ଆଠଗଡ଼,୬।୬(ସ୍ବ.ପ୍ର.): ଆଠଗଡ଼ ଥାନା କୁଲାଇଲୋ ପଞ୍ଚାୟତ ଅନ୍ତର୍ଗତ ତଳଗଡ ଗ୍ରାମରେ ରବିବାର ପୋଖରୀ ଓ ନଳକୂପ ଖୋଳାକୁ କେନ୍ଦ୍ର କରି ଗୋଷ୍ଠୀ ସଂଘର୍ଷ ହୋଇଛି। ଏହି ସମୟରେ ଜଣେ ପୋଲିସ କର୍ମଚାରୀ ଗୁରୁତର ହୋଇଥିବାବେଳେ ଆଉ କେତେଜଣ ଆହତ ହୋଇଛନ୍ତି। ତଳଗ୍ରାମରେ ଏମ୍ଜିଏନ୍ଆର୍ଇଜିଏସ୍(ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା)ରେ ମେଶିନ ଲଗାଇ ଜଣେ ଠିକାଦାର ପୋଖରୀ ଖୋଳୁଛନ୍ତି। ଏନେଇ ସମ୍ପୃକ୍ତ ଠିକାଦାର ଏକ ଟ୍ରାକ୍ଟର ବିନୋଦ ମହାରଣାଙ୍କ ସ୍ଥିତିବାନ ଜମିରେ ନେଉଥିଲେ। ଏହାକୁ ମହାରଣା ବିରୋଧ କରିଥିଲେ। ଫଳରେ ଠିକା କାମ କରୁଥିବା କିଛି ଲୋକ ମହାରଣାଙ୍କ ଘରେ ସନ୍ଧ୍ୟାରେ ପହଞ୍ଚତ୍ ଠେଙ୍ଗା, ରଡ଼ ଓ ବୋତଲ ଆଦିରେ ଆକ୍ରମଣ କରିଥିଲେ। ଅନ୍ୟପକ୍ଷରେ ତଳଗଡ ରାମ ମନ୍ଦିର ନିକଟରେ ନଳକୂପ ଖୋଳାକୁ ନେଇ ୨ ଗୋଷ୍ଠୀ ମଧ୍ୟରେ ବଚସା ହୋଇଥିଲା। ୨୦୦ ଫୁଟ୍ ଖୋଳା ହେବା ପରେ ମଧ୍ୟ ପାଣି ନ ପଡ଼ିବା ଯୋଗୁ ଗୋଟିଏ ଗୋଷ୍ଠୀ ଏହାକୁ ବନ୍ଦ କରିବାକୁ ଚାହୁଁଥିଲେ। କିନ୍ତୁ ଉଭୟ ଗୋଷ୍ଠୀ ଏକ ରାଜନୈତିକ ଦଳର ସମର୍ଥକ ହୋଇଥିବା ଯୋଗୁ ନିଜର ପତିଆରା ଦେଖାଇବା ପାଇଁ ଉଦ୍ୟମ କରିଥିଲେ। ଏନେଇ ପରସ୍ପର ମଧ୍ୟରେ ବଚସା ହୋଇଥିଲା। ଖବରପାଇ ଆଠଗଡ଼ ପୋଲିସ ଘଟଣାସ୍ଥଳରେ ପହଞ୍ଚତ୍ ଉଭୟ ପକ୍ଷଙ୍କୁ ବୁଝାଶୁଝା କରିବା ପରେ ନଳକୂପ ଖୋଳା ମାମଲା ଥଣ୍ଡା ପଡିଥିଲା। ଏହି ସମୟରେ ମହାରଣାଙ୍କୁ ଆକ୍ରମଣ ହୋଇଥିଲା।
ଗ୍ରାମର ବହୁ ଲୋକ ସେତେବେଳେ ଏକାଠିଥିଲେ। ଉଭୟ ଘଟଣା ଯୋଗୁ ପୁନର୍ବାର ପରସ୍ପର ମଧ୍ୟରେ କଥା କଟାକଟି ହୋଇ ଗୋଷ୍ଠୀ ସଂଘର୍ଷର ରୂପ ନେଇଥିଲା। ପୋଲିସ ସେମାନଙ୍କୁ ଅଟକାଇବା ପାଇଁ ଉଦ୍ୟମ କରୁଥିବାବେଳେ ଆକ୍ରମଣ ଶିକାର ହୋଇଛି। ଫଳରେ ଆଇଆର ବି ଷଷ୍ଠ ବାଟାଲିୟନର କନଷ୍ଟେବଳ ସୁଶାନ୍ତ କୁମାର ସାହୁ ଗୁରୁତର ହୋଇଛନ୍ତି। ତାଙ୍କ ମୁଣ୍ଡରେ ଆଘାତ ଲାଗିଥିବାରୁ ପ୍ରଥମେ ଆଠଗଡ଼ ଉପଖଣ୍ଡ ଚିକିତ୍ସାଳୟ ଓ ପରେ କଟକ ବଡ଼ ଡାକ୍ତଖାନା ସ୍ଥାନାନ୍ତର କରାଯାଇଛି। ସେହିପରି ଗୋଷ୍ଠୀ ସଂଘର୍ଷରେ ସେହି ଗ୍ରାମର ସଭାପତି ବିଜୟ କୁମାର ମହାପାତ୍ର, ରବୀନ୍ଦ୍ର ବେହେରା, ଅରୁଣ ବେହେରା, ବୁନୁ ବେହେରା ଆହତ ହୋଇଛନ୍ତି। ସେମାନଙ୍କୁ ଆଠଗଡ଼ ଉପଖଣ୍ଡ ଚିକିତ୍ସାଳୟରେ ଚିକିତ୍ସା କରାଯାଇଛି। ଘଟଣାସ୍ଥଳରେ ଆଠଗଡ଼ ପୋଲିସର ଉଚ୍ଚପଦସ୍ଥ ଅଧିକାରୀଙ୍କ ସହ ପୋଲିସ ଫୋର୍ସ ମୁତୟନ କରାଯାଇଛି। ଖବର ଲେଖାହେବାବେଳକୁ ଗ୍ରାମରେ ଉତ୍ତେଜନା ଲାଗି ରହିଥିଲା।