ମିରଟ, ୧୧।୧୦: ବାହାଘର ସମୟରେ କନ୍ୟା ପକ୍ଷକୁ ବାଇକ୍ ଦାବି କରି ହଟହଟାରେ ପଡ଼ିଛନ୍ତି ଜଣେ ଲୋଭୀ ବର। ଫଳରେ କନ୍ୟାପକ୍ଷ ଲୋକ ଏଥିରେ କ୍ରୋଧିତ ହୋଇ ବରକୁ ବନ୍ଧକ ରଖିଥିଲେ। ଏହାପରେ ବର ଓ କନ୍ୟା ପକ୍ଷ ଲୋକଙ୍କ ମଧ୍ୟରେ ପ୍ରବଳ ଗଣ୍ଡଗୋଳ ହୋଇଥିଲା। ଶେଷରେ ଘଟଣାସ୍ଥଳରେ ପୋଲିସ ପହଞ୍ଚି ଉଭୟପକ୍ଷ ଲୋକଙ୍କୁ ଥାନାକୁ ନେଇ ଆସିଥିଲା।
ଘଟଣାଟି ଉତ୍ତର ପ୍ରଦେଶ ମିରଟ ସହରରେ ଦେଖିବାକୁ ମିଳିଛି। ଲକ୍ ଡାଉନ୍ରେ ନିକ୍ହା ସରିଯାଇଥିବାବେଳେ ଏଠାରେ ଶନିବାର ବିବାହ ଉତ୍ସବ ଥିଲା। ତେବେ ବାହାଘର ସମୟରେ ବର ଏକ ସର୍ତ୍ତ ରଖିଥିଲା। କନ୍ୟାକୁ ନେବା ପାଇଁ ବର ବାଇକ୍ ଦାବି କରିଥିଲା। କନ୍ୟାଘର ପକ୍ଷ କିନ୍ତୁ ବରର ଏହି ସର୍ତ୍ତରେ ଅକ୍ଷମତା ପ୍ରକାଶ କରିଥିଲେ। ବର କିନ୍ତୁ ନିଜ ଜିଦ୍ରେ ଅଟଳ ଥିଲା। ଶେଷରେ କନ୍ୟାଘର ପକ୍ଷ ବରକୁ ବନ୍ଧକ ରଖିଥିଲେ। ଏହାପରେ ଘଟଣାସ୍ଥଳରେ ପୋଲିସ ପହଞ୍ଚି ଉଭୟ ବର ଓ କନ୍ୟାଘର ଲୋକଙ୍କୁ ଥାନାକୁ ଆଣିଥିଲା। ସେଠାରେ କନ୍ୟାଘର ପକ୍ଷରୁ ବର ନାମରେ ଯୌତୁକ ଦାବି ନେଇ ଅଭିଯୋଗ ହୋଇଥିଲା। ପୋଲିସ ଘଟଣାର ତଦନ୍ତ ଚଳାଇ ଅଭିଯୋଗର ସତ୍ୟାସତ ଜାଣିବାକୁ ଚେଷ୍ଟା କରୁଛି। ଅଭିଯୋଗ ପ୍ରମାଣିତ ହେଲେ ବର ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ପକ୍ଷରୁ କୁହାଯାଇଛି।
