ବ୍ରିସବେନ୍,୧୫।୧: ବର୍ତ୍ତମାନ ସମୟରେ ଅଷ୍ଟ୍ରେଲିଆର ସଫଳ ବୋଲରଙ୍କ ମଧ୍ୟରୁ ନାଥନ ଲାୟନ ଅନ୍ୟତମ। ଶୁକ୍ରବାର ଭାରତ ବିପକ୍ଷ ନିର୍ଣ୍ଣାୟକ ଟେଷ୍ଟରେ ସେ ନିଜର ୧୦୦ତମ ମ୍ୟାଚ୍ ଖେଳୁଛନ୍ତି। ଏହି ସ୍ମରଣୀୟ ମ୍ୟାଚ୍ରେ ସେ ଅନ୍ୟଏକ ଉପଲବ୍ଧି ହାସଲ କରିପାରନ୍ତି। ଲାୟନ ନିଜର ୪୦୦ ଉଇକେଟ ପୂରଣ କରିବାରୁ ମାତ୍ର ୪ ଉଇକେଟ ପଛରେ ଅଛନ୍ତି। ଚଳିତ ମ୍ୟାଚ୍ରେ ସେ ୪ ଉଇକେଟ ନେବାରେ ସଫଳ ହେଲେ ବିଶ୍ୱର ଶ୍ରେଷ୍ଠ ବୋଲର ତାଲିକାରେ ସାମିଲ ହେବେ।
୨୦୧୦ରେ ଆଡିଲେଡ୍ରେ ଲାୟନ ଗ୍ରାଉଣ୍ଡ ଷ୍ଟାଫ ଭାବେ କାମ କରିଥିଲେ। ବର୍ଷକ ପରେ ୨୦୧୧ରେ ଶ୍ରୀଲଙ୍କା ଗସ୍ତରେ ତାଙ୍କୁ ଡେବ୍ୟୁ କରିବାର ସୁଯୋଗ ମିଳିଥିଲା। ଏହାପରଠାରୁ ସେ ପଛକୁ ଫେରି ଦେଖିନାହାନ୍ତି। ଏବେ ଅଷ୍ଟ୍ରେଲିଆର ସଫଳ ସ୍ପିନର ହିସାବରେ ତାଙ୍କୁ ଗଣାଯାଉଛି।
କ୍ୟାରିୟରର ପ୍ରଥମ ବଲ୍ରେ ସେ କୁମାର ସାଙ୍ଗାକାରାଙ୍କୁ ଆଉଟ୍ କରିଥିଲେ। ଏହାଛଡ଼ା ଡେବ୍ୟୁ ପାଳିରେ ୧୫ ଓଭରରେ ୩୪ ରନ୍ ଦେଇ ୫ ଉଇକେଟ ହାସଲ କରିଥିଲେ। ଏଯାବତ ସେ ୯୯ ଟେଷ୍ଟ ମ୍ୟାଚ୍ର ୧୮୯ ପାଳିରେ ମୋଟ ୩୯୬ ଉଇକେଟ ନେଇଛନ୍ତି। ଏହି ସମୟରେ ସେ ୧୮ ଥର ୫ ଉଇକେଟ ଏବଂ ୩ ଥର ୧୦ ଉଇକେଟ/ଅଧିକ ନେଇଛନ୍ତି। ୫୦ ରନ୍ରେ ୮ ଉଇକେଟ ତାଙ୍କର ସର୍ବଶ୍ରେଷ୍ଠ ପ୍ରଦର୍ଶନ ଅଟେ। ଚଳିତ ଭାରତ ବିପକ୍ଷ ସିରିଜରେ ସେ ତିନି ମ୍ୟାଚ୍ ଖେଳି ୬ ଉଇକେଟ ନେଇଛନ୍ତି।
ଲାୟନଙ୍କ କ୍ୟାରିୟର:
ପ୍ରଥମ ଉଇକେଟ: କୁମାର ସାଙ୍ଗକାରା, ୨୦୧୧
୫୦ତମ ଉଇକେଟ: ୨୦୧୨ ଆଡିଲେଡ୍, ଜୈକ୍ ରୁଡୋଲ୍ଫ
୧୦୦ତମ ଉଇକେଟ: ଷ୍ଟୁଆର୍ଟ ବ୍ରାଡ, ମେଲବର୍ନ ୨୦୧୩
୧୫୦ତମ ଉଇକେଟ: ଜୋସ ବୟଲର, କାର୍ଡିଫ୍ ୨୦୧୫
୨୦୦ତମ ଉଇକେଟ: ଧନଞ୍ଜୟ ଡିସିଲଭା, ପଲ୍ଲେକେଲେ ୨୦୧୬
୨୫୦ ଉଇକେଟ: ତାଇଜୁଲ ଇସ୍ଲାମ, ଢ଼ାକା ୨୦୧୭
୩୦୦ ଉଇକେଟ: କଗିସୋ ରବାଡା, କେପ୍ଟାଉନ୍ ୨୦୧୮
୩୫୦ ଉଇକେଟ: ବେନ୍ ଷ୍ଟ୍ରୋକ୍ସ, ଏଜବେଷ୍ଟନ୍ ୨୦୧୯
