ଖଇରା, ୩ା୧(ଡି.ଏନ.ଏ.) ବାଲେଶ୍ୱର ଜିଲା ଖଇରା ବ୍ଲକ ଅଧୀନ ଖଇରା ଓ ଔପଦା ବ୍ଲକର ଭୂତଳ ପାଇପ ମାଧ୍ୟମରେ ଚାଷଜମିକୁ ଜଳସେଚନ କରିବା ନେଇ ରାଜ୍ୟ ସରକାର ଘୋଷଣା କରିଛନ୍ତି । ଆନନ୍ଦପୁର ବ୍ୟାରେଜର ସାଳନ୍ଦୀ ବାମପାର୍ଶ୍ୱ ଆମ୍ବହତା ମୁଖ୍ୟକେନାଲ ସଂଲଗ୍ନ ୨୨ ପଞ୍ଚାୟତର ୧୩୨ଗୋଟି ଗ୍ରାମ ଏଥିରେ ଉପକୃତ ହେବା ନେଇ ଡିଭିଜନର ଯନ୍ତ୍ରୀମାନେ ପ୍ରକାଶ କରିଛନ୍ତି । ମୋଟ ୯ହଜାର ୮୦୩ ହେକ୍ଟର ଚାଷଜମିକୁ ପାଣି ମାଡିବାର ଯୋଜନା ରହିଛି । ୧୮ମାସ ମଧ୍ୟରେ ଶେଷ ହେବାକୁ ଥିବା ଏଭଳି ଯୋଜନାକୁ ନେଇ ଖଇରା ଔପଦାର ଚାଷୀମାନେ ଉତ୍ସାହିତ ହୋଇପଡିଛନ୍ତି। ଏଭଳି ଯୋଜନା ଅନିୟମିତ ପାଣିପାଗ ଯୋଗୁ ବିତସ୍ପୃହ ହୋଇପଡିଥିବା ଚାଷୀମାନଙ୍କ ପାଇଁ ସଞ୍ଜୀବନୀ ଭଳି କାମ କରିବ ବୋଲି ଉଭୟ ବ୍ଲକର ଚାଷୀମାନେ ପ୍ରକାଶ କରିଛନ୍ତି। ଏହି ୨ ବ୍ଲକର ଚାଷୀମାନେ ଧାନ ଓ ପରିବା ଚାଷ ପାଇଁ ପ୍ରାୟତଃ ବର୍ଷାଜଳ ଉପରେ ନିର୍ଭର କରିଥାନ୍ତି । କ୍ରମାଗତ କିଛି ବର୍ଷ ଧରି କମ୍ ବୃଷ୍ଟିପାତ ଯୋଗୁ ଆଶାନୁରୂପ ଅମଳ ମିଳୁ ନ ଥିଲା। ଏଥିପାଇଁ ବିକଳ୍ପ ବ୍ୟବସ୍ଥା କରିବାକୁ ଚାଷୀମାନେ ବହୁଦିନରୁ ଦାବି କରିଆସୁଥିଲେ। ସ୍ଥାନୀୟ ବିଧାୟକ ତଥା ପର୍ଯ୍ୟଟନମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ଉକ୍ତ ଜମିକୁ ଦୁଇ ବ୍ଲକର କ୍ଷତି ସହୁଥିବା ଚାଷୀମାନଙ୍କ ପାଇଁ ବିକଳ୍ପ ବ୍ୟବସ୍ଥା ପାଇଁ ଉଦ୍ୟମ ଜାରି ରଖିଥିଲେ। ଘୋଷଣା ଅନୁଯାୟୀ ଖଇରା ବ୍ଲକର ନୟାଖଣ୍ଡି, ଖଇରା, ଗୋବିନ୍ଦପୁର, ମହତୀପୁର, ସାରଡାଙ୍ଗ, ନନ୍ଦୁର, ପଳସା, ସାରୁଗାଁ, ଡୁଙ୍ଗୁରା, ଶ୍ୟାମସୁନ୍ଦରପୁର, କୁରୁଣ୍ଟା, ଡଗରପଡା, ଅଚ୍ୟୁତପୁର, ଜଳଦା, ଗଗନଧୂଳି, ମାଖନପୁର ଆଦି ପଞ୍ଚାୟତ ଏବଂ ଔପଦା ବ୍ଲକର ଫତେପୁର, ତଳକିଆ, ରାଇରାମଚନ୍ଦ୍ରପୁର, ଗଡସାହି, ବାଉଁଶବଣିଆ ଓ ଅଘିରାପଦା ଆଦି ପଞ୍ଚାୟତ ଉପକୃତ ହେବେ। ୧୪୭ମିଟର ଦୈର୍ଘ୍ୟ ବିଶିଷ୍ଟ ଭୂତଳ ପାଇପ ବିଛା କାର୍ଯ୍ୟ ପାଇଁ ପାଖାପାଖି ୨୩୦କୋଟି ଟଙ୍କା ଖର୍ଚ୍ଚ ହେବ ବୋଲି ଡିଭିଜନ ତରଫରୁ ସୂଚନା ଦିଆଯାଇଛି। ଆମ୍ବହତା କେନାଲର ୧୬.୦୮କି.ମି.ରୁ ୩୦.୫୪୭କି.ମି. ମଧ୍ୟରେ ଥିବା ୧୨ଟି ଡିଷ୍ଟ୍ରିବ୍ୟୁଟର ଏବଂ ମାଇନରରୁ ଏହି ପାଇପ ସଂଯୋଗ କରାଯିବ। ଏଭଳି ଯୋଜନା ନିରୁତ୍ସାହିତ ଚାଷୀଙ୍କୁ ପ୍ରୋତ୍ସାହିତ କରିବା ସହ ସେମାନଙ୍କର ଅମଳ ଅଧିକ ହେବ ବୋଲି ଔପଦା ତଳକିଆ ପଞ୍ଚାୟତ ଚାଷୀ ଜଗବନ୍ଧୁ ଗାହାଣ ଓ ଭରତ ଚନ୍ଦ୍ର ପ୍ରଧାନ କହିଛନ୍ତି। ଚଳିତବର୍ଷ ବିଳମ୍ବିତ ବର୍ଷା ଯୋଗୁ ବହୁ ଜମି ପଡିଆ ପଡିଥିଲା ା ଏଭଳି ପ୍ରକଳ୍ପ ଘୋଷଣା ଚାଷୀଙ୍କ ମନରେ ନୂଆ ଆଶା ସଞ୍ଚାର କରୁଛି ବୋଲି ମାଖନପୁର ପଞ୍ଚାୟତର ଚାଷୀ ନାରାୟଣ ବେହେରା କହିଛନ୍ତି।
