହୋଇ ସେ ଏତେଟା ଦୁର୍ବଳ ହୋଇ ପଡ଼ିଥିଲେ ଯେ, ଭଲ ରୂପେ ଚାଲିପାରୁ ନ ଥିଲେ। ସୁସ୍ଥ ହେବାର ଅଳ୍ପ କିଛି ଦିନ ପରେ ସେ ଗୋଟିଏ ମ୍ୟାଚ ଖେଳି ପାରିବେ କି ନା ତାଙ୍କର ସନ୍ଦେହ ଥିଲା। ଏହା ଆଶଙ୍କା ତାଙ୍କ ମନରୁ ଦୂର ହୋଇଯାଇଛି। ୧୯ର଼୍ୟାଙ୍କିଙ୍ଗପ୍ରାପ୍ତ ଏହି ଟେନିସ ଖେଳାଳିଙ୍କ ପାଇଁ ଅଗଷ୍ଟ ୩୧ରେ ହେବାକୁ ଥିବା ୟୁଏସ୍ ଓପନ୍ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତା ଲାଗି ଏହି ଟୁର୍ନାମେଣ୍ଟ ଏକ ଓ୍ବାର୍ମଅପ୍ ଭଳି। ରବିବାର ଏହି ହାର୍ଡକୋର୍ଟ ଟୁର୍ନାମେଣ୍ଟର ଦ୍ୱିତୀୟ ଦିବସ ମହିଳା ବିଭାଗର ପ୍ରଥମ ରାଉଣ୍ଡରେ ୨୦୧୭ ୟୁଏସ ଓପନ ଚାମ୍ପିୟନ ସେଲାଏନ୍ ଷ୍ଟିଫେନ୍ସଙ୍କୁ ୬-୩, ୭-୬ (୪) ସେଟ୍ରେ ପରାସ୍ତ କରିଛନ୍ତି କାରୋଲିନ୍ ଗ୍ରାସିଆ। ଗତ ସପ୍ତାହରେ କେଣ୍ଟୁକିର ଲେକ୍ସିଙ୍ଗଟନ୍ଠାରେ ପ୍ରଥମ ଡବଲ୍ୟୁଟିଏ ଟାଇଟଲ ଜିତିଥିବା ଜେନିଫର ବ୍ରାଡିଙ୍କୁ ୭-୬ (୫), ୬-୪ ସେଟ୍ରେ ଜେସିକା ପେଗୁଲା ହରାଇ ଦେଇଛନ୍ତି। ମ୍ୟାଚ ଜିତିଥିବା ଅନ୍ୟ ଖେଳାଳିମାନେ ହେଲେ ୧୨ ନମ୍ବର ଖେଳାଳି ଆନେଟ କୋଣ୍ଟାଭିଟ୍, ୧୪ ନମ୍ବର ଖେଳାଳି ଏଲିସ୍ ମୋର୍ଟେନ୍ସ ଏବଂ ଆମେରିକା କ୍ୱାଲିଫାୟର ସିସି ବେଲ୍ସ। ପୁରୁଷ ବିଭାଗରେ ଦୁଇଜଣ ସିଡ ଖେଳାଳି ଆନ୍ଦ୍ରେ ରୁବ୍ଲେଭ୍ (୧୦ ନମ୍ବର) ଏବଂ କ୍ରିଷ୍ଟିଆନ ଗାରିନ୍ (୧୩ନମ୍ବର)।