ଚିତ୍ରକୂଟ: ଆପଣ ସିନେମାରେ କନ୍ୟା ହଠାତ୍ ବିବାହ ମଣ୍ଡପରୁ ପ୍ରେମିକଙ୍କ ସହ ଫେରାର ହେବା ଦୃଶ୍ୟ ଦେଖିଥିବେ ନିଶ୍ଚୟ। ହେଲେ ବାସ୍ତବରେ ମଧ୍ୟ ଏଭଳି ଏକ ଘଟଣା ଉତ୍ତରପ୍ରଦେଶ କାନପୁରର ମଊ ଥାନା ଅଞ୍ଚଳରେ ଘଟିଛି। ଏଠାରେ ଏକ ବର ବରଯାତ୍ରୀଙ୍କୁ ଧରି କନ୍ୟାଙ୍କ ଘରେ ପହଞ୍ଚିଥିଲେ। ସେଠାରେ ତାଙ୍କୁ ସ୍ବାଗତ ସମ୍ବର୍ଦ୍ଧନା କରାଯାଇଥିଲା। ହେଲେ ବିବାହ ପୂର୍ବରୁ କନ୍ୟା ସେଠାରୁ ଫେରାର ହୋଇଯାଇଥିଲେ। ଏହାକୁ ନେଇ ଉଭୟ ପରିବାର ମଧ୍ୟରେ କଥା କଟାକଟି ହୋଇଥିଲା। ପରେ ମାମଲା ଥାନାରେ ପହଞ୍ଚିଛି।
ସମ୍ପୂର୍ଣ୍ଣ କଥା କିଛି ଏଭଳି। ମଊ ଥାନା ଅଞ୍ଚଳରେ ଥିବା ଏକ ଗାଁର ଜଣେ ବ୍ୟକ୍ତି ନିଜ ଝିଅର ବିବାହ ପଡୋଣୀ ଗ୍ରାମର ଯୁବକଙ୍କ ସହ ଠିକ୍ କରିଥିଲେ। ଧାର୍ଯ୍ୟ ବିବାହ ତାରିଖରେ ବର କନ୍ୟାଙ୍କୁ ନେବା ପାଇଁ ତାଙ୍କ ଘରେ ପହଞ୍ଚିଥିଲେ। ସେଠାରେ ତାଙ୍କୁ ସ୍ବାଗତ କରାଯାଇ ପାଛୋଟି ନିଆଯାଇଥିଲା। ବରଯାତ୍ରୀମାନେ ମଧ୍ୟ ଖାଇବାରେ ବ୍ୟସ୍ତ ହୋଇଯାଇଥିଲେ। ହେଲେ ହଠାତ କନ୍ୟା ଗାଏବ ହୋଇଯାଇଥିବା ଖବର ଶୁଣିବାକୁ ମିଳିଥିଲା।
ବର ବରଣମାଳା ପାଇଁ ଷ୍ଟେଜରେ ବସିଥିଲେ। ହେଲେ ଦୀର୍ଘ ସମୟ ଯାଏ କନ୍ୟା ଆସି ନ ଥିଲେ। ପରେ ବରପକ୍ଷ ଲୋକେ କନ୍ୟାପକ୍ଷ ଲୋକଙ୍କୁ କାରଣ କ’ଣ ବୋଲି ପଚାରିଥିଲେ। ହେଲେ କନ୍ୟା ପ୍ରେମିକଙ୍କ ସହ ଫେରାର ହୋଇଥିବା ଜଣାପଡ଼ିଥିଲା। ଘଟଣାରେ ଭାଙ୍ଗିପଡ଼ିଥିବା କନ୍ୟାଙ୍କ ବାପା ସାନଝିଅଙ୍କ ସହ ବିବାହ ପ୍ରସ୍ତାବ ଦେଇଥିଲେ। ମାତ୍ର ନାବାଳିକା ଯୋଗୁ ବିବାହ ସମ୍ଭବ ନ ଥିଲା। ଫଳରେ କଥା ଥାନାରେ ପହଞ୍ଚିଥିଲା।
ପୋଲିସ ମାମଲାର ଯାଞ୍ଚ କରିବା ପରେ ଗ୍ରାମରେ ଥିବା ପ୍ରେମିକଙ୍କ ଘରେ ଉକ୍ତ କନ୍ୟାଙ୍କୁ ପାଇଥିଲା। ତାଙ୍କୁ ପଚରାଯିବାରେ ସେ ମଣ୍ଡପ ଯିବା ପୂର୍ବରୁ ପ୍ରେମିକଙ୍କ ସହ ଫେରାର ହୋଇଯାଇଥିବା କଥା କହିଥିଲେ। ଉଭୟ ପକ୍ଷ ତାଙ୍କୁ ବୁଝାଇଥିଲେ ହେଁ କୌଣସି ନିଷ୍କର୍ସ ବାହାରି ନ ଥିଲା। ସେ ଫେରିବାକୁ ଅରାଜି ହୋଇଥିଲେ। ଶେଷରେ କନ୍ୟାଙ୍କ ବାପା ପ୍ରେମିକ ଏବଂ ତାଙ୍କ ଭାଇଙ୍କ ବିରୋଧରେ ଝିଅଙ୍କୁ ଅପହରଣ କରିନେଇଥିବା ନେଇ ଅଭିଯୋଗ କରିଛନ୍ତି।
